ކުރިއަށް އޮތް ދެ ހަފުތާގައި ކޮވިޑް-19 މިހާރަށް ވުރެ މައްޗަށް ދިޔުން އެކަށީގެންވޭ: ރައީސް
4 މެއި 2020 | ހޯމަ 13:11މި 2 ހަފްތާ ތެރޭގައި ކުރެވޭ މަސައްކަތްތަކުން، ބަލިން އަވަހަށް އަރައިގަތުމުގެ އުންމީދު ވަރަށް ބޮޑު
ރައީސް އިބްރާހިމް މުހައްމަދު ސޯލިހު
ރާއްޖޭގައި ކޮވިޑް-19 ގެ ޙާލަތު ވަޒަންކުރައްވާ ޞިއްޙީ ތަޖުރިބާކާރުން އަންދާޒާ ކުރައްވަނީ، ކުރިއަށް މިއޮތް ދެ ހަފުތާގެ ތެރޭގައި، މާލޭގައި މި ބަލީގެ ޙާލަތު، މިހާރަށް ވުރެ މައްޗަށް ދިޔުން އެކަށީގެންވާ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ކޮވިޑް-19 އާއި ގުޅިގެން ގައުމާއި މުހާތަބުކުރައްވާ ރައީސް ސޯލިހު ވިދާޅުވީ ކުރިއަށް މިއޮތް ދެ ހަފުތާއަކީ، އެންމެން ވެސް ވަރަށް ފަރުވާތެރިކަމާއި ވިސްނުންތެރިކަމާ އެކު މަސައްކަތް ކުރަންޖެހޭ ދެ ހަފުތާ ކަމަށެވެ. އަދި މި ދުވަސްކޮޅުގެ ތެރޭގައި ކުރެވޭ މަސައްކަތްތަކުން، މި ބަލިން އަވަހަށް އަރައިގަތުމުގެ އުންމީދު ވަރަށް ބޮޑު ކަމަށް ރައީސް ވިދާޅުވި އެވެ.
ރައީސް ވިދާޅުވީ ބައްޔަށް އިތުރު މީހުން މިވަގުތު ޕޮޒިޓިވް ވިޔަސް، މި ބަލި ފެތުރުން ހުއްޓުވުމަށް ކުރާ މަސައްކަތް، އިރާދަ ކުރެއްވީތީ ކޮންޓްރޯލުން ނެއްޓިގެނެއް ނުދާ ކަމަށެވެ. އަދި ޞިއްޙީ ޚިދުމަތްތެރިންގެ އުންމީދެއް ވެސް ގެއްލިވަޑައިނުގަންނަވާ ކަމަށް ރައީސް ވިދާޅުވި އެވެ. ރައީސް ވަނީ ސިއްހީ ހިދުމަތްތެރިންގެ އެހީތެރިކަމަށް ވެސް އެދިވަޑައިގެންފަ އެވެ.
ރައީސް ވިދާޅުވީ މާލޭގައި މިބަލި ކޮންޓްރޯލްކުރަން މަސައްކަތް ކުރާއިރު، އެހެން ރަށްރަށަށް މި ބަލި ފެތުރުނަ ނުދިނުމަށްވެސް، ޚާއްޞަ ސަމާލުކަމެއް އަޅުގަނޑުމެން ދޭން ޖެހޭ ކަމަށެވެ. އަދި އެއް ރަށުން އަނެއް ރަށަށް މީހުން ދަތުރުކުރުން މެދުކަނޑާލަން ޖެހުނީ އެ ސަބަބަށްޓަކައި ކަމަށާއި، ރަށްރަށުން މާލެ އަށް، އަދި މާލެއިން އެހެން ރަށްރަށަށް، މީހުން ދަތުރުކުރުން ހުއްޓާލަންޖެހުނީ ވެސް އެ ސަބަބަށްޓަކައި ކަމަށް ރައީސް ފާހަގަ ކުރެއްވި އެވެ. ރައީސް ވިދާޅުވީ މި ފިޔަވަޅުތަކުގެ ސަބަބުން ކިތަންމެ ގިނަ ދަތިތަކެއް ކުރިމަތި ވިޔަސް، މިފިޔަވަޅުތައް އަޅައިގެން ނޫނީ، ބަލި ކޮންޓްރޯލް ކުރެވެން ނެތްކަން، އެންމެންވެސް ޤަބޫލުކުރައްވާނެ ކަމަށެވެ.
ރައީސް ވަނީ ކުރައްވަމުން ގެންދަވާ މަސައްކަތުގައި ލޮބުވެތި ރައްޔިތުން މިހާތަނަށްވެސް ދެއްވަމުން އައި އެއްބާރުލެއްވުން، އެއަށް ވުރެވެސް ފުރިހަމައަށް ދެއްވުމަށް ގޮވާލައްވާފަ އެވެ. އަދި ޒަރޫރީ ބޭނުމެއްގައި ގެއިން ބޭރަށް ނުކުތަސް، އިޖްތިމާޢީ ގައިދުރުކަމަށް އިސްކަން ދެއްވައިގެން އުޅުއްވުމަކީ ވަރަށް މުހިންމު ކަމެއް ކަމަށާއި، ކޮވިޑަށް ޝައްކުކުރެވޭ އެއްވެސް ޢަލާމާތެއް ފެނިއްޖެ ނަމަ، ލަސް ނުކުރައްވައި، ކަމާ ބެހޭ ފަރާތްތަކަށް އެންގެވެމަށް ވެސް ރައީސް އެދިވަޑައިގެންނެވި އެވެ.
