ޖަރުމަން ލީގު އަލުން ފެށުމުގެ ހުއްދަ ސަރުކާރުން ދީފި

މެދުކަނޑާލާފައިވާ ޖަރުމަން ލީގު އަލުން ފެށުމުގެ ހުއްދަ ޖަރުމަންގެ ސަރުކާރުން ދީފިއެވެ.

ނޮވެލް ކޮރޯނާވައިރަސް (ކޮވިޑް-19) ޖަރުމަންގައި ވަރަށް ބޮޑަށް ކޮންޓްރޯލް ކޮށްފައިވާއިރު، ޖަރުމަން ސަރުކާރުން މިހާރު އަންނަނީ ކޮވިޑް-19 އާ ގުޅިގެން އެ ގައުމުގައި މީހުން އެއްވެ އުޅުމުގައި ކަނޑައެޅި ހަރުކަށި ފިޔަވަޅުތަކަށް ލުއިތަކެއް ދެމުންނެވެ.

އެގޮތުން ބުދަ ދުވަހު ޖަރުމަންގެ ޗާންސެލަރ އެންގެލާ މާކެލް ވަނީ މި މަހުގެ 15 އިން ފެށިގެން ކުޅިވަރުތައް އަލުން ފެށުމުގެ ހުއްދަ ދީފައެވެ. އެއާއެކު މި މަހުގެ 15 ދުވަހު ލީގު އަލުން ފަށަން ޖަރުމަންގެ ފުޓްބޯޅަ ފެޑެރޭޝަނުން އަންނަނީ މަސައްކަތް ކުރަމުންނެވެ.

ޖަރުމަން ލީގު ފެށުމުގެ ހުއްދަ ދިންއިރު، މީގެ ކުރިން ޖަރުމަންގެ ފުރަތަމަ ޑިވިޝަނާއި ދެވަނަ ޑިވިޝަނުގެ ހުރިހާ ކުޅުންތެރިން ވަނީ ކޮވިޑް-19 އަށް ޓެސްޓުކޮށްފައެވެ. އެގޮތުން ދެ ޑިވިޝަނުން 1،724 ކުޅުންތެރިން ކޮވިޑް-19 އަށް ޓެސްޓު ކުރިއިރު، 10 ކުޅުންތެރިއަކު ވަނީ މި ވައިރަސްއަށް ޕޮޒިޓިވްވެފައެވެ. އަދި އޭގެ ކުރިން ކޮލޯންގެ ތިން ކުޅުންތެރިއަކުވެސް ވަނީ ކޮވިޑް-19 އަށް ޕޮޒިޓިވްވެފައެވެ.

ކޮވިޑް-19 އަށް ޕޮޒިޓިވްވި ކުޅުންތެރިން އައިސޮލޭޝަނަށް ބަދަލުކޮށްފައި ވާއިރު، ކްލަބުތަކުން އަންނަނީ ޖިސްމާނީ ގައިދުރުކަމުގެ ގަވާއިދުގެ ދަށުން ފަރިތަކުރުންތައް ކުރިއަށް ގެންދަމުންނެވެ. ދާދި ފަހުން ޖިސްމާނީ ގައިދުރުކަމުގެ ގަވާއިދާ ޚިލާފުވުމުން، ހާތާ ބާލިންގެ ފޯވަރޑް ސަލޮމޮން ކަލޫ ވަނީ ސަސްޕެންޑް ކޮށްފައެވެ.

ޖަރުމަން ލީގު އަލުން ފަށާނީ ސަޕޯޓަރުން ނުވައްދައި މެޗުތައް ކުޅޭ ގޮތަށެވެ. ރިޕޯޓުތައް ބުނާ ގޮތުން ޖަރުމަން ފުޓްބޯލް ފެޑެރޭޝަނުން އަންނަނީ ޖޫން މަހުގެ 30 ގެ ކުރިން ފުޓްބޯޅަ ސީޒަން ފުރިހަމަކުރަން މަސައްކަތް ކުރަމުންނެވެ.