ފިލްމުތައް ފްލޮޕްވިޔަސް 'ފިލްމީ ކެރިއަރ' ހުއްޓައެއް ނުލާނަން: ސަލްމާން ޚާން

ލޮކްޑައުންގެ ސަބަބުން ބޮލީ ވުޑްގެ ފިލްމީ މަސައްކަތްތައް ހުއްޓުމަކަށް އައިސްފައިވީ ނަމަވެސް ބޮލީވުޑްގެ ސުޕަރ ސްޓާރ ސަލްމާން ޚާން ގެންދަނީ ޕާންވެލް ފާރމް ހައުސްގައި މިވަގުތުވެސް ހުއްޓާ ނުލާ މަސައްކަތް ކުރަމުންނެވެ.

ސަލްމާން ވަނީ އޭނާގެ އަމިއްލަ ޔޫޓިބް ޗެނަލް އެއްވެސް ލޯންޗުކޮށްފައެވެ. އަދި ދެވަނަ ލަވައެއް ވަރަށް އަވަހަށް ރިލީޒް ކުރުމަށް ދަނީ މަސައްކަތް ކުރަމުންނެވެ.

ޕާންވެލްގައި ދުވަސްތައް ހޭދަކުރަމުންދާ ގޮތާ ގުޅޭ ގޮތުން އެކްޓަރ ވަލޫޝާ ޑި ސޫޒާ އާއި ވާހަކަ ދައްކަމުން ސަލްމާން ބުނީ އާއިލާ އާއެކު ވަގުތު ހޭދަކުރަން ބޭނުންވާ ކަމަށާއި، ނަމަވެސް އޭނާގެ މަންމަ އާއި ކޮއްކޮ އަރްޕިތާ އަދި އެނާގެ ދަރިން ފާރމް ހައުސްގައި ތިބުމަށްފަހު އެނބުރި މުމްބާއީ ގޮސްފައިވާ ކަމަށެވެ. އަދި ލޮކްޑައުން ނިމުނުހާ އަވަހަކަށް ގެއަށް ދާނެކަމަށް ބުނެފައިވެއެވެ.

ފާމް ހައުސްގައި ތިބިމީހުންގެ ތެރޭގައި ސަލްމާންގެ އިތުރުން ވަލޫޝާ، އޫލިއާ ވަންތުރު، ޖެކުލިން ފެނާންޑޭޒް އަދި ނިތިން މަޑޯކް އިތުރުންވެސް ބައެއް ތަރިން ހިމެނެއެވެ.

ސަލްމާން ބުނެފައިވަނީ ލޮކްޑައުންގައި ވެސް އޭނާ މަސައްކަތް ކުރަމުންދާ ކަމަށާއި އެގޮތުން އޭނާގެ އަޑުން ކިޔާފައިވާ "ޕިޔާރު ކަރޯނާ" ރިލީޒް ކޮށްފައިވާ ކަމަށެވެ. މީހެ އިތުުރުން "ތޭރޭ ބިނާ" ރިލީޒް ކުރުމަށް ތައްޔާރުވަމުން އަންނަ ކަމަށް ބުންޏެވެ.

ސަލްމާން ބުނީ އޭނާގެ އުމުރުން 15 އަހަރާއި ބައިގައި މަސައްކަތް ކުރަން ފެށި ކަމަށާއި އޭނާގެ ފިލްމުތައް ފްލޮޕްވެ، ބޭނުންވި ގޮތަށް ކެރިއަރ ނުދިޔަނަމަަވެސް ހުއްޓާނުލާ މަސައްކަތް ކުރަމުންދިޔަ ކަމަށެވެ.

މިހާރު ރިލީޒް ކުރަން ތައްޔާރު ވަމުން އަންނަ "ތޭރޭ ބިނާ" މި ލަވަ ސަލްމާންގެ އަޑުން ކިޔާފައިވާއިރު ލަވަ ޑައިރެކްޓް ކޮށްފައި ވެސް ވަނީ އޭނާއެވެ.

ޕަމްވެލްގައި ހުންނަ މި ފާރމް ހައުސްގައި ލަވަ ޝޫޓްކޮށްފައި ވަނީ އެންމެ ތިން މީހުން ބޭނުންކޮށްގެންނެވެ. ލަވަ ޝޫޓް ކުރުމަށް ފަހު ސަލްމާން ބުނެފައިވަނީ މިއީ މިހާތަނަށް އޭނާގެ އެންމެ ޚަރަދު ކުޑަ ޕްރޮޑަކްޝަން ކަމަށެވެ.

މި ލަވަ ޝޫޓް ކުރުމުގެ ތެރޭގައި ވަރަށް ގިނަ ކަންތައްތަކެއް ދަސްވިކަން ފާހަގަކޮށް ސަލްމާން ބުނީ ލަވަ އެއްކޮށް ޝޫޓްކޮށް ނިންމާފައިވަނީ ހަތަރު ދުވަހުން ކަމަށެވެ.

މި ލަވަ ޝޫޓް ކުރަން ފަސޭހަވި ނަމަވެސް ޓްރެކް އެޑިޓް ކުރުމުގައި އުނދަގޫތަކާއި ދިމާވި ކަމަށް ސަލްމާން ބުނެފައިވެއެވެ. އެގޮތުން ގިނަ މީހުން ވައިފައި ބޭނުން ކުރަމުން ދިޔުމުގެ ސަބަބުން އިންޓަރނެޓް ސްޕީޑް ދަށްވިކަން ފާހަގަކޮށް ސަލްމާން ބުނެފައިވަނީ ބައެއް ފައިލްތައް ޑައުންލޯޑް ކުރަން 24 ގަޑީއިރާއި 36 ގަޑީއިރުގެ ވަގުތެއް ހޭދަވި ކަމަށެވެ.