ކެންސަލް ކޮށްފައިވާ ފްރެންޗު ލީގު އަލުން ފަށާނެ ކަމަށް އަދިވެސް އުންމީދުކުރާ ކަމަށް ލިޔޯންގެ ރައީސް ޖިއަން-މިކޭލް އައުލަސް ވިދާޅުވެއްޖެ އެވެ.

ފްރެންޗު ލީގު ކެންސަލް ކޮށް، ޕީއެސްޖީ އަށް ޗެމްޕިއަންކަން ދޭން ފްރާންސް ޕްރޮފެޝަނަލް ފުޓްބޯލް ލީގު (އެލްއެފްޕީ) އިން ވަނީ ނިންމާފައެވެ.

ފްރެންޗު ލީގު ކެންސަލް ކުރިއިރު، ޔުއެފާ އިން ލީގުތައް ކެންސަލް ކުރަން ހުއްދަ ދިނީ ޔޫރަޕްގެ މަގާމުތަކަށް ޓީމުތައް ކަނޑައެޅުމަށް ޝަރުތުކޮށްފައެވެ. އެހެންކަމުން ފްރެންޗު ލީގުން ޔުއެފާ ޗެމްޕިއަންސް ލީގަށް ކޮލިފައިވާނީ އެއްވަނައިގައި އޮތް ޕީއެސްޖީ، ދެވަނައިގައި އޮތް މާސޭ އަދި ތިންވަނައިގައި ރެނެސް އެވެ. އަދި ޔުއެފާ ޔޫރޮޕާ ލީގަށް ކޮލިފައިވާނީ ހަތަރުވަނައިގައި އޮތް ލިލް، ފަސްވަނައިގައި އޮތް ރެއިމްސް އަދި ހަވަނައިގައި އޮތް ނީސް އެވެ. އެހެންކަމުން މިއީ 1997 ވަނަ އަހަރަށްފަހު ޔޫރަޕްގެ މުބާރާތަކުން ތާވަލުގެ ހަތްވަނައިގައި އޮތް ލިޔޯނަށް ފުރުސަތު ގެއްލުނު ފުރަތަމަ ފަހަރެވެ.

ލިޔޯނުން މީގެ ކުރިން ވަނީ އެލްއެފްޕީގެ ނިންމުމާ އެކު ސީޒަން ފުރިހަމަނުކުރެވި ޔޫރަޕްގެ ޖާގައެއް ނުލިބުމުން އެ ޓީމަށް ކުރިމަތިވި މާލީ ގެއްލުމުގެ ބަދަލު ހޯދަން ކޯޓަށް ދާން ނިންމާފައެވެ.

ދާދި ފަހުން ލިޔޯންގެ ރައީސް ޖިއަން-މިކޭލް އައުލަސް ވިދާޅުވީ ފްރެންޗު ލީގު ކެންސަލް ކުރަން ނިންމި ނިންމުމަކީ ގޯސް ނިންމުމެއް ކަމަށާއި، އެ ނިންމުން ބަދަލުކުރަން ގޮވާލާ ކަމަށެވެ. އަދި އެލްއެފްޕީގެ ނިންމުން ބަދަލުކޮށް، ލީގު އަލުން ފަށާނެ ކަމުގެ އުންމީދު އަދިވެސް އެބައޮތް ކަމަށް ވިދާޅުވި އެވެ.

ފްރެންޗު ލީގު ކެންސަލް ކުރިއިރު، ތާވަލުގެ ފުލުގައި އޮތް ދެ ޓީމު ކަމަށްވާ އަމިއެންސް އާއި ޓުލޫސް ވަނީ ދެވަނަ ޑިވިޝަނަށް ރެލިގޭޓް ވެފައެވެ. އެހެންކަމުން އަމިއެންސުން އަންނަނީ ޓީމުތައް ރެލިގޭޓް ވުމަށް ނިންމި ނިންމުން ބަދަލުކުރުމަށްވެސް ޕެޓިޝަނެއް ހުށަހެޅުމަށް ތައްޔާރު ވަމުންނެވެ.

ޔޫރަޕްގެ ގަދަ ފަސް ލީގުގެ ތެރޭގައި ހިމެނޭ ފްރެންޗު ލީގު ކެންސަލް ކުރިއިރު، މީގެ ކުރިން ޗެމްޕިއަނެއް ކަނޑަނާޅައި ނެދަލެންޑްސް ފުޓްބޯޅަ ލީގު ވަނީ ކެންސަލް ކޮށްފައެވެ. ދެން ލީގުތައް ކެންސަލް ކުރަން މަސައްކަތް ކުރަމުން އަންނަނީ ބެލްޖިއަމް އާއި ސްކޮޓްލެންޑުންނެވެ.