ގަވާއިދާ ހިލާފަށް އުޅޭ ބިދޭސީންގެ މައްސަލައަކީ އެއް ދުވަހަކުން ދެ ދުވަހަކުން ކުރިމަތިވި ކަމެއް ނޫން ކަމަށާއި، ބިދޭސީން ރާއްޖެއަށް ގެނައި ބަޔަކުވެސް ތިބޭނެ ކަމަށް ވިދާޅުވެ ރައީސް އިބްރާހިމް މުހައްމަދު ސޯލިހު ކަންބޮޑުވުން ފާޅުކުރައްވައިފިއެވެ.
ބިދޭސީންގެ މައްސަލާގައި ރައީސް ސޯލިހު ކަންބޮޑުވުން ފާޅުކުރެއްވީ ހޯމަ ދުވަހު ގައުމާ މުހާތަބު ކުރައްވާ ދެއްވި ހިތޯބުގައެވެ.
ރައީސް ސޯލިހް ވިދާޅުވީ ރާއްޖޭގައި މިހާރު "ކޯވިޑް-19" ފެތުރެމުންދާ ގޮތަށް ބަލާއިރު، މި ބަލި އެންމެ ބޮޑަށް ފެތުރިފައިވަނީ، އެއް ތަނެއްގައި ތޮއްޖެހިގެން ދިރިއުޅެމުން އައި ބިދޭސީންގެ މެދުގައިކަމަށެވެ. އަދި މި ބަލި ފެތުރުން ކޮންޓްރޯލް ކުރުމުގައި، ކުރިމަތިވާ އެންމެ ބޮޑު ދައްޗަކީ ވެސް އެއީ ކަމަށާއި، އެކަމަށް ހައްލެއް ހޯދުމަށް އަންނަނީ މަސައްކަތް ކުރަމުންކަމަށް ރައީސް ވިދާޅުވި އެވެ.
އެމަނިކުފާނު ވަނީ ގިނަ އަދަދެއްގެ ބިދޭސީންތަކެއް ރާއްޖޭގައި އުޅެމުންދާއިރު އެ މީހުން ގެނައި ބަޔަކުވެސް ރާއްޖޭގައި ތިބޭނެ ކަމަށް ވިދާޅުވެއް ސުވާލު އުފައްދަވާފައެވެ.
ގިނަ އަދަދެއްގެ ބިދޭސީންތަކެއް ވަންނާނެ ގެދޮރެއް، އާމްދަނީ ހޯދާނެ ވަޒީފާއެއް، އަދި ރަސްމީ ލިޔެކިޔުމެއް ނެތި، ރާއްޖޭގައި އުޅެމުންދާއިރު، ހަމަ ގައިމުވެސް އެމީހުން ރާއްޖެއަށް ގެނައި ބަޔަކު ތިބޭނެ. މިއީ އެއް ދުވަހަކުން ދެ ދުވަހަކުން ކުރިމަތިވި ކަމެއް ނޫން.އިބްރާހިމް މުހައްމަދު ސޯލިހު - ރައީސުލްޖުމްހޫރިއްޔާ
ބިދޭސީންގެ މައްސަލަތައް ހައްލުކުރުމަށް ކުރަމުން އަންނަ މަސައްކަތްތައް ފާހަގަކުރައްވާ ރައީސް ވިދާޅުވީ ގުޅިފަޅާއި، ހުޅުމާލެއާއި ވިލިވަރުގައި، ބިދޭސީން ބައިތިއްބާނެ ތަންތަން ހަދައި، ފުރަތަމަ ބުރުގައި، އެ ތަންތަނަށް 3000 މީހުން ބަދަލު ކުރުމުގެ މަސައްކަތް ކުރަމުން އަންނަ ކަމަށެވެ. އަދި ރާއްޖޭގައި ޤަވާޢިދާ ޚިލާފަށް އުޅޭ ބީދޭސީން އެމީހުންގެ ޤައުމުތަކަށް ފޮނުވުމުގެ މަސައްކަތް ވެސް މިއަންނަނީ ކުރަމުން އަންނަކަމަށް ރައީސް ވިދާޅުވި އެވެ.
އެ މޭރުމުން ވާހަކަފުޅު ކުރިއަށްގެންދަވަމުން ރައީސް ވިދާޅުވީ ބަނގްލަދޭޝް ސަރުކާރާ ވާހަކަ ދައްކައިގެން، އެ ޤައުމުގެ 1500 މީހަކު، އެ ޤައުމަށް ފޮނުވައިލުމުގެ މަސައްކަތް، ކުރިއަށް މިއޮތް ހަފުތާގެ ތެރޭގައި ފެށިގެންދާނެކަމަށެވެ.
ރައީސް ސޯލިހު އެހެން ވިދާޅުވެފައިމިވަނީ، މާލޭގައި ތޮއްޖެހިގެން ދިރިއުޅޭ ގިނަ އަދަދެއްގެ ބިދޭސީންގެ ކޮވިޑް-19 އަށް ޕޮޒިޓިވްވެފައި ވަނިކޮށެވެ. އެމީހުންގެ ތެރެއިން ގިނަ މީހުންނަކީ ބަންގަލަދޭޝް އަށް ނިސްބަތްވާ މީހުންނެވެ. މި މީހުންގެ ތެރެއިން ގިނަ އަދަދެއްގެ މީހުންނަކީ ޑެލިވަރީގެ އިތުރުން ފިހާރަތަކުގައި މަސައްކަތްކުރާ މީހުންނެވެ.
ކުރީގެ އެއްވެސް ސަރުކާރަކުން ބިދޭސީންގެ މައްސަލަ އަށް ހައްލެއް ގެނައުމަށް އެއްވެސް މަަސައްކަތެއް ކޮށްފައިނުވާއިރު، ރައީސް ސޯލިހުގެ ސަރުކާރުން ވަނީ ބިދޭސީން ގަވާއިދާ، ޤާާނޫނީ އިމުގެ ތެރެއަށް ވެއްދުމުގެ މަސައްކަތް ފަށާފައެވެ. އެގޮތުން މިހާތަނަށް ގަވާއިދާ ހިލާފަށް އުޅޭ 40،000 މީހުން ވަނީ އިކޮނޮމިކް މިނިސްޓްރީން ގާއިމްކޮށްފައިވާ ޕޯޓަލް ގައި ރަޖިސްޓްރީ ކޮށްފައެވެ.
