އަދަބީ ހުނަރުތައް ދަސްކޮށްދިނުމުގެ އޮންލައިން ކުލާސްތަކެއް ފަށަނީ!
8 މެއި 2020 | ހުކުރު 08:55ދެ ކޯސް ފެށުމަށް ހަމަޖެހިފައިވަނީ މިމަހުގެ 20 ގައި
އެކަޑަމީގެ ރައީސް އަޝްރަފް އަލީ، ލޮކްޑައުން އާއި ގުޅިގެން ޅެން ދަސްކޮށްދިނުމުގެ ކޯހެއް ވެސް ކުރިއަށް ގެންދަން ނިންމާފައިވޭ
ކޮވިޑް-19ގެ ފުރަބަންދުގައި ގޭގައި ތިބެގެން ދިވެހި އަދަބީ ހުނަރުތައް ދަސްކުރުމަށް ޝައުގުވެރިވާ މީހުންނަށް އެ ފުރުސަތު ހުޅުވާލައިފިއެވެ.
ދިވެހިބަހުގެ އެކަޑަމީން ބުނީ ހުރިހާ އުމުރު ފުރާއަކަށް ހުޅުވައިލައިގެން ނާވިލު ލިޔުމުގެ ހުނަރުވެރިކަން ދަސްކޮށްދިނުމުގެ ކިލާހަކާއި ވާހަކަދެއްކުމުގެ ހުނަރު ދަސްކޮށްދިނުމުގެ ކިލާހެއް އޮންލައިން ކޮށް ކުރިއަށް ގެންދަން ހަމަޖެހިފައިވާ ކަމަށެވެ.
އެގޮތުން ވާހަކަދެއްކުމުގެ އަސާސީ ހުނަރުތައް ދަސްކޮށްދިނުމުގެ އޮންލައިން ކުލާހުގެ މުއްދަތަކީ 20 ގަޑިއިރު ކަމަށާއި، މިމަހުގެ 20 ގައި ކޯސް ފެށޭނެ ކަމަށެވެ.
މީގެ އިތުރުން ދިވެހިބަހުގެ އެކަޑަމީން ބުނީ ނާވިލު ލިޔުމުގެ ހުނަރުވެރިކަން ދަސްކޮށްދިނުމުގެ އޮންލައިން ކުލާހުގެ މުއްދަތަކީ 5 ގަޑިއިރު ކަމަށެވެ. އޮންލައިން ކޮށް ކުރިއަށް ގެންދެވޭ މިކޯސް ވެސް ފެށުމަށް ހަމަޖެހިފައިވަނީ މިމަހުގެ 20ގައެވެ.
މިދެކޯހަކީ ވެސް ހިލޭ ކުރިއަށް ގެންދިއުމަށް ހަމަޖެހިފައިވާ ދެކޯހެއެވެ.
އެކަޑަމީން ބުނީ ކުލާސްތަކުގައި ބައިވެރިވާން ޝައުގުވެރިވާ މީހުން ބައިވެރިވާން އެދޭ ފޯމު 2020 މޭ 12ވާ އަންގާރަ ދުވަހުގެ 14:00ގެ ކުރިން ހުށަހެޅުން އެދޭ ކަމަށެވެ. އަދި އިތުރު މަޢުލޫމާތު ބޭނުންނަމަ 7986230 ގުޅަމަށް އެދިފައިވެއެވެ.
