އިންތިހާބު ބޭއްވެންދެން މިހާރު ތިބި ކައުންސިލަރުން ބޭތިއްބުމަށް ހުށަހެޅި ހާއްސަ ބިލު ބަލައިގެންފި
4 މެއި 2020 | ހޯމަ 09:37ޖޫން 3ގެ ނިޔަލަށް މިހާރު ތިބި ކައުންސިލްތަކުގެ ދައުރު ހަމަވާނެ
ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފް
މިހާރު ތިބި ކައުންސިލްތަކުގެ ދައުރު، ހަމަވިނަމަވެސް، ކައުންސިލްތަކުގެ އިންތިޚާބު ބޭއްވެންދެން މިހާރު ތިބި ކައުންސިލަރުން ބޭތިއްބުމަށް ރައްޔިތުންގެ މަޖިލީހަށް ހުށަހަޅާފައިވާ، ޚާއްޞަ ބިލު މަޖިލީހުން ބަލައިގަތުމަށް ފާސްވެއްޖެއެވެ.
ހޯމަ ދުވަހުގެ ޖަލްސާގައި މި ބިލު ބަލައިގަތުމަށް ވޯޓުދެއްވީ ރައްޔިތުންގެ މަޖިލީހުގެ 53 މެމްބަރުންނެވެ. މި ބިލު ބަލައިގަތުމަށް ނުފެންނަ ކަމަށް ވޯޓުދެއްވީ 6 މެމްބަރުންނެވެ. ނުފެންނަ ކަމަށް ވޯޓުދެއްވީ މާވަށު ދާއިރާގެ މެމްބަރު މުހައްމަދު ސައީދުއާއި ގުރައިދޫ ދާއިރާގެ މެމްބަރު މުހައްމަދު ގައްސާން ގެ އިތުރުން ނިލަންދޫ ދާއިރާގެ މެމްބަރު އަބްދުލް މުހުސިން ހަމީދުއެވެ. އަދި ނޮޅިވަރަމް ދާއިރާގެ މެމްބަރުވެސް ވަނީ ބިލު ބަލައިގަންނަން ނުފެންނަ ކަމަށް ވޯޓުދެއްވާފައެވެ. އެއް މެމްބަރަކު ވަކި ގޮތަކަށް ނުފެންނަ ކަމަށް ވެސް ވޯޓުދެއްވިއެވެ. އެގޮތަށް ވޯޓު ދެއްވީ މަޑުއްވަރި ދާއިރާގެ މެމްބަރު އާދަމް ޝަރީފްއެވެ.
"ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުން ކަށަވަރު ކުރުމުގެ ޚާއްޞަ ބިލް 2020" ހޯމަ ދުވަހުގެ ޖަލްސާއަށް ހުށަހަޅުއްވައިދެއްވީ ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު ޙަސަން ލަޠީފްއެވެ.
މިބިލަކީ، މިހާރު ހިނގަމުންދާ ކައުންސިލްތަކުގެ ދައުރު އަންނަ ޖޫން މަހުގެ 3 ވަނަ ދުވަހުގެ ނިޔަލަށް ހަމާވާތީ، ކައުންސިލްތައް ޤާނޫނީ ހުސްކަމެއް، ނުވަތަ، އިދާރީ ދާއިރާތައް ލާމަރުކަޒީ އުޞޫލުން ހިންގުމަށް ޤާނޫނީ ހުސްކަމެއް އަންނާތީ، އެކަމަށް ޤާނޫނީ ފަރުވާއެއް ހޯދުމަށް ހުށަހަޅާފައިވާ ޚާއްޞަ ބިލެކެވެ.
މިބިލުގެ މައިގަނޑު މަޤްޞަދަކީ ޖޫން މަހުގެ 3 ގެ ފަހުން، އަދި ކައުންސިލްތަކުގެ އިންތިޚާބު ބޭއްވި، ކައުންސިލަރުން މަޤާމާ ހަވަލުވުމާހަމައަށް، މިހާރު ހިނގަމުންދާ ކައުންސިލަރުން ބޭއްތިއްބުމަށް ހުށަހަޅާފައިވާ ޚާއްސަ ބިލެކެވެ.
