ރާއްޖެއަށް އިތުރު އެހީ ގެނައުމުގެ ދަތުރު ފަށައިފި: ޗައިިނާ ސަފީރު
2 މެއި 2020 | ހޮނިހިރު 11:43ރާޢްޖެ އަށް ގެންނަ ތަކެތީގެ ތެރޭގައި ޖެކްމާ ދެއްވާ ތަކެތި ހިމެނޭ
ޗައިނާ އިން ރާއްޖެ އަށް ކަނޑައަޅުއްވާފައި ހުންނަވާ ސަފީރު ޒަންގް ލިޖޯންގް އަދި ފޮރިން މިނިސްޓަރ އަބްދުﷲ ޝާހިދު
ދިވެހިރާއްޖެ އަށް އެހީގެ ތަކެތި ގެނައުމުގެ ދަތުރު ފަށާފައިވާ ކަމަށް ޗައިނާއިން ރާއްޖެ އަށް ކަނޑައަޅުއްވާފައި ހުންނަވާ ސަފީރު ޒަންގް ލިޖޮންގް ވިދާޅުވެއްޖެ އެވެ.
ހޮނިހިރު ދުވަހު ސަފީރު ކުރައްވާފައިވާ ޓްވީޓްގައި ވަނީ މަޝްހޫރު އޮންލައިން ބިޒްނަސް ޗެއިން އަލީބާބާގެ ފައުންޑަރ ޖެކް މާ ގެ އިތުރުން ޗައިނާގެ ހަ ކުންފުންޏަކާއި ގުއަޒީ ސިޓީ އަދި ޗައިނާގެ ފޮރިން މިނިސްޓްރީން ރާއްޖެ އަށް ފޯރުކޮށްދޭ އެހީގެ ތަކެތި ގެނައުމުގެ މަސައްކަތް ފަށާފައިވާ ކަމަށެވެ.
ޖެކް މާ ހަދިޔާ ކުރެއްވި ތަކެތީގެ ތެރޭގައި ހިމެނެނީ މާސްކާއި، ޓެސްޓް ކިޓް، ޕްރޮޓެކްޓިވް ސޫޓްސް، ވެންޓިލޭޓަރ އަދި ތާމޯމީޓަރެވެ. ޗައިނާއިން އިތުރު އެހީގެ ގޮތުގައި ފޯރުކޮށްދޭން ނިންމާފައިވާ ތަކެތީގެ ތަފްސީލެއް ސަފީރު ލިޖޮންގް ހިއްސާކުރައްވާފައެއް ނުވެ އެވެ.
ތަކެތި ގެނައުމުގައި ލަސްވި ސަބަބު އޮޅުންފިލުއްވައިދެއްވަމުން، ސަފީރު ވިދާޅުވީ ތަކެތި އައުން ލަސްވެގެން އުޅެނީ މިހާލަތުގެ ގޮތުން ކަމަށެވެ. އަދި "ރަނގަޅު ކަންކަމަށް ކެތްތެރިކަން ބޭނުންވޭ" ކަމަށް ޓްވީޓުގައި ވިދާޅުވި އެވެ.
ކޮވިޑް-19 އާ ގުޅިގެން މީގެ ކުރިން ވެސް ޗައިނާއިން ޞިއްހީ އާލަތްތައް ރާއްޖެއަށް ފޯރުކޮށްދީފައިފަ އެވެ. މީގެ އިތުރުން އެޤައުމުން ގެންދަނީ ރާއްޖޭގައި 1100 މީހުންގެ ޖާގައިގެ ކަރަންޓީނު ދެ ފެސިލިޓީ ހެދުމުގެ މަސައްކަތް ކުރަމުންނެވެ.
ޗައިނާއިން އެހީ ހޯދުމުގައި މި ސަރުކާރު ނުކުޅެދިފައިވާ ކަމަށް ބުނެ، އިދިކޮޅު ފަރާތްތަކުން ވަނީ ސަރުކާރަށް ވަރަށް ބޮޑަށް ފާޑުކިޔާފަ އެވެ. އަދި ޗައިނާއިން ދޭން އުޅުނު އެހީއަށް ދިވެހި ސަރުކާރުން ނޫނެކޭ ބުނެ ތުހުމަތުގެ އިނގިލި ސަރުކާރަށް ދިއްކުރިއެވެ. ޗައިނާ ސަފީރު ވަނީ މި ވާހަކަތައް ދޮގުކުރައްވާފަ އެވެ.
