ޗައިނާއިން 16 ގައުމަކަށް މެޑިކަލް ޓީމުތަކެއް ފޮނުވައިފި

ޤައުމުތަކުގައި ކޮވިޑް-19 ފެތުރުން ކޮންޓްރޯލް ކުރުމުގައި އެހީވުމަށް ޗައިނާއިން 16 ޤައުމަކަށް ޞިއްޙީ ޚިދުމަތްތެރިންގެ ޓީމުތަކެއް ފޮނުވައިފިއެވެ.

ޗައިނާގެ ދައުލަތުގެ މީޑިއާއަށް ދެއްވި ބަސްދީގަތުމެއްގައި ޗައިނާގެ ނެޝަނަލް ހެލްތު ކޮމިޝަންގެ ތަރުޖަމާނު މީ ފެންގް ވިދާޅުވީ ކޮވިޑް-19 ފެތުރުން ކޮންޓްރޯލް ކުރުމުގައި އެހީވުމަށް ޗައިނާއިން 16 ޤައުމަކަށް ފޮނުވި ޓީމުތަކުގައި 149 ޞިއްޙީ މާހިރުން ފޮނުވާފައިވާކަމަށެވެ.

މީ ވިދާޅުވީ ކޮވިޑް-19 އާއި ދެކޮޅަށް އެހެން ޤައުމުތަކުން ކުރާ މަސައްކަތަށް ކުރިއަށް އޮތްްތަނުގައި ޗައިނާއިން އެހީތެރިވާނެ ކަމަށެވެ.

ޗައިނާގައި މިހާތަނަށް ރިޕޯޓުކޮށްފައިވަނީ 82,877 ކޭސްއެވެ. މި ބަލި ޖެހުނު މީހުންގެ ތެރެއިން 77,713 މީހުންވަނީ ބަލިން ފަސޭހަވެފައެވެ.

ކޮވިޑް-19 ކޮންޓްރޯލް ކުރުމުގައި ޗައިނާއިން ވަނީ ބޮޑެތި ކުރިއެރުންތަކެއް ހޯދާފައެވެ. އެގޮތުން އެންމެ ފުރަތަމަ މި ވައިރަސް ފެނުނު ޗައިނާގެ ހޫބޭ ޕްރޮވިންސްގެ ވޫހާން ސިޓީން މި ބަލި ވަނީ އެއްކޮށް ނައްތާލާފައެވެ. ހޮނިހިރު ދުވަހު ޗައިނާ އިން ރިޕޯޓުކޮށްފައިވަނީ އެންމެ އާ ކޭސްއެކެވެ.

ދުނިޔޭގެ ޞިއްޙަތު ޖަމްޢިއްޔާ ޑަބްލިއުއެޗްއޯ އިން ވެސް ވަނީ ބަލި ކޮންޓްރޯލް ކުރުމުގައި ޗައިނާއިން ހޯދާފައިވާ ކުރިއެރުމަށް މަރުޙަބާ ކިޔާފައެވެ.