ރާއްޖޭގައި ކޮވިޑް-19 ގެ ޓެސްޓިން ރޭޓް ދަށް ކަމަށާއި، ޓެސްޓު ކުރުމުގެ އުސޫލު ބަދަލުކުރަންޖެހޭކަމަށް ހެލްތް ޕްރެޓެކްޝަން އެޖެންސީ (އެޗްޕީއޭ) އަށް ލަފާދެއްވާ ކުރީގެ ޑިރެކްޓަރު ޖެނެރަލް އޮފް ޕަބްލިކް ހެލްތު، ޑރ. ޝީނާ މޫސާ ވިދާޅުވެއްޖެއެވެ.

ބުރާސްފަތި ދުވަހުގެރޭ ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ޑރ. ޝީނާ ވަނީ ބަލީގެ އަލާމާތްތައް ހުންނަ މީހުން އެކަނި ޓެސްޓު ކުރާތީ އެކަމަށް ކަންބޮޑުވުން ފާޅުކުރައްވާފައެވެ. ޝީނާ ވިދާޅުވީ، ޓެސްޓު ކުރެވޭ އަދަދު ދަށްވުމުން ދުވާލެއްގެ މައްޗަށް ފެންނަ ކޭސްތަކުގެ އަދަދު މަދުވެފައިވާ ކަމަށެވެ.

ބުރާސްފަތި ދުވަހު އެކަނިވެސް 300 ކޭސް ފެންނަން ޖެހޭ ކަމަށާއި، ނަމަވެސް ޓެސްޓު ކުރެވޭ ނިސްބަތާއި ޓެސްޓު ކުރެވޭ ގްރޫޕަށް ބަލާއިރުު، ރޭޓް ދަށް ކަމަށް ޑރ. ޝީނާ ވިދާޅުވިއެވެ.

ޑރ. ވިދާޅުވީ، އަސްލު އަދަދުތައް ހާމަވެގެންދާނީ ޓެސްޓުތައް ކުރާ އަދަދު އިތުރުވެގެން ކަމަށެވެ. ޓެސްޓު ނުކުރުމަކީ ވަރަށް ކަންބޮޑުވާ ކަމެއް ކަމަށާއި، އޭގެ ސަބަބުން ބަލީގެ ކުރީކޮޅު ބަލި ޖެހިފައި ހުންނަ މީހާ ދެނެނުގަނެވޭ ކަމަށް ޑރ. ވިދާޅުވިއެވެ. އަދި އޭގެ ސަބަބުން އެ މީހާ އަށް ބަލި ޖެހިފައިވާކަން ދެނެގަނެވޭއިރު އެ މީހާގެ ހާލު ގިނަ ފަހަރު ގޯސްވެފައި ހުންނަ ކަމަށާއި، އެހެން ކަމުން މިހާރަށްވުރެ ބޮޑަށް އެކްޓިވް ކޭސްތައް ހޯދަންޖެހޭކަން ޑރ. ޝީނާ ފާހަގަކުރެއްވިއެވެ.

ޕްރެސް ކޮންފަރެންސްގައި ވާހަކަ ދައްކަވަމުން އެންއީއޯސީގެ ތަރުޖަމާނު ވިދާޅުވީ، ޓެސްޓިން ކެޕޭސިޓީ އިތުރު ކުރުމަށް މަސައްކަތްތަކެއް ކުރެވެމުންދާ ކަމަށެވެ. އެގޮތުން ޓެސްޓުތައް އިތުރު ކުރުމަށް މެޝިންތައް ގެނައުމުގެ މަސައްކަތް ކުރެވެމުންދާ ކަމަށާއި، ނުގެނެވިގެން އުޅޭނީ ދުނިޔެ މިހާރު މިއޮތް ހާލަތުން ކަމަށެވެ.

މީގެ ކުރިން ބޭއްވި ޕްރެސްކޮންފަރެންސެއްގައި ހެލްތް މިނިސްޓަރު އަބްދުﷲ އަމީން ވިދާޅުވީ، ދުވާލެއްގެ މައްޗަށް 400 ވަރަކަށް ޓެސްޓު ހެދޭނެ ކަމަށެވެ. އައިޖީއެމްއެޗްގެ އިތުރުން ފުލުހުންގެ ލެބޯރަަޓަރީގައިވެސް ކޮވިޑް-19 އަށް މިހާރު ޓެސްޓު ކުރެވެއެވެ.