ކޮވިޑް-19އަށް ވެމްކޯގެ މުވައްޒަފަކު ވެސް ޕޮޒިޓިވް ވެއްޖެ
9 މެއި 2020 | ހޮނިހިރު 06:12ވެމްކޯއިން ޕޮޒިޓިވް ވެފައިވަނީ ކޯލް ސެންޓަރުގެ މުވައްޒަފެއް ކަމަށް ވޭ
ވެމްކޯގެ މުވައްޒަފުން ކުނި ނެގުމުގައި ހަރަކާތްތެރި ވަނީ: ވެމްކޯ ފަދަ ރައްޔިތުންނަށް ހިދްމަތް ފޯރިކޮށްދޭ ސަރުކާރުގެ ބައެއް ކުންފުނިތަކުގެ ބައެއް މުވައްޒަފުން ވެސް ކޮވިޑް-19 އަށް ވަނީ ޕޮޒިޓިވް ވެފައި
ރާއްޖޭގައި މިހާރު ފެތުރެމުންދާ ކޮވިޑް-19 ރޯގާ އަށް ވޭސްޓް މެނޭޖްމަންޓް ކޯޕަރޭޝަން (ވެމްކޯ)ގެ މުވައްޒަފަކު ޕޮޒިޓިވް ވެއްޖެއެވެ.
އެނގިފައިވާ ގޮތުގައި، އެ މުވައްޒަފަކީ އެކުންފުނީގެ ކޯލް ސެންޓަރުގައި މަސައްކަތްކުރާ މުވައްޒަފެކެވެ. އަދި އޭނާގެ ކޮވިޑް-19އަށް ޝައްކުކުރެވޭ އަލާމާތްތައް ހުރެގެން މިމަހުގެ ދެވަނަ ދުވަހުން ފެށިގެން ގޭގައި ބެހެއްޓި މުވައްޒަފެއްކަމަށް ވެއެވެ.
ވެމްކޯއަކީ މާލެ ސަރަހައްދުގައި އުފެދޭ ކުނި ރައްކާތެރިކަމާއެކު ނައްތާލުމަށް އުފައްދާފައިވާ ސަރުކާރުގެ ކުންފުންޏެކެވެ. މިކުންފުނިން ގޭގެއަށް ގޮސް، ގޭބީސީތަކުގައި އުފެދޭ ކުނި ނަގަމުންދިޔަ ނަމަވެސް، ކޮވިޑް-19 މާލެ ސަރަހައްދުގައި ފެތުރި، މާލެ ސަރަހައްދު ލޮކްޑައުންކުރުމުން، ވެމްކޯއިން ވަނީ ކުނި ނަގަން ގޭބީތަކަށް ނުވަންނަން ނިންމާފައެވެ. އަދި ގޭބީސީތަކުގައި އުފެދޭ ކުނި، މެންދުރު 12:00 އާއި 14:00 އާދެމެދު މަގު މައްޗަށް ނެރެފައި ބެހެއްޓުމަށް އެދިފައެވެ.
ނަމަވެސް ކަރަންޓީން ނުވަތަ މޮނީޓަރިންގެ ހާލަތުގައިވާ ގޭތަކުން، މަގުމަށް ކުނި ނުނެރުމަށާއި، އެގެތަކުން ކުނި ނެގުމަށް ވެމްކޯގެ ހާއްސަ ޓީމަކުން ދަނީ މާލެ ސަރަހައްދުގައި ހަރަކާތްތެރިވަމުން ނެވެ.
މީގެކުރިން އެސްޓީއޯ، އެމްޓީސީސީ، އަދި މޯލްޑިވްސް ގޭސް ފަދަ ރައްޔިތުންގެނަށް ޚިދުމަތް ފޯރުކޮށްދޭ ސަރުކާރުގެ ބައެއް ކުންފުނިތަކުގެ މުވައްޒަފުން ޕޮޒިޓިވްވެފައި ވެއެވެ.
ރާއްޖޭގައި މިހާރު ފެތުރެމުންދާ ކޮވިޑް-19 ރޯގާއަށް 744 މީހަކު ޕޮޒިޓިވް ވެފައި ވެއެވެ. ކުރިއަށް މިދާ ހަފުތާއާއި، އަންނަ ހަފުތާއަކީ ކޮވިޑް-19 ޖެހޭ މިންވަރު އިތުރުވެގެން ހިގައިދާނެ ދުވަސްތަކެއް ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ލަފާކުރެ އެވެ.
