މަސްކިރަން ދިޔަ ދޯންޏެއްގެ ފަޅުވެރިޔަކު ހުޅުމާލެއަށް ފައިބައި، އަދި އަނބުރާ ރަސްދުއަށް ދިއުމުން ހައްޔަރުކޮށްފި
އެދޯނި ހުޅުމާލެއަށް ދިޔައީ މަސްކިރަން، އެމީހާ ވަނީ އެއް ރޭ ހުޅުމާލޭގައި ހުންނަ އޭނާގެ އާއިލާގެ ގޭގައި މަޑުކޮށްފައި
މާލޭގެ މަސްމާރުކޭޓް ސަރަހައްދު: މަސްދޯންޏަކުން މަސްވިއްކަނީ (ފައިލް ފޮޓޯ)
ހުޅުމާލެއައަށް މަސްކިރަން ދިޔަ އއ. ރަސްދޫ، މަސް ދޯންޏެއްގެ މީހަކު، ހުއްދަ ނެތި، ހުޅުމާލޭގައި ހުންނަ އޭނާގެ ޢާއިލާ މީހުން ދިރިއުޅޭ ގެއަކަށް ގޮސް، އަދި އަނބުރާ ރަސްދުއަށް ދިއުމުން ފުލުހުން އޭނާ ހައްޔަރުކޮށްފި އެވެ.
ފުލުހުން ބުނީ، އޭނާ ރަސްދުއަށް އަނބުރާ ދިޔައީ ހެލްތު ޕްރޮޓެކްޝަން އެޖެންސީ (އެޗްޕީއޭ) އަދި ރަސްދޫ ޓާސްކްފޯސްގެ ހުއްދަނެތި ކަމަށެވެ. އަދި މިކަމާގުޅިގެން ބުދަ ދުވަހު އެމީހާ ހައްޔަރު ކޮށްފައިވާ ކަމަށް ފުލުހުން ބުނެފައި ވެއެވެ. އަދި މިމައްސަލަ ތަޙުޤީޤު ކުރަމުންދާ ކަމަށްވެސް ފުލުހުންގެ އިދާރާއިން ބުނެއެވެ.
މަސްދޯނި ފަހަރަށް މަސް ކިރުމަށްޓަކައި ހުޅުމާލެއަށް ކައިރި ކުރެވުނު ނަމަވެސް، ކަމާބެހޭ ފަރާތްތަކުގެ ހުއްދަޔަކާ ނުލައި، ހުޅުމާލެއަށް ފޭބުމަކީ މަނާ ކަމެކެވެ. އަދި މާލެ ޞަރަޙައްދު ފުރަބަންދު ކޮށްފައިވާއިރު، އެއްރަށުން އަނެއް ރަށަށް ހުއްދަ ނެތި ދަތުރުފަތުރު ކުރުންވެސް ވަނީ މަނާކޮށްފައެވެ.
ކޮވިޑް-19ގެ ރޯގާ ރާއްޖޭގައި ފެތުރެން ފެށުމާއެކު، ކަމާބެހޭ ފަރާތްތަކުން ދަނީ ރައްކާތެރިކަމުގެ އެކިއެކި ފިޔަވަޅުތައް އަޅަމުންނެވެ. ކަމާބެހޭ ފަރާތްތަކުން ބުނާގޮތުން، ކުރިއަށް އޮތް ދެ ހަފުތާއަކީ ކޮވިޑް-19އަށް ވަރަށް ބޮޑަށް ރައްކާތެރިވެގެން ތިބެންޖެހޭ ދުވަސްތަކެކެވެ.
ކޮވިޑް-19 އަށް ރާއްޖެއިން 618 މީހަކު ވަނީ ޕޮޒިޓިވް ވެފައެވެ. ދެމީހަކު މަރުވެފައިވާއިރު، 20 މީހަކު ރަނގަޅު ވެފައިވެއެވެ.
