އެޕްރީލް 8 ގެ ފަހުން އާދީއްތަ ދުވަހަކީ އެންމެ މަދުން ވެންޓިލޭޓަރު ބޭނުންކުރި ދުވަސް: ޖޯރޖިއާ ގަވަރުނަރު

މިދިޔަ އެޕްރީލް މަހުގެ 8 ވަނަ ދުވަހުގެ ފަހުން އާދީއްތަ ދުވަހަކީ ޖޯރޖިއާގައި ކޮވިޑް-19 ގެ ބަލިމީހުންނަށް ފަރުވާ ދިނުމަށް އެންމެ މަދުން ވެންޓިލޭޓަރު ބޭނުންކުރަން ޖެހުނު ދުވަސް ކަމަށް އެޤައުމުގެ ގަވަރުނަރު ބްރާޔަން ޕީ ކެމްޕް ވިދާޅުވެއްޖެއެވެ.

ޖޯރޖިއާގައި މިހާތަނަށް 28،000ށް ވުރެ ގިނަ މީހުން ވަނީ ކޮވިޑް-19 އަށް ޕޮޒިޓިވްވެފައެވެ. އަދި 1100 ށް ވުރެ ގިނަ މީހުން އެޤައުމުން ވަނީ މަރުވެފައެވެ.

އެޕްރީލް 8 ގެ ފަހުން އެޤައުމުގެ ހޮސްޕިޓަލްތަކުން އަންނަނީ ވެންޓިލޭޓަރު ބޭނުންކުރަމުން އަންނަ ވަރުގެ ތަފާސް ހިސާބުތައް ހާމަކުރަމުންނެވެ. އާދީއްތަ ދުވަހު 946 ވެންޓިލޭޓަރު ފަރުވާ ދިނުމަށް ބޭނުންކޮށްފައިވާ އިރު، މިއީ އެޕްރީލް 8 ގެ ފަހުން އެންމެ މަދުން ވެންޓިލޭޓަރު ބޭނުން ކުރި ދުވަސް ކަމަށް ކެމްޕް ވަނީ ވިދާޅުވެފައެވެ. އަދި އެޤައުމުގައި 2880 ވެންޓިލޭޓަރު ހުރި އިރު އޭގެ ތެރެއިން 1916 ވެންޓިލޭޓަރު އަދި ފަރުވާ ދިނުމުގައި ބޭނުން ނުކުރާކަމަށް ވެސް އޭނާ ކުރެއްވި ޓްވީޓެއްގައި ވިދާޅުވެފައެވެ.

28،000 އަށްވުރެ ގިނަ މީހުންނަށް ޖޯރޖިއާގައި ކޮވިޑް-19 ޖެހިފައިވާ އިރު، އެޤައުމުގެ ޑިޕާރޓްމަންޓް އޮފް ޕަބްލިކް ހެލްތުން ބުނެފައިވަނީ 5400 ށް ވުރެ ގިނަ މީހުންނަށް އެނދުމަތިކޮށްގެން ފަރުވާ ދެމުން އަންނަކަމަށެވެ.