ކައުންސިލްތަކުގެ އިންތިހާބު ބޭއްވެންދެން މިހާރު ތިބި ކައުންސިލަރުން ބޭތިއްބުމަށް ހުށަހެޅި ހާއްސަ ބިލުގެ ބަހުސް!

މިހާރު ތިބި ކައުންސިލްތަކުގެ ދައުރު، ހަމަވިނަމަވެސް، ކައުންސިލްތަކުގެ އިންތިޚާބު ބޭއްވެންދެން މިހާރު ތިބި ކައުންސިލަރުން ބޭތިއްބުމަށް ރައްޔިތުންގެ މަޖިލީހަށް ހުށަހަޅާފައިވާ، ޚާއްޞަ ބިލު މަޖިލީހުގެ ތަޅުމަށް ހުށަހަޅާއި ބަހުސް ފަށައިފިއެވެ.

ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު ޙަސަން ލަޠީފް ހުށަހަޅުއްވާފައިވާ، "ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުން ކަށަވަރު ކުރުމުގެ ޚާއްޞަ ބިލް 2020" ހޯމަ ދުވަހުގެ ޖަލްސާއަށް ވަނީ ހުށަހަޅާފައެވެ.

Advertisement

ހޯމަ ދުވަހުގެ ޖަލްސާއަށް މި ބިލު ހުށަހަޅުއްވަމުން ޙަސަން ލަޠީފް ވިދާޅުވީ، މި ބިލަކީ ޤާނޫނުއަސާސީއާ ޚިލާފު ބިލެއް ކަމަށް ޤަބޫލު ނުކުރައްވާ ކަމަށާއި، ލޯކަލް ކައުންސިލްތަކުގެ އިންތިޚާބު ނުބޭއްވިއްޖެ ޙާލަތެއްގައި ދެން ޢަމަލު ކުރާނެ ގޮތެއް ޤާނޫނުއަސާސީގައި ބަޔާން ކޮށްފައި ނުވާ ކަމަށެވެ. އަދި މިޙާލަތުގައި ޤާނޫނުއަސާސީއަށް އިޞްލާޙު ގެނައުމަކީ ކުރަން ހެޔޮވާވަރުގެ ކަމެއް ނޫންކަމާއި، ރާއްޖެއަށް މިހާރު ދިމާވެފައިމިވާ ޙާލަތަކީ ޤާނޫނުއަސާސީއަށް އިޞްލާޙު ގެނެވޭނެ ޙާލަތެއްކަމަށް ޤަބޫލު ނުކުރައްވާ ކަމަށް ވެސް ޙަސަން ލަޠީފް ވިދާޅުވިއެވެ.

ޙަސަން ލަޠީފް ވިދާޅުވީ، ޤާނޫނުއަސާސީގައި ބުނަނީ، ސިއްރު ވޯޓަކުން އިންތިޚާބު ކުރެވޭ ކައުންސިލްތަކަކުން އިދާރާ ދާއިރާތައް ހިންގުން ކަމަށެވެ. ނަމަވެސް މިހާރު ކުރިއަށްދާ ކައުންސިލްތަކުގެ ދައުރު ޖޫން މަހުގެ 3 ވަނަ ދުވަހަށް ހަމަވާއިރު، ކައުންސިލްތަކުގެ އިންތިޚާބު ބޭއްވޭނެ ޙާލަތެއް ނެތްކަމަށްވާއިރު، އަދި އަމުދުން ސިއްރު ވޯޓަކުން އިންތިޚާބު ކުރެވޭ ކައުންސިލަރުންތަކެއް އިންތިޚާބު ކުރެވެން ނެތް ޙާލަތެއް ރާއްޖެއަށް ކުރިމަތިވެފައިވާތީ، މިބިލުން ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމަށް ފުރުޞަތު ލިބިގެންދާނެ ކަމަށެވެ.

ޙަސަން ލަޠީފް ވިދާޅުވީ، ޤާނޫނުއަސާސީގެ މަފްޙޫމަކީ، ރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުކަމަށްވާއިރު، މިހާރު ތިބި ކައުންސިލަރުން، ކައުންސިލްތަކުގެ އިންތިޚާބު ބޭއްވެންދެން ބޭއްތިއްބުމަކީ ކުރެވިދާނެ ކަމެއްކަމަށް ޤަބޫލު ކުރައްވާކަމަށެވެ. އަދި މިހާރު ތިބި ކައުންސިލަރުން އިންތިޚާބު ކޮށްފައިވަނީ، ތިން އަހަރަކަށް ކަމަށްވިޔަސް، ޤާނޫނުއަސާސީގެ އެމާއްދާ ވަރަށް ފަހުން އިޞްލާޙުކޮށް، ކައުންސިލްތަކުގެ ދައުރު 5 އަހަރަށް ބަދަލުކޮށްފައިވާކަމަށެެވެ. އެހެންކަމުން މިހާރު ތިއްބެވި ކައުންސިލަރުން، ކައުންސިލްތަކުގެ އިންތިޚާބު ބޭއްވެންދެން ބޭތިއްބުމަކީ ކުރެވިދާނެ ކަމެއްކަމަށް ޤަބޫލު ކުރައްވާ ކަމަށްވެސް ޙަސަން ލަޠީފް ވިދާޅުވިއެވެ.

މިބިލަކީ، މިހާރު ހިނގަމުންދާ ކައުންސިލްތަކުގެ ދައުރު އަންނަ ޖޫން މަހުގެ 3 ވަނަ ދުވަހުގެ ނިޔަލަށް ހަމާވާތީ، ކައުންސިލްތައް ޤާނޫނީ ހުސްކަމެއް، ނުވަތަ، އިދާރީ ދާއިރާތައް ލާމަރުކަޒީ އުޞޫލުން ހިންގުމަށް ޤާނޫނީ ހުސްކަމެއް އަންނާތީ، އެކަމަށް ޤާނޫނީ ފަރުވާއެއް ހޯދުމަށް ހުށަހަޅާފައިވާ ޚާއްޞަ ބިލެކެވެ. މިބިލުގެ މައިގަނޑު މަޤްޞަދަކީ ޖޫން މަހުގެ 3 ގެ ފަހުން، އަދި ކައުންސިލްތަކުގެ އިންތިޚާބު ބޭއްވި، ކައުންސިލަރުން މަޤާމާ ހަވަލުވުމާހަމައަށް، މިހާރު ހިނގަމުންދާ ކައުންސިލަރުން ބޭއްތިއްބުމަށާއި ޤާނޫނުއަސާސީގައި ރާއްޖެ ހިންގަންޖެހޭނީ ލާމަރުކަޒީ އުޞޫލުންކަމަށްބުނާތީ، އެ މަފްޙޫމް ދެމެހެއްޓުމަށްޓުމުގެ މަޤްޞަދުގައި ހުށަހަޅާފައިވާ ޚާޢްޞަ ބިލެކެވެ.

މިބިލަށް ބައެއް މެންބަރުން ދެކޮޅު ހެއްދެވިއެވެ. ދެކޮޅު ހެއްދެވި މެންބަރުން ވިދާޅުވަނީ، މިބިލު މިހާރު މިއޮތްގޮތަށް ބަލާނަމަ ޤާނޫނުއަސާސީއާއި ޚީލާފުކަމަށެވެ.

ޙަސަން ލަޠީފަކީ ގާނޫނުއަސާސީ ޑްރާފްޓް ކުރުމުގައި އުޅުއްވި، ޤާނޫނީ ވަކީލެކެވެ.