ނޫސްވެރިންގެ މަސައްކަތްތައް ބައްޓަންކުރަންވީ ކޮވިޑުން ސަލާމަވްވުމަށް ކުރެވޭ މަސައްކަތާ އެއް މިސްރާބަކަށް: މަރިޔަމް ވަހީދާ
މި އަހަރުގެ ޝިއާރަކީ ބިރުވެރިކަމެއް ނުވަތަ ވަކި ފަރާތަކަށް ބުރަވުމެއް ނެތި ކުރެވޭ ނޫސްވެރިކަން
ރާއްޖެޓީވީގެ ނޫސްވެރިން
ކޮވިޑް-19 ގެ ބަލިމަޑުކަން ފެތުރެމުންދާ މި ދަނޑިވަޅުގައި ނޫސްވެރީންގެ މަސައްކަތްތައް ވެސް ބައްޓަންކުރަންޖެހިފައި މި ވަނީ މި ވަބާއިން އިންސާނިއްޔަތު ސަލާމަތްކުރުމަށް ކުރެވޭ މަސައްކަތްތަކާ އެއް މިޞްރާބަކަށް ކަމަށް ބްރޯޑްކާސްޓިން ކޮމިޝަންގެ ރައީސާ މަރިޔަމް ވަހިދާ ވިދާޅުވެއްޖެއެވެ.
މަރިޔަމް ވަހީދާ މިހެން ވިދާޅުވީ ދުނިޔޭގެ ނޫސްވެރިކަމުގެ މިނިވަންކަމުގެ ދުވަހުގެ މުނާސަބަތުގައި ދެއްވި މެސެޖްގައެވެ. އެނާ ވިދާޅުވީ މި އަހަރުގެ މި ދުވަސް ކުރިމަތިލަނީ އިންސާނީ ޙަޔާތުގައިވެސް މީގެ ކުރީން ކުރިމަތިވެފައި ނުވާ ފަދަ ބޮޑު ބަލިމަޑުކަމެއް މުޅި ދުނިޔެ ތަޙައްމަލުކުރަމުންދާ ނާޒުކު ދަނޑިވަޅެއްގައި ކަމަށެވެ. އެހެންކަމުން، ނޫސްވެރީންގެ މަސައްކަތްތައް ވެސް މި ދުވަސްވަރު ބައްޓަންކުރަންޖެހިފައި މި ވަނީ މި ވަބާއިން އިންސާނިއްޔަތު ސަލާމަތްކުރުމަށް ކުރެވޭ މަސައްކަތްތަކާ އެއް މިޞްރާބަކަށް ކަމަށެވެ.
އަދި ރާއްޖޭގައި ވެސް ކޮވިޑް-19ގެ ބަލިމަޑުކަން ފެތުރެމުންދާއިރު ނޫސްވެރިންނަށް މިނިވަންކަމާއެކު މި ކަމުގެ ޚަބަރާއި މަޢުލޫމާތު ފެތުރުމަށް ފަހި ފުރުޞަތުތަކެއް ތަނަވަސްވެފައިވީ ނަމަވެސް، އެ ފުރުޞަތުގެ ބޭނުން ކުރަންވާނީ މި ކަމުގެ ޞައްޙަ މަޢުލޫމަތު ކަމާބެހޭ އިދާރާތަކުން ކަށަވަރުކުރުމަށް ފަހުގައިކަން މެސެޖުގައި ވިދާޅުވެފައިވެއެވެ. އަދި ދުނިޔޭގެ ސައެންޓިފިކް ކޮމިއުނިޓީއިން ރިސާޗްކޮށް ހާމަކުރާ މި ބަލީގެ އެންމެ ފަހުގެ މަޢުލޫމާތަށް ބުރަވެ ނޫސްވެރިކަން މި ދާއިރާގައި ފުޅާކުރުމަކީ މުހިއްމުކަމެއްކަމަށް ކަމުގައި ދެކިވަޑައިގަންނަވާ ކަމަށް މަރިޔަމް ވަހީދާ ވިދާޅުވިއެވެ.
މީގެ އިތުރުން ކޮވިޑް-19 ގެ ބަލިމަޑުކަމާ ގުޅިގެން ރާއްޖެއަށް އައިސްފައިވާ އިޤްތިޞާދީ ހީނަރުކަމުގެ ނުރަނގަޅު އަސަރު މީޑިއާތަކަށް ވެސް ކޮށްފައިވާ މިދަނޑިވަޅުގައި، ސަރުކާރުގެ ފަރާތުން މީޑިއާތަކަށް މާލީ އެހީތެރިކަން ފޯރުވައިދިނުމަށް ކުރައްވާ މަސައްކަތްތައް ފާހަގަކޮށް ޝުކުރުއަދާ ކުރައްވާފައިވެއެވެ.
އަދި ނޫސްވެރިކަމުގެ މިނިވަންކަމުގެ ދުވަސް މިއަދު ފާހަގަކުރާއިރު، ޒުވާން ނޫސްވެރިންގެ ތެރެއިން ގެއްލުވާލައިފައިވާ ނޫސްވެރިޔާ، އަޙްމަދު ރިލްވާނާއި މަރާލައިފައިވާ ނޫސްވެރިޔާ، ޔާމީން ރަޝީދުގެ މަތީން ހަނދުމަކޮށް، އެ ފަރާތްތަކުގެ ޢާއިލާތަކަށް އިންސާފު އަދިވެސް ލިބިފައިނުވާކަން ފާހަގަކުރައްވާފައިވެއެވެ.
3 މެއި 2020 ގައި ފާހަގަކުރާ މި އަހަރުގެ ދުނިޔޭގެ ނޫސްވެރިކަމުގެ މިނިވަންކަމުގެ ދުވަހުގެ މި އަހަރުގެ ނޫސްވެރިކަމުގެ މިނިވަންކަމުގެ ޝިޢާރެއްގެ ގޮތުގައި ޔުނެސްކޯއިން ކަނޑައަޅާފައިވަނީ “ޖާނަލިޒަމް ވިތްއައުޓް ފިއަރ އޯ ފޭވަރ” ނުވަތަ “ބިރުވެރިކަމެއް ނުވަތަ ވަކި ފަރާތަކަށް ބުރަވުމެއް ނެތި ކުރެވޭ ނޫސްވެރިކަން” މިއެވެ.
