ފަތުރުވެރިކަން އަލުން އިއާދަވަންދެން ވިޔަފާރި އަދި ވަޒީފާތައް ދެމެހެއްޓުމުގެ މަސައްކަތް ކުރަންޖެހޭ: ފައްޔާޒު
ސަރުކާރުން މަސައްކަތް ކުރަނީ 2 އަހަރެއްހާ ދުވަސް ތެރޭގައި ފަތުރުވެރިކަން އަލުން އިއާދަކުރުން
އިކޮނަމިކް މިނިސްޓަރު ފައްޔާޒު އިސްމާއިލް
ކޮވިޑް-19 އިން އަރައިގަނެ ފަތުރުވެރިކަން އަލުން އިއާދަ ވަންދެން ވިޔަފާރިއާއި ވަޒީފަތައް ދެމެހެއްޓުމަށްޓަކައި މަސައްކަތްތަކެއް ކުރައްވަން ޖެހޭކަމަށް އިކޮނަމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެއެވެ.
ރައްޔިތުންގެ މަޖިލީހުގެ މާލިއްޔަތު ކޮމިޓީގައި ހުކުރު ދުވަހު ވާހަކަދައްކަވަމުން ފައްޔާޒު ވިދާޅުވީ ސަރުކާރުން މަސައްކަތް ކުރަނީ 2 އަހަރެއްހާ ދުވަސް ތެރޭގައި ފަތުރުވެރިކަން އަލުން އިއާދަކޮށް, އެރައިވަލް އިތުރުކުރުމުގެ މަސައްކަތާއި އެއްގޮތަށް ކުރިއަށްދާނެ ކަމަށް ބައްލަވައިގެން ކަމަށެވެ. އަދި މިދޭތެރޭގައި ވިޔަފާރިތައް އަދި ވަޒީފާތައް އެފްލޯޓްކޮށް ބެހެއްޓުމަށް ސަރުކާރުގެ އިންޓަރވެންޝަނެއް އޮންނަންޖެހޭނެކަމަށް ގަބޫލުކުރައްވާ ކަމަށެވެ.
މީގެ އިތުރުން އިކޮނަމީ ޑައިވަރސިފައި ކުރުމަށްޓަކައި ކުރިންވެސް ކޮށްފައި ހުރި ކަންތައްތަކުގެ ތެރެއިން އަވަހަށް ފަށާނެ ކަންތައްތަކުގެ ގޮތުގައި މަސްވެރިކަމާއި ދަނޑުވެރިކަމަށް ހާއްސަ އަހަންމިއްޔަތުކަމެއް ދީގެން ކުރިއަށްދިއުން އަދި އިތުރަށް މުޅި އިގްތިސާދު ޑައިވަރސިފައި ކުރުމުގެ ގޮތުން އެކިކަހަލަ ދިރާސާތައް ކުރަމުންދާ ކަމަށް ފައްޔާޒު ވިދާޅުވިއެވެ. ނަމަވެސް މިދިޔަ ދެ މަސް ދުވަހަކީ ސަރުކާރުން ވަތަށް ދަތި އުނދަގުލުގައި އުޅުނު ދުވަސްތަކެއް ކަމަށް މިނިސްޓަރު ފާހަގަ ކުރެއްވިއެވެ.
މީގެ އިތުރުން އިކޮނަމީ ޑައިވަރސިގައި ކުރުމުގެ މަސައްކަތް ކުރިން ވެސް ކުރައްވަމުން އައިސްފައިވާ ކަމަށާއި، އެއަށް ހާއްސަ އަހަންމިއްޔަތުކަމެއް ދީގެން މަސްވެރިކަމާއި ދަނޑުވެރިކަން ކުރިއެރުވުމަށް މަސައްކަތްތަކެއް ކުރައްވަމުން ގެންދަވާ ކަމަށް ފައްޔާޒު ވިދާޅުވިއެވެ. އަދި މަސްވެރިކަމާއި ދަނޑުވެރިކަމަށް އިންވެސްޓް ކުރުމުން އޭގެއިން ބައިވަރު މަންފާތަކާއި ފައިދާތަކެއް އިގްތިސާދަށް ކުރާނެ ކަމަށާއި، އޭގެ ތެރޭގައި ވަޒީފާތައް އިތުރުވެ ގައުމަށް ލިބޭ ބޭރުފައިސާ އިތުރުވުމާއި، ދަނޑުވެރިކަމަށް ބޭރުކުރާ ފައިސާ ދަށްވުމާއި، އިގްތިސާދުގައި ބައިވަރު މަސައްކަތްތަކެއް ހިނގާނެ ކަމަށް މިނިސްޓަރު ވިދާޅުވިއެވެ.
ނަމަވެސް ފަތުރުވެރިކަމުގެ ދާއިރާއިން މީގެ ކުރިން އައިސްފައިތިބި ހިސާބަކަށް ކުރިއަށް އޮތް ގަރުނުތަކުގައި ވެސް މަސްވެރިކަމާއި ދަނޑުވެރިކަމުން އެއާ ކައިރިއަށް ދެވޭނެކަމަށް ނުފެންނަ ކަމަށް މިނިސްޓަރު ވިދާޅުވިއެވެ.
