ގަދަ ފަހެއްގައި ހިމެނި، ސޮން އަސްކަރީ ތަމްރީން ފުރިހަމަކޮށްފި

ޓޮޓެންހަމް ހޮޓްސްޕާ އަށް ކުޅެމުން އަންނަ ދެކުނު ކޮރޮއާގެ ފޯވާޑް ސޮން ހުއެން-މިން، ތިން ހަފްތާގެ އަސްކަރީ ތަމްރީނުތައް ފުރިހަމަކޮށްފި އެވެ.

ކޮރޯނާވައިރަސް (ކޮވިޑް-19) ގެ ސަބަބުން ފުޓްބޯޅަ ސީޒަން ހުއްޓިފައި އޮތުމުން، ސޮން ވަނީ އެގައުމުގެ ގާނޫނުގައިވާ ކަންތައް ފުރިހަމަ ކުރުމަށް އަސްކަރީ ޚިދުމަތުގައި ބައިވެރިވާން ނިންމާފައެވެ.

ދެކުނު ކޮރެއާގެ ގާނޫނުގައި ވަނީ އެގައުމުގެ ފިރިހެނުން، އުމުރުން 28 އަހަރު ފުރުމުގެ ކުރިން އަސްކަރިއްޔާގައި ދެ އަހަރު ފުރިހަމަ ކުރަން ޖެހޭނެ ކަމަށެވެ. އެކަމަކު ގައުމަށް އެކި ރޮނގު ރޮނގުން ރަންވަނަ ހޯދައިދޭ ފަރާތްތަކަށް އެގައުމުގެ ސަރުކާރުން ކޮންމެސް ވަރެއްގެ ލުޔެއް ދެޔެވެ. އެގޮތުން 2018 ވަނަ އަހަރު އޭޝިއަން ގޭމްސް ފުޓްބޯޅަ އިވެންޓުން ސޮންގެ ކެޕްޓަން ކަމުގެ ދަށުން ކޮރެއާއިން ވަނީ ރަން މެޑަލް ކާމިޔާބުކޮށްފައެވެ. އެހެންކަމުން އެ ގައުމުގެ ސަރުކާރުން ވަނީ ރަން މެޑަލް ހޯދި ޓީމުގެ ކުޅުންތެރިންނަށް ލުޔެއް ދޭން ނިންމާފައެވެ. އެގޮތުން ސޮން އަށް ދިން ލުޔަކީ ތިން ހަފްތާ ވަންދެން އަސްކަރިއްޔާގެ މެރިން ކޯޕްސްގެ އަސާސީ ތަމްރީނުތައް ހަދައި، 500 ގަޑިއިރު ވަންދެން އިޖުތިމާއީ ޚިދުމަތުގައި އުޅުމެވެ.

އެގިތުން އޭޕްރިލް މަހުން ފެށިގެން ތިން ހަފްތާގެ މުއްދަތަށް އޭނާ ދެކުނު ކޮރެއާގެ އަސްކަރިއްޔާގެ މެރިންސް ކޭމްޕެއްގައި ހެދި ތަމްރީނުތަކުގެ ތެރޭގައި ކަރުނަ ގޭސް ތަމްރީނާއި ރައިފަލް ތަމްރީނުވެސް ހިމެނެ އެވެ. އެ ޔުނިޓުގެ އެންމެ ރަނގަޅު ފަސް ރެކްރޫޓުންގެ ތެރޭ ސޮން ހިމެނުނީ ތަމްރީނުގައި ބައިވެރިވި 157 ބައިވެރިންނާ ވާދަކޮށްގެންނެވެ.

ދެކުނު ކޮރެއާގެ ގައުމީ ޓީމަށް މިހާތަނަށް 87 މެޗު ކުޅެދީފައިވާ ސޮން އަށް އަސްކަރީ ޚިދުމަތުން ލުޔެއް ދިންއިރު، ދެކުނު ކޮރެއާ އިން ވަނީ މީގެ ކުރިން ދެ ފަހަރެއްގެ މަތިން އެގައުމުގެ ކުޅިވަރު ދެ ޓީމަކަށް އަސްކަރީ ޚިދުމަތުން ލުޔެއް ދީފައެވެ.