އަމިއްލަ ރަށުގައި ދަނޑުވެރިކަން ކުރެވެން ނެތް ފަރާތްތަކަށް ފަޅުރަށްތައް ކުރު މުއްދަތަކަށް ދޫކުރުމަށް ހުށަހަޅައިފި
މި ޙާލަތުގެ ސަބަބުން ލިބެމުންދާ އިޤްތިޞާދީ ގެއްލުމުން އަރައި ގަތުގެގޮތުން ކުރަންޖެހޭ މަސައްކަތްތައް ކުރުމުގައި އެލް.ޖީ.އޭގެ މާބޮޑު ދައުރެއް މިހާތަނަށް ނެތް
ރަށެއްގައި ހައްދާފައިވާ ކަރާ ދަނޑެއް
ބިމުގެ ދަތިކަމުގެ ސަބަބުން އަމިއްލަ ރަށުގައި ދަނޑުވެރިކަން ކުރެވެން ނެތް ފަރާތްތަކަށް، އެކަކަށްވުރެ ގިނަ މީހުންނަށް ދަނޑުވެރިކަން ކުރެވޭގޮތަށް ފަޅުރަށްތައް ކުރު މުއްދަތަކަށް ދޫކުރުމަށް ރައްޔިތުންގެ މަޖިލީހުގެ ލާމަރުކަޒީ ކޮމިޓީން ހުށަހަޅައިފި އެވެ.
އެކޮމިޓީން މިގޮތަށް ހުށަހަޅާފައިވަނީ ކޮވިޑް -19 ރޯގާ ފެތުރުނަ ނުދިނުމަށް އަޅާ ފިޔަވަޅުތަކުގެ ސަބަބުން ޢާއިލާ ތަކާއި ވިޔަފާރިތަކުގެ އާމްދަނީއަށް އަންނަ ނުރަނގަޅު ބަދަލުތަކުން އަރައިގަތުމަށް ، ސަރުކާރުން ހިންގުމަށް ނިންމާފައިވާ ޕްރޮގްރާމް ތަންފީޒު ކުރުމަށް މަޖިލީހުން ދެކޭގޮތް ކަނޑައެޅުމާ ގުޅޭ ގޮތުން ރައްޔިތުންގެ މަޖިލީހަށް ހުށަހެޅި މައްސަލަ އެކޮމިޓީން ދިރާސާކޮށް ނިންމުމަށްފަހު ހުށަހެޅި ރިޕޯޓްގަ އެވެ. މިރިޕޯޓް އަންގާރަ ދުވަހުގެ ޖަލްސާގައި ވަނީ ފާސްކޮށްފަ އެވެ. އެއީ ވޯޓުގައި ބައިވެރިވެ ވަޑައިގެންނެވި 54 މެމްބަރުންގެ ވޯޓުންނެވެ.
ކޮމިޓީން ދިރާސާކުރުމަށްފަހު ސަރުކާރުން ކާނާގެ ޔަޤީންކަން އިތުރު ކުރުމުގެ ގޮތުން ދަނޑުވެރިންނާ ގުޅިގެން އެސްޓީއޯއިން ފަށާފައިވާ މަސައްކަތްތަކާއި ގުޅޭގޮތުން ކަންތައްތަކެއް ވަނީ ހުށަހަޅާފަ އެވެ. އެގޮތުން ހުށަހަޅާފައިވާ ކަންކަމަކީ:
- މީހުން ދިރިއުޅޭ ގޭގޭގައިވާ ހުސް ޖާގާއިގައި ކާނާ ލިބޭ ދަނޑުވެރި ކަންކުރުމަށް ބާރު އެޅުމުގެގޮތުން ކުޑަ ޖާގައެއްގައި ކުރެވިދާނެ ދަނޑުވެރި ކަމާގުޅޭ މަޢުލޫމާތު އެލް.ޖީ.އޭ މެދުވެރިވެގެން ކައުންސިލްތަކުން ރައްޔިތުންނަށް ފޯރުކޮށްދިނުން
- ރަށްރަށުގައި ދަނޑުވެރިކަން ކުރުމަށް އެރަށަކުން ލިބެންހުރި ބިމުގެ ސަރަޙައްދުގެ ތަފާސް ހިސާބެއް ކައުންސިލްތަކުން ހަދައި އެލް.ޖީ.އޭއާއި ހިއްސާކޮށް، ވަގުތީގޮތުން ދަނޑުވެރިކަން ކުރުމަށް އެދޭ ފަރާތްތަކަށް ކައުންސިލްތައް މެދުވެރިކޮށް ބިން ދޫކުރުން
