ޖަޒީރާ ރައީސް ޒުވާނުންނާއިކު: ފަންނުވެރިންގެ ހުނަރުތައް ވަނީ ދައްކާލާފަ
28 މެއި 2018 | ހޯމަ 21:04މި ހަރަކާތުގައި ގިނަ އަދަދެއްގެ ޒުވާނުން ވަނީ ބައިވެރިވެފަ
ޖަޒީރާ ރައީސް ޒުވާނުންނާއިކު ބޭއްވި ހަރަކާތުގެ ތެރެއިން
އެމްޑީޕީގެ ޕްރައިމަރީގައި ވާދަ ކުރައްވާ ކުރީގެ ރައީސް މުހައްމަދު ނަޝީދުގެ ކެމްޕެއިންގެ ތެރެއިން ޒުވާނުންނަށް ހާއްސަކޮށްގެން ހަރަކާތެއް ކުރިއަށް ގެންގޮސްފިއެވެ.
މާލޭގައި ހުންނަ ހޭންގްއައުޓް ކެފޭގައި އަންގާރަ ދުވަހުގެ ރޭ ބޭއްވި "ޖަޒީރާ ރައީސް'ގެ ކެމްޕެއިން ހަރަކާތުގައި ގިނަ އަދަދެއްގެ ޒުވާނުން ބައިވެރިވިއިރު، ބައެއް ފަންނާނުންގެ ހުނަރުތަށް ވަނީ ދައްކާލަފައެވެ. ޒުވާނުންނާއި ގުޅުންހުރި ތަފާތު ކުރެހުންތަކާއި ރާއްޖޭގެ މިއަދުގެ ހާލަތާއި ގުޅޭގޮތުން ކުރަހާފައިވާ ތަފާތު ކުރެހުންތަށް ވަނީ މި ހަރަކާތުގައި ދައްކާލާފައެވެ. އެ ކުރެހުންތައް ރައީސް ނަޝީދަށް ސްކައިޕް މެދުވެރިކޮށް ދައްކާލާފައިވާއިރު، އެކުރެހުންތަށް ކުރެހި ޒުވާނުން ވަނީ ކުރެހުންތަކުން ދައްކުވައިދޭ ކަންކަން އެމަނިކުފާނާއި ހިއްސާކޮށްފައެވެ.
ޖަޒީރާ ރައީސް ޒުވާނުންނާއިކު ބޭއްވި ހަރަކާތުގެ ތެރެއިން
މި ހަރަކާތުގައި ބައިވެރި ބައެއް ފަނުންނުން ރާއްޖެއެމްވީއަށް މައުލޫމާތު ދެމުން ބުނީ މިފަދަ ގޮތަށް ރައީސް މުހައްމަދު ނަޝީދާ ބައްދަލުވެ ވާހަކަ ދައްކާލުމުގެ ފުރުސަތު ލިބުމުން ވަރަށް އުފާވާ ކަމަށެވެ. އަދި ވަކިން ހާއްސަކޮށް އެ ކުރެހުންތަކަށް ރައީސް ނަޝީދު ކޮމެންޓް ކުރެއްވުމުން އެއީ އެ ދާއިރާއިން ކުރިއަށް ދިއުމުގައި ލިބޭ ވަރަށް ބޮޑު އުފަލެއް ކަމަށް ވެސް އެމީހުން ބުންޏެއެވެ.
ޖަޒީރާ ރައީސް ޒުވާނުންނާއިކު ބޭއްވި ހަރަކާތުގެ ތެރެއިން
ރައީސް ނަޝީދު ވިދާޅުވީ ފަންނާނުންނަކީ އެހެން ބައެއްގެ ނުފޫޒަށް ބޯނުލަނބައި، ހިތުގައި އޮންނަ އެއްޗެއް ރައްޔިތުންނަން އެކި ގޮތްގޮތުން ބުނެދެމުންދާ ބައެއް ކަމަށެވެ.
