ރާއްޖޭގައި ޤަވާޢިދާ ޚިލާފަށް އުޅޭ ބީދޭސީންގެ ތެރެއިން 1500 ބަންގްލަދޭޝް މީހުން ގައުމަށް ފޮނުވާލުމުގެ މަސައްކަތް ކުރިއަށް އޮތް ހަފްތާގައި ފެށިގެންދާނެ ކަމަށް ރައިސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެ އެވެ.

ހޯމަ ދުވަހު ގައުމާ މުޚާތަބު ކުރައްވާ ރައީސް ސޯލިހު ވިދާޅުވީ ބަންގްލަދޭޝް ސަރުކާރާ ވާހަކަ ދައްކައިގެން، އެ ޤައުމުގެ 1500 މީހަކު، ޤައުމަށް ފޮނުވައިލުމުގެ މަސައްކަތް، ކުރިއަށް އޮތް ހަފުތާގައި ފެށިގެންދާނެ ކަމަށެވެ.

ރައީސް ވިދާޅުވީ ގިނަ ޢަދަދެއްގެ ބިދޭސީންތަކެއް، ވަންނާނެ ގެދޮރެއް، އާމްދަނީ ހޯދާނެ ވަޒީފާއެއް، އަދި ރަސްމީ ލިޔެކިޔުމެއް ނެތި، ރާއްޖޭގައި އުޅެމުންދާއިރު، އެމީހުން ރާއްޖެއަށް ގެނައި ބަޔަކު ތިބޭނެ ކަމަށެވެ.

ކޮވިޑް-19 އާ ގުޅިގެން ތޮއްޖެހިން ދިރިއުޅޭ ބިދޭސީން އެހެންތަނަކަށް ބަދަލު ކުރުމުގެ މަސައްކަތް ސަރުކާރުން ވަނީ ފަށާފަ އެވެ. އެގޮތުން ބައެއް ބިދޭސީންތައް ވަނީ މިހާރު ގުޅީފަޅަށް ބަދަލުކޮށްފަ އެވެ. ކުރިޔަށް އޮތް ދުވަސްތަކުގައި އިތުރު ބިދޭސީންތަކެއް އެހެން ދިމަދިމާލަށް ބަދަލު ކުރުމުގެ މަސައްކަތް ދަނީ ކުރަމުންނެވެ.

މީގެ އިތުރުން، ހާލުގައި ޖެހިފައިވާ ބިދޭސީންނަށް އެހީތެރިކަން ފޯރުކޮށް ދިނުމަށް މޯލްޑިވްސް ރެޑް ކްރެސެންޓުންވަނީ ފަންޑެއްވެސް ހުޅުވާފަ އެވެ.

މާލެއިން މިހާތަނަށް ފެނުނު އެންމެ ބޮޑު އެއް ކްލަސްޓަރ އަކީވެސް ބިދޭސީންގެ ކްލްސްޓަރއެވެ. ރާއްޖެއިން ކޮވިޑް-19 އަށް ޕޮޒިޓިވްވި މީހުންގެ ތެރެއިން %50.8 މީހުންނަކީ ބަންގްލަދޭޝް އަށް ނިޞްބަތްވާ މީހުންނެވެ. އޭގެ ތެރެއިން ގިނަ މީހުންނަކީ ޤަވާއިދާ ޚިލާފަށް އުޅެމުންދާ މީހުންނެވެ.