ދިރާގު އަދި އުރީދޫއަށް މިނިސްޓަރ ފައްޔާޒްގެ އެދިލެއްވުން: ބިލް ނުދެއްކުނަސް ހިދުމަތް ކަނޑާނުލާ!
ބިލް ނުދެއްކޭ ފަރާތްތަކަށް ހިދުމަތް މެދުކަނޑާނުލައްވާ
މިނިސްޓަރ ފައްޔާޒް
ކޮވިޑް-19ގެ ސަބަބުން މާލީ ޙާލަތު ގޯސްވެފައިވާ ފަރާތްތަކަށް ބިލުތައް ނުދެއްކުނަސް ހިދުމަތް މެދުކަނޑާނުލުމަށް އިކޮނޮމިކް މިނިސްޓަރ ފައްޔާޒް އިސްމާއިލް ވިދާޅުވެއްޖެއެވެ.
ޓްވިޓަރގައި މުވާސަލާތީ ހިދުމަތް ދޭ ކުންފުނިތަކުން ބިލު ނުދެއްކޭ ފަރާތްތަކުގެ ޚިދުމަތް މެދުކަނޑާލާކަމަށާއި، އެ ބިލުތައް ފަހުން ދެއްކޭނެ އިންތިޒާމު ހަމަޖެއްސޭނެގޮތެއް އޮތްތޯ އިކޮނޮމިކް މިނިސްޓަރ ޓެގްކޮށް މީހަކު ކުރި ޓްވީޓަކަށް ޖަވާބު ދެއްވަމުން މިނިސްޓަރ ވަނީ އެ މީހާ ފާޅުކުރި ޚިޔާލަށް ތާއީދުކުރައްވާފަ އެވެ.
އެގޮތުން، އިންޓަނެޓަށް ބަރޯސާވުން އިތުރުވެފައިވާ މި ދަނޑިވަޅުގައި ދިރާގު އަދި އުރީދޫއިން ކަސްޓަމަރުންނަށް ދެމުންދާ ޚީދުމަތަށް ޝުކުރު ދަންނަވައި މިނިސްޓަރ ވިދާޅުވީ، މި ދަނޑިވަޅުގައި ބިލުތައް ނުދެއްކުނަސް ޚިދުމަތް މެދުކަނޑާނުލުމަށް އެދޭކަމަށެވެ.
ކޮވިޑް-19 ރާއްޖެއިން ފެނުމާއި ގުޅިގެން ބަލި ކޮންޓްރޯލް ކުރުމަށް އަޅާފައިވާ ފިޔަވަޅުތަކުގެ ސަބަބުން އިޤުތިޞާދަށް އަންނަނީ ބޮޑެތި އަސަރުތަކެއް ކުރަމުންނެވެ. އެގޮތުން ވިޔަފާރިތަކަށް ލިބިފައިވާ ގެއްލުމުމުގެ ސަބަބުން ގިނަ ޢަދަދެއްގެ ދިވެހިންގެ ވަޒީފާ ވަނީ ގެއްލިފަ އެވެ.
