ޔޫކްރެއިންގައި ތިބި 35 ދިވެހިން ރާއްޖެއަށް ގެނެސްފި
10 މެއި 2020 | އާދީއްތަ 09:52މިމީހުން ގެނައީ ހުކުރު ދުވަހު
ޓާސްކް ފޯހުގެ ތަރުޖަމާން މަބްރޫކް އަޒީޒު، ރާއްޖެއިން ބޭރުގައި ތިބި ދިވެހިންގެ ހާލު ވަރަށް ގާތުން ބަލަމުންދާކަން ފާހަގަކުރެއްވި
ޔޫކްރެއިންގައި ތިބި 35 ދިވެހިން ރާއްޖެއަށް ގެނެސްފިއެވެ.
ކޮވިޑް-19އާ ގުޅޭ އެންމެފަހުގެ މަޢުލޫމާތު ދިނުމަށް ހޮނިހިރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ކޮވިޑް-19 ޓާސްކް ފޯހުގެ ތަރުޖަމާން މަބްރޫކް ޢަޒީޒު ވިދާޅުވީ ޔޫކްރެއިންގައި ތިބި 35 ދިވެހިން ގެނެސްފައިވާ ކަމަށާއި، އެމީހުން ރާއްޖެއަށް ގެނައީ ހުކުރު ދުވަހު ކަމަށެވެ.
ޔުކްރެއިންގައި ރާއްޖޭގެ ގިނަ ދަރިވަރުން ޑޮކްޓަރުކަން ކިޔަވަމުންދާއިރު، ރާއްޖެއަށް މިގެނައި ކުދިންގެ އިތުރު މަޢުލޫމާތެއް ހާމަކޮށްފައިނުވެއެވެ.
ރާއްޖެއިން ބޭރުގައި ތިބި ދިވެހިން ރާއްޖެއަށް އަނބުރާ ގެނައުމުގެ މަސައްކަތްތަކާ ބެހޭ ގޮތުން މަބްރޫކް ވިދާޅުވީ ރާއްޖެއިން ބޭރުގެ ގިނަ ޤައުމުތަކުގައި ދިވެހި ޢާއިލާތަކުން ދިރިއުޅޭ ކަމަށެވެ. އަދި ގިނަ ޢަދަދެއްގެ ދަރިވަރުން ތަޢުލީމު ޙާޞިލު ކުރަމުންދާ ކަމަށެވެ. ކޮވިޑް-19އާ ގުޅިގެން ޙާލުގައި ޖެހިފައިތިބި ދިވެހިންގެ ޙާލު ބަލާ އެމީހުންނަށް އެހީތެރިވުމުގެ މަަސައްކަތް ފޮރިން މިނިސްޓްރީން ކުރަމުންދާކަން މަބްރޫކް ފާހަގަކުރެއްވިއެވެ.
ރާއްޖެއިން ބޭރުގައި ތިބި ދިވެހިންގެ ތެރެއިން އަނބުރާ ޤައުމަށް އަންނަން ބޭނުންވާ ފަރާތްތަކަށް އެފުރުޞަތު ސަރުކާރުން އަންނަނީ ފަހިކޮށްދެމުންނެވެ.
