ކޮވިޑް -19 އާ ގުޅިގެން ސަރުކާރުން ކުރަމުންދާ މަސައްކަތްތައް އިދިކޮޅުންވެސް ބަލައިގަނޭ: ހޯމް މިނިސްޓަރ
8 މެއި 2020 | ހުކުރު 20:15ސަރުކާރުން ފިޔަވަޅު އަޅާމުން ދަނީ ޓެގް ޓީމުގެ ލަފަޔާއި އެއްގޮތަށް ކަމަށް ވިދާޅުވި
ހޯމް މިނިސްޓަރ އައްޝައިޚް އިމްރާން އބްދުﷲ
ރާއްޖޭގައި ކޮވިޑް-19 އާ ގުޅިގެން ސަރުކާރުން ކުރަމުން ގެންދާ މަސައްކަތްތައް އިދިކޮޅު ފަރާތްތަކުންވެސް ބަލައިގަންނަމުން ދާ ކަމަށް ހޯމް މިނިސްޓަރ އައްޝައިޚް އިމްރާން އަބްދުﷲ ވިދާޅުވެއްޖެ އެވެ.
ކޮވިޑް-19 އާ ގުޅިގެން ރާއްޖެ ޓީވީން ގެނެސްދިން ޚާއްސަ ކަވަރޭޖަށް މައުލޫމާތު ދެއްވަމުން މިނިސްޓަރ އިމްރާން ވިދާޅުވީ ވަރަށް ގިނަ އިދިކޮޅު ޕާޓީތަކުގެ އިސްބޭފުޅުންނާއި ވާހަކަ ދެކެވޭ ކަމަށާއި ސަރުކާރުން އަޅަމުންދާ ފިޔަވަޅުުތަކަށް އެބޭފުޅުން ތައުރީފް ކުރައްވާ ކަމަށެވެ. އަދި ސަރުކާރުގެ ރޭވުންތެރިކަމާއި ސަރުކާރުން އަޅާމުންގެންދާ ފިޔަވަޅުތައް ބަލައިގަންނަކަމަށް އެބޭފުޅުން ވިދާޅުވާ ކަމަށެވެ.
ޓެގް ޓީމުގައިވެސް ސިޔާސީ އެކި ފިކުރުގެ ބޭފުޅުން މަސައްކަތް ކުރައްވަމުން ގެންދަވާ ކަމަށާއި ސަރުކާރުން ނިންމުންތައް ނިންމަމުން ގެންދަނީ ސިޔާސީ ގޮތުން އެެއްވެސް ތަފާތު ކުރުމެއް ނެތި ކަމަށް މިނިސްޓަރ ވިދާޅުވިއެވެ. ސަރުކާރުން އަޅަމުންދާ ފިޔަވަޅު ތަކަކީ ރަނގަޅު ފިޔަވަޅު ތަކެއްކަން އެންމެ ބޮޑަށް އެނގިވަޑައިގަންނަވާނީ ފްރަންޓްލައިން ގައި މަސައްކަތް ކުރައްވާ ސިއްޚީ ޚިދުމަތްތެރިންނަށް ކަމަށް މިނިސްޓަރ ވިދާޅުވިއެވެ.
ސަރުކާރުން މަސައްކަތް ކުރަމުންދަނީ ސިޔާސީ ވިސްނުމުން އެއްފަރާތްވެ ތިބެ ، ޓޭގް ޓީމުން ދެއްވާ އެންމެ ފުރިހަމަ މަޝްވަރާއާއި އިރުޝާދާއި އެއްގޮތަށް ކަމަށެވެ.
އަދި ސަރުކާރުން މިއަދު ކުރަމުންދަނީ ސިޔާސީ މަސައްކަތެއް ނޫން ކަމަށާއި، ދިމާވެފައި މިއޮތް ބޮޑު ކާރިސާއިން އަރައިގަތުމަށްޓަކައި ހުރިހާ ރައްޔިތުންނަށް އެންމެ މަންފާ ހުރި އަދި އެންމެ ރައްކައުތެރި ގޮތަކަށް ކުރަމުންދާ މަސައްކަތެއް ކަމަށެވެ.
ސަރުކާރުގެ އަމާޒަކީ ސިޔާސީ ގޮތުން އެއްވެސް ތަފާތު ކުރުމެއް ނެތި ހުރިހާ ރައްްޔިތުން ހަމަހަމަ ގޮތެއްގައި ބަލައިގަނެ ރައްޔިތުންނަށް ޚިދުމަތް ކުރުން ކަމަށް ހޯމް މިނިސްޓަރ ވިދާޅުވިއެވެ.