- ކާބޯތަކެތީގެ ރައްކާތެރިކަމަށް އިސްކަންދީގެން ދިވެހި އުފެއްދުންތަކާއި، ހުނަރުވެރިކަން، އިތުރުކުރުމަށްޓަކައި އެލް.ޖީ.އޭ މެދުވެރިކޮށް ތަމްރީނުތަކެއް ކުރިއަށް ގެންދިޔުން
- ދަނޑުވެރިކަމަށް މިހާރު ދޫކޮށްފައިވާ ރަށްތަކުގެ ބޭނުންކުރަނީ ދަނޑުވެރި ކަމަށްކަން ކަށަވަރުކުރުމުގެ ގޮތުން އެފަދަ ރަށްތަކުގެ ސާރވޭއެއް އަތޮޅު ކައުންސިލްތައް މެދުވެރިކޮށް ހަދައި، ދަނޑުވެރިކަމަށް ދޫކޮށްފައިވާ ރަށްތަކުގައި ދަނޑުވެރިކަން ކުރަމުންނުދާ ނަމަ އެރަށްތަކުގެ އެއްބަސްވުން މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ އިން ބާތިލުކުރުން
- ދަނޑުވެރިކަމަށް ބިން ދޫކުރުމުގެ މައިގަނޑު އެއް ބޭނުމަކީ ދިވެހިންނަށް މަސައްކަތުގެ ފުރުސަތުތަކާއި އާމްދަނީ ހޯދޭނެ ގޮތްތައް މަގުފަހި ކޮށްދިނުން ކަމުގައިވާތީ، ދަނޑުވެރިކަމަށް ދޫކުރާ ބިންތަކާއި ރަށްތަކުގައި އެ މަސައްކަތް ކުރަނީ ދިވެހިންކަން ކައުންސިލްތައް މެދުވެރިކޮށް ޔަޤީންކުރުން
މިކަންކަން ދިރާސާކުރުމަށްޓަކައި ލޯކަލް ގަވަރމަންޓް އޮތޯރިޓީއާ ކޮމިޓީން ވަނީ ބައްދަލުކޮށްފަ އެވެ. އެގޮތުން ބައްދަލުކޮށް ކުރެވުނު މަޝްވަރާގެ ތެރޭގައި ފާހަގަވެފައިވާ ކަންކަމުގެ ތެރޭގައި ދިމާވެފައިވާ މި ޙާލަތުގެ ސަބަބުން ލިބެމުންދާ އިޤްތިޞާދީ ގެއްލުމުން އަރައި ގަތުގެގޮތުން ކުރަންޖެހޭ މަސައްކަތްތައް ކުރުމުގައި އެލް.ޖީ.އޭގެ މާބޮޑު ދައުރެއް މިހާތަނަށް ނެތްކަން ވަނީ ފާހަގަކޮށްފަ އެވެ. އަދި އެކި އެކި ފަރާތްތަކުން ދަނޑުބިންތައް ހޯދުމަށް އެދި ހުށަހަޅަމުންދާކަމާއި، އަދި މިފަދަ ކަންކަމަށް އިސްކަންދީގެން ޕްލޭނެއްގެ ދަށުން މަސައްކަތްތަކެއް ކުރަމުން ނުދާކަމަށް ވަނީ ފާހަގަކޮށްފަ އެވެ.
މީގެއިތުރުން ރަށްރަށުގައި ހުރި ދަނޑުބިންތަކުގެ ތަފާސްހިސާބެއް ނެގުމުގެ ކަންކަން އެލް.ޖީ.އޭއިން ފަށާފައިވާކަމާއި އެކަން ކޮވިޑް-19ގެ ސަބަބުން ދިމާވެފައިވާ މި ޙާލަތާ ގުޅިގެން ހުއްޓިފައިވާކަމަށް ކޮމިޓީން ވަނީ ފާހަގަކޮށްފަ އެވެ.
