ބިދޭސީންގެ މައްސަލާގައި އިހުމާލުވި ފަރާތްތައް މަސައްކަތުން އެކަހެރިކޮށް، ތަހުގީގު ކުރަންޖެހޭ: ޝިޔާން

ރާއްޖޭގައި ޤަވާއިދާ ޚިލާފަށް އުޅޭ ބިދޭސީން މައްސަލަތަކުގައި އިހުމާލުވި ފަރާތްތައް މިހާރުވެސް އިމިގްރޭޝަނުގައި އެބަތިއްބެވިކަމަށާއި، އެފަރާތްތައް މަސައްކަތުން އެކަހެރިކޮށް، މިކަމުގެ އިހުމާލުވި ހުރިހާ ފަރާތްތަކެއްގެ މައްޗަށް ވީހާވެސް އަވަހަކަށް ތަހުޤީޤު ހިންގުމަށް ތޮއްޑޫ ދާއިރާގެ މެންބަރު ޙަސަން ޝިޔާން ގޮވާލައްވައިފި އެވެ.

ޤަވާއިދާ ޚިލާފަށް ދިވެހިރާއްޖޭގައި މަސައްކަތް ކުރަމުންދާ ބިދޭސީންގެ ސަބަބުން އިޖްތިމާޢީ، އިޤްތިޞާދީ އަދި ޤައުމީ ސަލާމަތަށް ނުރައްކާވާފަދަ ކަންކަން ފާހަގަކުރެވިގެން އެ މައްސަލަ ޤައުމީ ސަލާމަތާއި ޚާރިޖީ ގުޅުންތަކުގެ ކޮމިޓީން ދިރާސާކޮށް ނިންމިގޮތުގެ ރިޕޯޓަށް ބުދަ ދުވަހުގެ ރައްޔިތުންގެ މަޖިލީހުގެ ޖަލްސާގައި ބަހުޘް ކުރައްވަމުން ޝިޔާން ވިދާޅުވީ، ބިދޭސީން އެތެރެކޮށްފައިވަނީ، އިމިގްރޭޝަންގެ ސިސްޓަމް ތެރެއިން ކަމަށްވާތީ، އެކަން ކުރި ފަރާތްތައް ހޯދުމަކީ ކަމާބެހޭ އިދާރާތަކަށް ދަތިކަމަކަށް ނުވާނެކަމަށެވެ.

ޝިޔާން ވިދާޅުވީ ކޮމެޓީ ރިޕޯޓުގައިވާގޮތުން، ބިދޭސީން އެތެރެކުރުމަށް އިމިގްރޭޝަނުގައި ބޭނުންކުރާ އެކްސްޕެޓް ސިސްޓަމަކީ ނޭޝަނަލް ސެންޓަރ ފޮރ އިންފޮމޭޝަން ޓެކްނޮލޮޖީ (އެންސީއައިޓީ) ފޯރުކޮށްދިން ސިސްޓަމެއްކަން އެނގޭ ކަމަށެވެ. ނަމަވެސް އެ ސިސްޓަމުން ބަލާއިރު ގިނަ ފަރާތްތަކުގެ މަޢުލޫމާތު ނުހުންނަކަށް ފާހަގަ ކުރެވޭކަމަށެވެ.

ޝިޔާން ވިދާޅުވީ މިމައްސަލަތައް ވަރަށް ހަރުދަނާ ގޮތެއްގައި އަދި ވަރަށް ވިސްނުންތެރިކަމާއެކު ނުބެލިއްޖެނަމަ މުޅި މައްސަލައަށް ޙައްލެއް ނުގެނެވޭނެ ކަމަށެވެ. ޝިޔާން ވިދާޅުވީ، ރާއްޖޭގައި މިހާރުވެސް ބަރާބަރަށް ޑޮކިއުމަންޓް ހުރި، ޤަވާއިދާ އެއްގޮތަށް އުޅޭ ބިދޭސީންވެސް އުޅޭކަމަށާއި، އެހެންނަމަވެސް ވަކި ފަރާތެއްގެ ބެލުމުގެ ދަށުގައި ނެތް، ނުވަތަ ވުޖޫދުގައި ނުވާ ކުންފުނިތަކެއްގެ ނަންމަތީގައިވެސް ޤަވާއިދާ ޚިލާފަށް ގިނަ ޢަދަދެއްގެ ބިދޭސީން އުޅެމުންދާ ކަމަށެވެ.

ރާއްޖޭގައި ޤަވާއިދާ ޚިލާފަށް އުޅޭ ކަމަށް ކޮމެޓީ ރިޕޯޓުގައި ލަފާކޮށްފައިވަނީ 63،000 ބިދޭސީންނެވެ. ދައުލަތުގެ ކަމާބެހޭ އެއްވެސް އިދާރާއަކަށް ރާއްޖޭގައި އުޅޭ ބިދޭސީންގެ ސީދާ ޢަދަދު ނޭނގޭއިރު، ބައެއް ފަރާތްތަކުން ބުނަމުންދަނީ ޤަވާއިދާ ޚިލާފަށް ރާއްޖޭގައި 105،000 ބިދޭސީން އުޅެމުންދާ ކަމަށެވެ. އެހެންކަމުން ދެ ލައްކައާ ގާތްކުރާ ޢަދަދަކަށް ރާއްޖޭގައި ބިދޭސީން އުޅޭކަމަށް ބައެއް ފަރާތްތަކުން އަންދާޒާކުރެއެވެ.