ހުޅުމާލެ މެޑިކަލް ފެސިލިޓީ ކުރިއަށް އޮތް މަދު ދުވަސްކޮޅެއްގެ ތެރޭގައި ހުޅުވޭނެ: ޝަމާލް
10 މެއި 2020 | އާދީއްތަ 02:37ހުޅުމާލެ މެޑިކަލް ފެސިލިޓީއަކީ 290 އެނދުގެ ފެސިލިޓީއެއް
ހުޅުމާލެ މެޑިކަލް ފެސިލިޓީގެ މަސައްކަތް ކުރިއަށްދާގޮތް ޗީފް އޮފް ޑިފެންސް ފޯސް ޝަމާ ބައްލަވާ ލައްވަނީ - އެތަނުގެ ބޮޑު ބައިގެ މަސައްކަތް ވަނީ ނިމި ބޭނުން ކުރަން ތައްޔާރުވެފައި
ކޮވިޑް-19 އާއި ގުޅިގެން ހުޅުމާލޭގައި ޤާއިމުކުރާ މެޑިކަލް ފެސިލިޓީ ކުރިއަށް އޮތް މަދު ދުވަސްކޮޅެއްގެ ތެރޭގައި ހުޅުވިގެންދާނެކަމަށް ޗީފް އޮފް ޑިފެންސް ފޯރސް މޭޖަރ ޖެނެރަލް ޢަބްދުﷲ ޝަމާލް ވިދާޅުވެއްޖެއެވެ.
ކޮވިޑް-19 އާއި ދެކޮޅަށް މަސައްކަތް ކުރުމަށް ސަރުކާރަށް ނަގާފައިވާ ޓްރީ ޓޮޕް ހޮސްޕިޓަލް ކައިރީގައި ޤާއިމު ކުރާ ހުޅުމާލެ މެޑިކަލް ފެސިލިޓީއަކީ 290 އެނދުގެ ފެސިލިޓީއެކެވެ. އަދި އެތަނުގެ މަސައްކަތުގައި މައިގަނޑު ގޮތެއްގައި ޙަރަކާތްތެރިވަނީ އެމްއެންޑީއެފުންނެވެ.
މެޑިކަލް ފެސިލިޓީގެ މަސައްކަތް ބައްލަވާލެއްވުމަށްފަހު ޝަމާލް ކުރެއްވި ޓްވީޓެއްގައި ވިދާޅުވީ ފާއިތުވި 40 ދުވަސް ވަންދެން ޑިފެންސް މިނިސްޓަރު މާރިޔާ އަޙްމަދު ދީދީއާއެކު އެތަނުގެ މަސައްކަތްދާ ގޮތް ބައްލަވާފައިވާ ކަމަށެވެ. ފެސިލިޓީގެ މަސައްކަތް ނިންމާ، އެ ބޭނުން ކުރުމަށްޓަކައި އެމްއެންޑީއެފްގެ މިލިޓަރީ އިންޖިނިއަރުންނާއި، އޮފިސަރުން 24 ގަޑީއިރު ހުއްޓާ ނުލާ މަސައްކަތް ކުރަމުން ގެންދިޔަ ކަމަށެވެ.
އަދި މަސައްކަތުގެ ތެރެއިން ގިނަ ބަޔަކު ކޮވިޑް-19 އަށް ޕޮޒިޓިވްވެ އެކަހެރި ކުރަން ޖެހުނު ނަމަވެސް، ހައި ރިސްކަށް ހުށަހެޅުނު އޮފިސަރުންގެ ހުއްޓުމެއްނެތި މަސައްކަތް ކުރަމުން ގެންދިޔަކަން ޝަމާލް ފާހަގަ ކުރެއްވިއެވެ. އަދި ސައިޓް މޮނިޓަރިންގެ ޙާލަތުގައި އޮތް އިރު ވެސް ބާކީ ތިބި އޮފިސަރުން ވެސް އެކުގައި މަސައްކަތް ކުރިކަމަށް ވެސް ޝަމާލް ވިދާޅުވިއެވެ.
އަދި ހުއްޓުމެއް ނެތި މަސައްކަތް ކުރުމުގެ ނަތީޖާއަކަށް ވެގެންދިޔައީ 290 އެނދުގެ ފެސިލިޓީ ކުޑަ ދުވަސްކޮޅެއްގެ ތެރޭގައި ހުޅުވިގެން ދިއުން ކަމަށް ޝަމާލް ވިދާޅުވިއެވެ. އަދި ޢާއިލާއާއި ދުރުގައި އެ ޙާލުގައި މަސައްކަތް ކުރަން ނުކުތް އޮފިސަރުންނަށް ސެލިއުޓް ކުރައްވާ ކަމަށް ޝަމާލް ވިދާޅުވިއެވެ. އަދި އޮފިސަރުންގެ ޢަޒުމާއި ރޫހަށް ބަދަލެއް ނައިސް ވީ ޤުރުބާނީއަކީ އެމްއެންޑީއެފުން ފަޚުރުވެރިވާ ކަމެއް ކަމުގައި ވިދާޅުވިއެވެ.
ހޮނިހިރު ދުވަހު އެންއީއޯސީގައި، އައިޖީއެމްއެޗުން ބޭއްވި ނޫސްވެރިންގެ ބައްދަލުވުމުގައި އައިޖިއެމްއެޗްގެ ސީއީއޯ އިބްރާހީމް ސަލީމް ވިދާޅުވީ ހުޅުމާލެ މެޑިކަލް ފެސިލިޓީ ގެ ފޭސް އެކެއްގެ އެނދުތައް މިމަހުގެ 14 ގައި ނިންމާލެވޭނެ ކަމަށެވެ. އޭނާ ވިދާޅުވީ ހުޅުމާލެ މެޑިކަލް ފެސިލިޓީގައި މަސައްކަތްތައް ކުރިޔަށްދާނީ ދެ ބަޔަކަށް ކަމަށާއި، ފުރަތަމަ ކަމަކަށް ކޯލްޑް ސްޓޯރޭޖް ހުރި ބައިގައި ފުރަތަމަ ފޭސްގެ އެނދުތައް މިމަހުގެ 14 އަށް ނިންމާލެވޭނެ ކަމަށެވެ.
ޝަމާލް ވަނީ މި މަސައްކަތުގައި އެކި ގޮތްގޮތުން އެހީތެރިވި ފަރާތްތައް ކަމުގައިވާ ފެނަކަ ކޯޕަރޭޝަން، މިނިސްޓްރީ އޮފް ނެޝަނަލް ޕްލޭނިން އެންޑް އިންފްރާސްޓްރަކްޗަރ، ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީގެ އިތުރުން އެހީތެރިވެދެއްވި ޕްރައިވެޓް ކުންފުނިތަކަށް ޝުކުރު އަދާ ކުރައްވާފައެވެ.
ޤައުމަށް ދިމާވެފައިވާ ކޮވިޑް-19 ގެ ބަލިމަޑުކަމާއި ގުޅިގެން ގިނަ ޢަދަދެއްގެ މީހުން ބަލިވެއްޖެނަމަ، އެފަދަ ޙާލަތެއްގައި ފެސިލިޓީގެ ސަބަބުން ބޮޑު އެހީތެރިކަމެއް މަސައްކަތަށް ލިބިގެންދާނެކަން ޗީފް އޮފް ޑިފެންސް ފޯރސް ޝަމާލް ވަނީ ފާހަގަ ކުރައްވާފައެވެ.
