ޚާއްސަ ވިސާގެ ދަށުން ރާއްޖެ އައުމަށް ވަކި ފަރާތްތަކަކަށް ހުއްދަދޭން ނިންމައިފި
2 މެއި 2020 | ހޮނިހިރު 19:10ރާއްޖެ އާދެވޭނެ ފަރާތްތަކުގެ ގޮތުގައި ހިމެނެނީ ރިސޯޓް އޯނަރުންނާއި، އިންވެސްޓަރުންނާއި ޑަބްލިޔުއެޗްއޯ، ވާރލްޑް ބޭންކް ފަދަ ތަންތާންގެ މީހުން
މަބްރޫކް އަޒީޒު
ސްޕެޝަލް ވިސާ ޕާމިޓްގެ ދަށުން ކަނޑައެޅޭ ވަކި ބަޔަކަށް ރާއްޖެ އައުމުގެ ހުއްދަ ދިނުމަށް ނިންމާ އެކަމުގެ އުސޫލުތައް އެކުލަވާލާފައިވާ ކަމަށް ކޮވިޑް-19 ގެ ޓާސްކް ފޯހުގެ ތަރުޖަމާން މަބްރޫކް އަޒީޒު ވިދާޅުވެއްޖެ އެވެ.
ހޮނިހިރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ މިވަގުތު އޮން އެރައިވަލް ވިސާ ދޫކުރުން ހުއްޓާލާފައި ވުމާއެކު މިހާރު ރާއްޖެ އާދެވޭނެ ފަރާތްތަކުގެ ގޮތުގައި ހިމެނެނީ ރިސޯޓް އޯނަރުންނާއި، އިންވެސްޓަރުންނާއި ޑަބްލިޔުއެޗްއޯ، ވާރލްޑް ބޭންކް ފަދަ ތަންތާންގެ މީހުން ކަމަށެވެ. އަދި މިމީހުން ރާއްޖެ އަންނައިރު ކަންކުރަންވާ ގޮތް އަދި ޑިޕްލޮމެޓިކް ސަރވިސަސް ގެ ދަށުން އަންނަ ފަރާތްތަކަށް ކަންކަންކުރަންވީ ގޮތް ހެލްތު ޕްރޮޓެކްޝަން އެޖެންސީން އެކުލަވާލާފައިވާ ކަމަށެވެ.
މަބްރޫކް ވިދާޅުވީ މި ވިސާގެ ދަށުން އަންނަ މީހުންވެސް 14 ދުވަހުގެ ކަރަންޓީނު މުއްދަތެއް ފުރިހަމަކުރަން ޖެހޭނެކަމަށާއި އަދި އެއް ރަށުން އަނެއް ރަށަށް އެމީހުންނަށްވެސް އަރާ ނުފޭބޭނެކަމަށެވެ.
ކޮވިޑް-19 އާ ގުޅިގެން މަރޗް މަހުގެ 27 ވަނަ ދުވަހުން ފެށިގެން ރާއްޖޭގެ ބޯޑަރ ވަނީ ބަންދުކޮށްފަ އެވެ. އެދުވަހުގެ ފަހުން ރާއްޖެއިން އޮން އެރައިވަލް ވިސާ ދޫކުރުން ވަނީ މެދުކަނޑާލާފައެވެ.
ރާއްޖޭގައި މިވަގުތު ކޮވިޑް-19 ފެތުރެމުންދާއިރު ބައެއް ރިސޯޓްތަކުގެ އޯނަރުން އަންނަނީ ރާއްޖެއަށް ސިއްހީ އާލާތްތައް ފޯރުކޮށްދެމުންނެވެ. އަދި ތަންތަނުގެ އޯނަރުން ރާއްޖެއަށް އަންނައިރު މިތަކެތި ގެންނާނެކަމަށް ވަނީ ހާމަކޮށްފަ އެވެ. އެގޮތުން ވެލާ ޕްރައިވެޓް އައިލެންޑް ރިސޯޓުން 10،000 ޓެސްޓް ކިޓާއި، 5 ވެންޓިލޭޓަރ، 10،000 ފޭސް މާސްކް އަދި 200 ރެސްޕިރޭޓަރާއި 500 ޕީޕީއީ ކިޓް ދިނުމަށް ނިންމާފައިވާއިރު މިތަކެތި ހިފައިގެން މާލެ އަންނާނީ ވެލާ ރިސޯޓްގެ އޯނަރުން ކަމަށް އެތަނުން ވަނީ ބުނެފަ އެވެ.
