ވިލިމާލެ ފެރީ ޓަރމިނަލް ޑިސްއިންފެކްޓްކޮށް ދަތުރުތައް ފަށަން ތައްޔާރަުވަނީ
7 މެއި 2020 | ބުރާސްފަތި 10:11ފެރީތައް ވެސް ޑިސްއިންފެކްޓް ކުރުމުގެ މަސައްކަތް ކުރޭ
ޑިސްއިންފެކްޓް ކުރުމުގެ މަސައްކަތުގެ ތެރެއިން
ވިލިމާލެ ފެރީ ޓަމިނަލާއި، ފެރީތައް ޑިސްއިންފެކްޓު ކުރުމަށްފަހު އަލުން ދަތުރުތައް ފަށަން މަސައްކަތް ކުރަމުންދާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބުނެފިއެވެ.
ވިލިމާލެ ފެރީ ޓަރމިނަލްގައި މަސައްކަތް ކުރަމުން އައި މުވައްޒަފަކު ކޮވިޑް-19 އަށް ޕޮޒިޓިވްވެފައިވާކަން ހާމަކުރީ ބުދަ ދުވަހުގެ ވަގުތެއްގައެވެ. އަދި އެވަގުތުން ފެށިގެން ދަތުރުތައް މެދުކަނޑާލައި، ޓާމިނަލްއާ ފެރީތައް ޑިސްއިންފެކްޓް ކުރުމުގެ މަސައްކަތް ފެށިއެވެ.
އެމްޓީސީސީން ބުނީ ދެ ޓަރމިނަލާއި ފެރީތައް ވެސް ޑިސްއިންފެކްޓުކޮށް އެޗްޕީއޭގެ ހުއްދައާއެކު އަލުން ދަތުރުތައް ފަށަން ތައްރާރުވަމުން އަންނަ ކަމަށެވެ.
މީގެ އިތުރުން އެމްޓީސީސީން ބުނީ އިމަރޖެންސީ ޙާލަތުގައި ދަތުރުތަކަށް ޚާއްޞަ ފެރީއަކުން ދަތުރުކުރެވޭ ގޮތް ހަމަޖައްސާފައިވާ ކަމަށެވެ. އެފެރީ ކައިރި ކުރާނީ ވިލިމާލެ ޓަރމިނަލާ ދުރަށް ބަނދަރުގެ އެހެން ދިމާލަކަށް ކަމަށް އެމްޓީސީން ބުނެއެވެ.
ވިލިމާލެ ފެރީ ޓަރމިނަލްގައި މަސައްކަތް ކުރަމުންއައި މުވައްޒަފަކު ކޮވިޑް-19އަށް ޕޮޒިޓްވެފައިތީ އެ ޓަރމިނަލުގައި މަސައްކަތް ކުރި ހަތް މުވައްޒަފަކު ވަނީ ކަރަންޓީނަށް ގެންގޮސްފައެވެ. އަދި މިހާރު އިސް ސަފުގައި މަސައްކަތް ކުރަން އިތުރު މުވައްޒަފުންތަކެއް ހަމަޖައްސާފައިވާ ކަމަށް އެމްޓީސީސީން ބުނެއެވެ.
މާލެ ފުރަބަންދުކުރުމާއި ގުޅިގެން ފެރީގެ ޚިދުމަތްތައް ހުއްޓާލިޔަސް ކުއްލި ޙާލަތެއްގައި ވިލިމާލެއަށް ދާން ބޭނުންވާ، ޞިއްޙީ ދާއިރާގައި މަސައްކަތްކުރާ ޑޮކްޓަރުންނާއި، ނަރުހުންނަށް ދަތުރުކުރެވޭނެ އިންތިޒާމު ހަމަޖައްސާފައިވާ ކަމަށެވެ.
ހުސްވި މަރޗް މަހު އެމްޓީސީސީން ކޮށްފައިވާ ދަތުރުތަކުގެ ތަފާސް ހިސާބުތަކަށް ބަލާއިރު، ގްރޭޓަރ މާލެ ޞަރަޙައްދުގައި 8،866 ދަތުރު ކޮށްފައިވާއިރު، އެ ދަތުރުތަކުގައި 490،600 މީހުން އުފުލާފައިވާކަމަށެވެެ.
