މިދިޔަ 24 ގަޑިއިރު ފުލޫ ކްލިނިކުން 20 މީހެއްގެ ސާންޕަލް ނެގި:މަބްރޫކް
11 މެއި 2020 | ހޯމަ 04:38މިދިޔަ 24 ގަޑިއިރު 215 މީހުން ފުލޫ ކްލިނިކްތަކުން ޚިދުމަތް ހޯދާފައިވޭ
ރޯގާގެ އަލާމާތެއް ފެނިއްޖެ ނަމަ ލަސްނުކޮށް ޑޮކްޓަރަށް ދެއްކުމަށް ޓާސްކްފޯހުގެ ތަރުޖަމާނު މަބްރޫކު ޢަޒީޒް އިލްތިމާސް ކުރައްވާ
ފާއިތުވެދިޔަ 24 ގަޑިއިރު ރޯގާގެ އަލާމާތްތައް ހުރެގެން ޑޮކްޓަރަށް ދެއްކުމަށް ދިޔަ މީހުންގެ ތެރެއިން 20 މީހެއްގެ ސާންޕަލް ކޮވިޑް-19ށް ޓެސްޓު ކުރުމަށް ނަގާފައިވާ ކަމަށް ކޮވިޑް-19 ޓާސްކްފޯހުގެ ތަރުޖަމާނު މަބްރޫކު ޢަޒީޒް ވިދާޅުވެއްޖެއެވެ.
އާދިއްތަ ދުވަހުގެ ރޭ ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ މިވަގުތު އެކި ހިސާބުތަކުގައި ޖުމުލަ 27 ފުލޫ ކްލިނިކެއް ހިންގަމުންދާ ކަމަށެވެ.
އެގޮތުން މިފްލޫ ކްލިނިކަށް ރޯގާގެ ޢަލާމާތްތައް ހުރެގެން ފަރުވާ ހޯދުމަށް 215 މީހަކު މިދިޔަ 24 ގަޑިއިރު ޚިދުމަތް ހޯދާފައިވާ ކަމަށް މަބްރޫކް ވިދާޅުވިއެވެ. އަދި ވިދާޅުވީ ޑޮކްޓަރަށް ދެއްކުމަށް ދިޔަ މީހުންގެ ތެރެއިން 20 މީހެއްގެ ސާންޕަލް ކޮވިޑް-19ށް ޓެސްޓު ކުރުމަށް ނަގާފައިވާ ކަމަށެވެ.
ކޮވިޑް-19 ރާއްޖެއަށް ވެސް ފޯރާފައިވާތީ، އެކަމަށް ޚާއްޞަ ފުލޫ ކްލިނިކްތަކެއް ވަނީ ޤާއިމުކޮށްފައެވެ. އެގޮތުން، ސެނެހިޔާގައި ފުލޫ ކްލިނިކެއް ހުޅުވާފައިވާއިރު، ޓްރެވަލް ފްލޫ ކްލިނިކެއް މާލޭގައި ހުޅުވާފައިވެއެވެ. އަދި ހުޅުމާލޭގައި އެކްސްޕެޓް ފްލޫ ކްލިނިކެއް ހުޅުވާފައިވެއެެވެ. މީގެ އިތުރުން ވެސް އޮންލައިން ކްލިނިކްތަކެއް ހުޅުވާ ކޮންމެ ދުވަހަކު ވެސް އެތައް ބަޔަކަށް ފަރުވާ ދެމުންނެވެ.
ކޮވިޑް-19 ހަލުހިމިނެއްގައި ފެތުރެމުންދާ މިދަނޑިވަޅުގައި ރޯގާގެ އަލާމާތެއް ފެނިއްޖެ ކަމުގައިވާނަމަ ލަސްނުކޮށް ޑޮކްޓަރަށް ދެއްކުމަށް ކަމާ ބެހޭ ފަރާތްތަކުން ވަނީ އިލްތިމާސްކޮށްފައެވެ.