"ކަމެއް ސިފަ ވަނީ ވެސް އަދި އަޅުގަނޑުމެންގެ ހިތުގައި އެއްޗެއް ސިފަ ކޮށްދެނީވެސް، އިހްސާސްއެއް ވެވެނީވެސް، ޖޯޝެއް އުފެދެނީވެސް، ހިތާމަޔާ އެކު ގެނެސްދެވެނީ ވެސް، ފަންނާނުންގެ އާޓިސްޓުންގެ މަސެއްކަތުން އެއްވެސް ޝައްކެއް ނެތް. އަޅުގަނޑަށް ފެންނަ ގޮތުގައި ގައުމެއް ބިނާއެއް ނުކުރެވޭނެ އާޓިސްޓުންނާ ނުލައެއް. އިންޖިނަރުންނާއި ޑޮކްޓަރުންނަކީ ވަރަށް ބޭނުންތެރި ބައެއް. އެހެންނަމެސް އެއަށް ޖުމްލަ ވިސްނުމެއްދީ ބައްޓަމެއްދީ އޮންނަންވީ ގޮތް ކިޔާދީ އަދި ހާއްސަކޮށް، އަދި ހާއްސަކޮށް ކޮންމެހެން އެހެން ބައެއްގެ ނުފޫޒަށް ބޯނުލެނބި، ތިމާގެ ހިތުގައި އޮންނަ އެއްޗެއް ބުނަމުންދާ ބަޔަކީ އާޓިސްޓުން" ފަންނާނުންނާ ވާހަކަދައްކަވަމުން ރައީސް ނަޝީދު ވިދާޅުވިއެވެ.
ލައިވް މިއުޒިކާއި އެކު ކުރިއަށް ދިޔަ މި ހަރަކާތުގައި މަޝްހޫރު ލަވަކިޔުންތެރިޔާ މެޒޯ މުހައްމަދުގެ އިތުރުން ބައެއް ޒުވާނުން ވަނީ ލަވަ ހުށަހަޅައިދީފައެވެ.
ޖަޒީރާ ރައީސް ޒުވާނުންނާއިކު ބޭއްވި ހަރަކާތުގެ ތެރެއިން
ރައީސް ނަޝީދުގެ ކެމްޕެއިން ހަރަކާތް ޒުވާނުންނާއި އެކު ހޯމަ ދުވަހުގެރޭ ކުރިއަށް ގެންގޮސްފައިވާއިރު، ކެމްޕެއިން ނިންމާލުމުގެ ގޮތުން ބޮޑު ޖަލްސާއެއް ކާނިވާ ސަރަހައްދުގައި ބޭއްވޭތޯ ދަނީ މަސައްކަތް ކުރަމުނެވެ. ނަމަވެސް ޖަލްސާ ބޭއްވުމަށް ކާނިވާ ލިބަފެއް ނުވެއެވެ. ރައީސް ނަޝީދުގެ ކެމްޕެއިން ޓީމުން ދަނީ މި މަހުގެ 30 ވަނަ ދުވަހުގެ ކުރިން ރާއްޖޭގެ މީހުން ދިރިއުޅޭ ކޮންމެ ރަށެއްގައި ކޮންމެވެސް ހަރަކާތެއް ހިންގޯތޯ މަސައްކަތް ކުރަމުނެވެ. ޕްރައިމަރީ ބޭއްވުމާ ހަމައަށް އެކި ހަރަކާތްތައް ރައީސް ނަޝީދުގެ ކެމްޕެއިން ޓީމުން ރާވާފައިވާއިރު ވޯޓުލާ ދުވަހު ރައީސް ނަޝީދުގެ ފަރާތުން ހަރަކާތްތެރިވާނެ ގުރޫޕްތައް ވެސް މިހާރު ތައްޔާރުވެފައިވާ ކަމަށް ކެމްޕެއިން ޓީމުން ވަނީ ބުނެފައެވެ.
