ސާމްޕަލް ނަގާ "ކިއޮސްކް" ތަކެއް ދިރާގުން ހަދިޔާ ކޮށްފި
15 ކިއޮސްކް ވަނީ ހަދިޔާ ކޮށްފައި
ދިރާގުން ހަދިޔާކުރި ކިއޮސްކްގެ ތެރެއިން ކިއޮސްކެއްގައި މީހެއްގެ ސާމްޕަލް ނަގަނީ
ކޮވިޑް-19 ބަލީގެ ސާމްޕަލް ނެގުމަށް ޚާއްޞަކޮށްފައިވާ "ސާމްޕްލިންގ ކިއޮސްކް" ތަކެއް ދިރާގުން މިނިސްޓްރީ އޮފް ހެލްތަށް ހަދިޔާކޮށްފިއެވެ.
ހެލްތ މިނިސްޓްރީން ބުނީ މި ކިއޮސްކްތަކަކީ ސާމްޕަލް ނަގާ ހެލްތު އޮފިޝަލާއި، ބަލިމީހާއާއި ގައިދުރުކަން ބަހައްޓައިގެން ސާމްޕަލް ނެގޭގޮތަށް ފަރުމާކޮށްފައިވާ ކިއޮސްކްތަކެއްކަމަށެވެ. މީގެ ސަބަބުން ބަލިމީހުންގެ ގައިން ސާމްޕަލް ނަގާ ހެލްތު އޮފިޝަލުންގެ ރައްކާތެރިކަން އިތުރަށް ޔަޤީންކުރެވިގެންދާނެކަމަށްވެސް ހެލްތު މިނިސްޓްރީން ބުނެއެވެ.
ދިވެހިރާއްޖޭގެ ކުންފުންޏެއް ކަމަށްވާ ޕްރިންޓް ލެބްގެ ފަރާތުން ޑިޒައިންކޮށްފައިވާ 15 ކިއޮސްކް ދިރާގުން ވަނީ މިނިސްޓްރީ އޮފް ހެލްތަށް ހަދިޔާކޮށްފައެވެ. މިކިއޮސްކްތައް ބޭނުންކުރަން ހަމަޖެހިފައިވަނީ މާލެ ޞަރަޙައްދުގެ އިތުރުން ރާއްޖޭގެ އިތުރު ފަސް ޞަރަޙައްދުތަކެއްގައި ކަމަށް ހެލްތު މިނިސްޓްރީން ބުނެއެވެ.
ދިރާގުން ހަދިޔާކުރި މިކިއޮސްކްތަކުގެ ސަބަބުން ކޮންމެ ސާމްޕަލެއް ނެގުމަށް ބޭނުންކުރާ ޕީޕީއީ ބޭނުންކުރަންޖެހޭ މިންވަރު މަދުވެ، ޕީޕީއީ ހޯދުމަށް އިތުރު ލުއިކަމެއް ލިބިގެންދާނެ ކަމަށް ހެލްތު މިނިސްޓްރީން ބުނެއެވެ.
