ކޮންމެ ދިވެއްސަކަށް 5،000 ރުފިޔާ އާއި 10،000 ރުފިޔާއާ ދެމެދުގެ އިނާޔަތެއް ދިނުމަށް ގޮވާލައިފި

ކޮވިޑް-19 ގެ ސަބަބުން ޢާންމު ފަރުދުންގެ މާލީ ޙާލަތު ދަށަށްދާތީ ކޮންމެ ދިވެހި ފަރުދަކަށް ސަރުކާރުން 5000 ރުފިޔާ އާއި 10،000 ރުފިޔާ ދެމެދުގެ އިނާޔަތެއް ދިނުމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ މެންބަރު އިބްރާހިމް ރަޝީދު (ބޮންޑެ) ގޮވާލައްވައިފި އެވެ.

ކޮވިޑް -19 ރޯގާ ފެތުރުނަ ނުދިނުމަށް އަޅާ ފިޔަވަޅުތަކުގެ ސަބަބުން ޢާއިލާ ތަކާއި ވިޔަފާރިތަކުގެ ޢާމްދަނީއަށް އަންނަ ނުރަނގަޅު ބަދަލުތަކުން އަރައިގަތުމަށް، ސަރުކާރުން ހިންގުމަށް ނިންމާފައިވާ ޕްރޮގުރާމް ތަންފީޒު ކުރުމަށް މަޖިލީހުން ދެކޭގޮތް ކަނޑައެޅުމާ ގުޅޭ ގޮތުން ރައްޔިތުންގެ މަޖިލީހަށް ހުށަހެޅި މައްސަލާގައި މަޖިލީހުގެ އިޤުތިސާދީ ކޮމިޓިން ދިރާސާކޮށް އެކުލަވާލި ރިޕޯޓަށް ބަހުޘް ކުރައްވަމުން އިބްރާހީމް ރަޝީދު ވިދާޅުވީ ބައިނަލްއަޤުވާމީ އިޤުތިޞާދީ އަދި މާލީ އިދާރާތަކުގެ ލަފައާ އެއްގޮތަށް ޙަޤިޤަތުގައި މަސައްކަތް ނުކުރެވޭ ކަމަށެވެ. އެއިދާރާތަކުން ބުނެފައިވާ ގޮތުގައި އެންމެ ފުރަތަމަ އިސްކަމެއް ދޭން ޖެހެނީ ރައްޔިތުންގެ ފުރާނައާއި ޞިއްޙީ ރައްކާތެރިކަން ކަށަވަރު ކުރުމަށްކަމަށް އިބްރާހީމް ރަޝީދު ވިދާޅުވިއެވެ.

ދެން އިސްކަމެއް ދޭން ޖެހެނީ ރައްޔިތުންގެ ދިރިއުޅުން އާރާސްތުކޮށް ރައްކާތެރި ކުރުމަށް ކަމަށާއި އިޤްތިޞާދު އަލުން ބިނާކުރުމުގެ މަސައްކަތަކީ އޭގެ ފަހަށް ކުރަން އޮންނަ މަސައްކަތެއް ކަމަށް އިބްރާހީމް ރަޝީދު ވިދާޅުވިއެވެ.

މެންބަރ ވިދާޅުވީ ކޮވިޑް-19 ގެ އިޤްތިޞާދީ ހިނާރުކަމުގެ ޙާލަތު ނިމުމުން އަލުން އިޤްތިޞާދު އާރާސްތު ކުރާއިރު ސަރުކާރުން ތަޢާރަފު ކުރާ ޓެކްސްއެއް މެދުވެރިކޮށް އިނާޔަތް ދިނުމަށް ކުރި ހޭދަ އަލުން ހޯދޭނެ ކަމަށެވެ.

ކޮވިޑް-19 އާއި ގުޅިގެން ލިބޭ ގެއްލުންތަކެއް އަރައިގަތުމަށް ސަރުކާރުން ވަނީ 2.5 ބިލިއަން ރުފިޔާގެ އިކޮނޮމިކް ޕެކޭޖެއް ތަޢާރަފުކޮށްފަ އެވެ. އަދި މިޙާލަތުގައި ވަޒީފާ ގެއްލޭ ފަރާތްތަކާއި، ހަމަ މުސާރަ ނުދޭ އަދި މުސާރަނުލިބޭގޮތައް ފޮނުވާލާފައިވާ ފަރާތްތަކަށް ތިން މަސްދުވަހު ކޮންމެ މަހަކު 5000 ރުފިޔާގެ އިނާޔަތެއް ދިނުމަށް ވަނީ ނިންމާފައެވެ.