ނޮވެލް ކޮރޯނާވައިރަސް (ކޮވިޑް-19) އާ ގުޅިގެން މެދުކަނޑާލާފައިވާ ޖަރުމަން ލީގު މިމަހުގެ 16 ވަނަ ދުވަހު ފަށަން ނިންމައިފިއެވެ.

ޖަރުމަން ލީގު މިމަހުގެ 16 ވަނަ ދުވަހު ފަށަން ނިންމީ ބުދަ ދުވަހު ޖަރުމަންގެ ޗާންސެލަރ އެންގެލާ މަރކެލް ލީގު އަލުން ފަށަން ހުއްދަ ދެއްވުމާއި ގުޅިގެންނެވެ. އެއާއެކު ބުރާސްފަތި ދުވަހު ޖަރުމަން ފުޓްބޯލް ލީގުން ވަނީ ހުރިހާ ކްލަބަކާއެކު ވީޑިއޯ ކޮންފެރެންސް މެދުވެރިކޮށް ބައްދަލުކޮށްފައެވެ. މި ބައްދަލުވުމުގައި ވަނީ މިމަހުގެ 16 ވަނަ ދުވަހު ލީގު އަލުން ފަށަން ނިންމާފައެވެ. އެހެންކަމުން ޖަރުމަން ލީގަކީ ކޮވިޑް-19 އާ ގުޅިގެން މެދުކަނޑާލި ލީގުތަކުގެ ތެރެއިން ކުޅުން އަލުން ފަށާނެ އެންމެ ފުރަތަމަ ލީގެވެ.

ޖަރުމަން ލީގު އަލުން ފަށާނީ ސަޕޯޓަރުން ނުވައްދައި މެޗުތައް ކުޅޭ ގޮތަށެވެ. ޖަރުމަން ލީގު އަލުން ފަށާ ތާރީޚު އިއުލާނު ކުރައްވަމުން ޖަރުމަން ފުޓްބޯލް ލީގުގެ ރައީސް ކްރިސްޓިއަން ސެއިފާޓް ވިދާޅުވީ މި މަހުގެ 16 ވާ ހޮނިހިރު ދުވަހު ލީގު އަލުން ފަށާއިރު، އެ ދުވަހު ހަ މެޗު ކުޅޭނެ ކަމަށެވެ. އަދި ލީގުގެ ފަހު މެޗު ޖޫން 28ގައި ކުޅޭނެ ކަމަށްވެސް ވަނީ ވިދާޅުވެފައެވެ.

ޖަރުމަން ލީގު އަލުން ފަށަން ނިންމިއިރު، މީގެ ކުރިން ޖަރުމަންގެ ފުރަތަމަ ޑިވިޝަނާއި ދެވަނަ ޑިވިޝަނުގެ ހުރިހާ ކުޅުންތެރިން ވަނީ ކޮވިޑް-19 އަށް ޓެސްޓުކޮށްފައެވެ. އެގޮތުން ދެ ޑިވިޝަނުން 1،724 ކުޅުންތެރިން ކޮވިޑް-19 އަށް ޓެސްޓު ކުރިއިރު، 10 ކުޅުންތެރިއަކު ވަނީ މި ވައިރަސްއަށް ޕޮޒިޓިވްވެފައެވެ. އަދި އޭގެ ކުރިން ކޮލޯންގެ ތިން ކުޅުންތެރިއަކުވެސް ވަނީ ކޮވިޑް-19 އަށް ޕޮޒިޓިވްވެފައެވެ.

ކޮވިޑް-19 އަށް ޕޮޒިޓިވްވި ކުޅުންތެރިން އައިސޮލޭޝަނަށް ބަދަލުކޮށްފައި ވާއިރު، ކްލަބުތަކުން އަންނަނީ ޖިސްމާނީ ގައިދުރުކަމުގެ ގަވާއިދުގެ ދަށުން ފަރިތަކުރުންތައް ކުރިއަށް ގެންދަމުންނެވެ. ދާދި ފަހުން ޖިސްމާނީ ގައިދުރުކަމުގެ ގަވާއިދާ ޚިލާފުވުމުން، ހާތާ ބާލިންގެ ފޯވާޑް ސަލޮމޮން ކަލޫ ވަނީ ސަސްޕެންޑް ކޮށްފައެވެ.

މިދިޔަ މާޗު މަހުގެ 13 ވަނަ ދުވަހު ޖަރުމަން ލީގުގެ ކުޅުން މެދުކަނޑާލިއިރު، އެންމެ ފަހުގެ ޗެމްޕިއަން ބަޔާން މިއުނިކް އޮތީ އެއްވަނައިގައި 55 ޕޮއިންޓާއެކު އެވެ. ދެވަނައިގައި އޮތް ބޮރޫޝިއާ ޑޯޓްމުންޑަށް 51 ޕޮއިންޓު ލިބިފައިވާއިރު، ތިންވަނައިގައި އޮތް އާރުބީ ލެއިޕްޒީގް އަށް ލިބިފައިވަނީ 50 ޕޮއިންޓެވެ.

ޖަރުމަން ލީގު އަލުން ފަށަން ނިންމިއިރު، ޖޫން މަހުގެ 12 ވަނަ ދުވަހު ތުރުކީ ލީގު އަލުން ފަށަން މިހާރު ވަނީ ނިންމާފައެވެ. އަދި ޖޫން މަހުގެ 6 ވަނަ ދުވަހު ކްރޮއެޝިއާ ލީގު ފަށަން އަންނަނީ މަސައްކަތް ކުރަމުންނެވެ.