ސަމްޕްޑޯރިއާގެ ހަތަރު ކުޅުންތެރިއަކު ކޮރޯނާވައިރަހަށް ޕޮޒިޓިވްވެއްޖެ

ސަމްޕްޑޯރިއާގެ ހަތަރު ކުޅުންތެރިއަކު ނޮވެލް ކޮރޯނާވައިރަސް (ކޮވިޑް-19) އަށް ޕޮޒިޓިވްވެއްޖެ އެވެ.

އިޓާލިއަން ލީގު އަލުން ފަށަން މަސައްކަތް ކުރަމުން އަންނައިރު، އިޓާލިއަން ލީގުގެ ކްލަބުތަކުން އަންނަނީ ހުރިހާ ކުޅުންތެރިން ކޮވިޑް-19 އަށް ޓެސްޓު ކުރަމުންނެވެ. އެގޮތުން ސަމްޕްޑޯރިއާގެ ކުޅުންތެރިން މި ވައިރަހަށް ޓެސްޓު ކުރިއިރު، ހަތަރު ކުޅުންތެރިއަކު ވަނީ ކޮވިޑް-19 އަށް ޕޮޒިޓިވްވެފައެވެ.

ސަމްޕްޑޯރިއާ އިން ބުނީ ފަހުން ޕޮޒިޓިވްވި ހަތަރު ކުޅުންތެރިންގެ ތެރޭގައި، ކުރިން މި ވައިރަހަށް ޕޮޒިޓިވްވި ކުޅުންތެރިއަކުވެސް ހިމެނޭ ކަމަށެވެ. މިދިޔަ މާރޗު މަހު ސަމްޕްޑޯރިއާގެ ފަސް ކުޅުންތެރިއަކު ވަނީ ކޮވިޑް-19 އަށް ޕޮޒިޓިވްވެފައެވެ. އެއީ މަނޯލޯ ގަބިއަޑިނީ، އޮމަރު ކޮލީ، އަލްބިން އެކްދަލް، އެންޓޮނިނޯ ލަ ގުމީނާ އަދި މޯޓެން ތޯސްބީއެވެ. އެކަމަކު ފަހުން ކޮވިޑް-19 އަށް ޕޮޒިޓިވްވި ހަތަރު ކުޅުންތެރިންގެ ނަން ސަމްޕްޑޯރިއާ އިން ހާމަކޮށްފައެއް ނުވެއެވެ.

އިޓާލިއަން ލީގުގެ ކްލަބުތަކުގެ ކުޅުންތެރިން ކޮވިޑް-19 އަށް ޓެސްޓު ކުރަމުން އަންނައިރު، ޓޮރީނޯގެ ކުޅުންތެރިއަކާއި ފިއޮރެންޓީނާގެ ތިން ކުޅުންތެރިއަކު ވަނީ މި ވައިރަހަށް ޕޮޒިޓިވްވެފައެވެ.

އިޓާލިއަން ލީގު އަލުން ފަށަން ތައްޔާރުވަމުން އަންނައިރު، މީގެ ކުރިން ކުޅުންތެރިން އެކަނި ތަމްރީނު ކުރުމުގެ ހުއްދަ އިޓަލީގެ ސަރުކާރުން ވަނީ ދީފައެވެ. އަދި މި މަހުގެ 18 ވަނަ ދުވަހުން ފެށިގެން ކްލަބުތަކަށް އެކީ ތަމްރީނުތައް ހެދުމުގެ ފުރުސަތު ލިބޭނެ ކަން ވަނީ ހާމަކޮށްފައެވެ.

ރިޕޯޓުތައް ބުނާ ގޮތުން މިމަހުގެ 27 އާއި ޖޫން މަހުގެ 2 އާ ދެމެދު އިޓާލިއަން ލީގުގެ ކުޅުން އަލުން ފަށަން އަންނަނީ މަސައްކަތް ކުރަމުންނެވެ.