ކަނބާލިފަރުގައި މަރުވި ބިދޭސީއެއް ކޮވިޑް-19 އަށް ޓެސްޓް ކުރަނީ
5 މެއި 2020 | އަންގާރަ 19:03އެމީހާގެ ހަށިގަނޑު މާލެއަށް ގެނައުމުގެ މަސައްކަތް ދަނީ ކުރަމުން
ނޫސްވެރިންގެ ބައްދަލުވުމުގައި ޓާސްކްފޯހުގެ ތަރުޖަމާނު މަބްރޫކު އަޒީޒް ވާހަކަދައްކަވަނީ
ކަނބާލިފަރުގައި މަރުވި ބިދޭސީއަކު ކޮވިޑް-19 އަށް ޓެސްޓް ކުރަން ނިންމާފައިވާ ކަމަށް ކޮވިޑް-19 ޓާސްކް ފޯހުން ބުނެފި އެވެ.
މިކަމާއި ގުޅޭގޮތުން އެންއީއޯސީގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޓާސްކް ފޯހުގެ ތަރުޖަމާނު މަބްރޫކް ވިދާޅުވީ، ކަނބާލިފަރުގައި އަންގާރަ ދުވަހު މަރުވި ބިދޭސީއެއްގެ މައްސަލަ ސަމާލުކަމަށް އައިސްފައިވާ ކަމަށެވެ. އަދި އެމީހާގެ ހަށިގަނޑު މާލެ ގެނައުމުގެ މަސައްކަތް ކުރަމުންދާ ކަމަށް މަބްރޫކް ވިދާޅުވި އެވެ.
މި ދުވަސްވަރު ގޮތް ނޭނގޭ މަރުތަކާ ގުޅިގެން ސާމްޕަލް ނަގާކަން ފާހަގަކުރައްވައި މަބްރޫކް ވިދާޅުވީ އެ ބިދޭސީ މީހާގެ ސާމްޕަލް ނަގާ ޓެސްޓް ކުރުމަށް ނިންމާފައިވާ ކަމަށެވެ. އެންމެ ފަހުން ކޮވިޑް-19 އާ ގުޅޭ މަރެއްގެ ގޮތުގައި ކަނޑައެޅުނީ މިހެން ޓެސްޓު ކުރެވުނު މީހެކެވެ. އޭނާއަކީ ކުރިން ޓެސްޓުކޮށްފައިވާ މީހެއް ނޫނެވެ.
