ރާއްޖޭގައި މިވަގުތު ކޮވިޑް-19 އަށް ޕޮޒިޓިވްވެފައިވާ މީހުން ތިބި ކުލަސްޓަރތަކަށް ބަލާއިރު އެންމެ ގިނަ ބަޔަކު ތިބި އެއް ކްލަސްޓަރ އަކީ ކޮކާކޯލާ ކޮމްޕެނީގައި މަސައްކަތްކުރަމުން އައި ބަޔަކު ތިބި ކުލަސްޓަރއެވެ.
މިކުލަސްޓަރ ފެނިފައިވަނީ 30 އޭޕްރީލްގަ އެވެ. މިކްލަސްޓަރ ގައި 72 މީހަކު ތިބި އިރު މިއީ މުޅިންވެސް އެއްތަނެއްގައި އުޅެމުންދިޔަ ބައެއްކަމަށް އެޗްޕީއޭއިން ވަނީ ހާމަކޮށްފަ އެވެ.
ކޮވިޑް-19 ޓާސްކް ފޯހުގެ ފަރާތުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެޗްޕީއޭގެ ޑޮކްޓަރ، ޑރ އިބްރާހީމް އަފްޒަލް ވިދާޅުވީ މިމީހުންގެ ތެރެއިން ފުރަތަމަ މީހާ ފެނުމާއެކު އެތާންގައި އުޅެމުންދިޔަ އެންމެން މޮނިޓަރިންގެ ހާލަތަށް ގެނެވުނު ކަމަށެވެ. އެހެންކަމުން އޭގެ ފަހުން އެމީހުން ތިބި ތަނުން ބޭރަށް ނުނިކުންނަކަމަަށް ޑރ އަފްޒަލް ވިދާޅުވިއެވެ.
އެމީހުންގެ ފުށުން އެހެން ކޮންޓެކްޓެއް ވެފައިނުވާކަމަށް ޑރ އަފްޒަލް ވިދާޅުވި އެވެ. މީގެއިތުރުން ޑރ އަފްޒަލް ވިދާޅުވީ އެމީހުންނަކީ ފިހާރަތަކުގައި އިޝްތިހާރު ސްޓިކަރ ޖަހާ މީހުންކަމަށް މައުލޫމާތު ލިބިފައިވާ ކަމަށެވެ.
އޭގައި ބޮޑަށް ހިމެނޭ އެޑްވަޓައިޒިން ސްޓިކަރ ފިހާރަތަކުގައި ޖަހާ މީހުން ކަމަށް މައުލޫމާތު ލިބެނީ. އެމީހުންގެ ފުރަަތަމަ މީހާ އެއީ އެގޮތަށް އުޅުނު މީހެއް. ފުރަތަމަ ކޭސްއަށްފަހު އެހެން އެއްވެސް މީހަކު ބޭރަށް ނިކުމެފައިނުވޭ. އެމީހުންގެ ތެރެއިން އެހެން ބަޔަކަށް ވައިރަސް ނުފެތުރޭނެ. އެ އެންމެންވެސް އެސިމްޕްޓޮމެޓިކް. އާންމުކޮށް އެސިމްޕްޓޮމެޓިކް މީހުންގެ ފުށުން ފެތުރޭނީ ކުރިޔަށް އޮތް ދެ ދުވަހަށް. އެހެންވީމާ އެނގޭ ހިސާބުންވެސް ދެ ދުވަހައްތާ ބަލާނީ. އެހެންވީމާ ދެ ދުވަހަށް ބަލާއިރުވެސް ނުފެނޭ އެމީހުންގެ ފުށުން އެހެން ބަޔަކަށް ވައިރަސް ފެތުރިފައިވާ ތަނެއް. އެހެންވީމަ ވަރަށް އުންމީދުކުރެވޭ އެކްލަސްޓަރ އިން ފެތުރުމުގެ ޗާންސް ކުޑަކަމަށް. އެހެންނަމަވެސް ބަލަމުން ދަނީ އިތުރު މީހަކު ހުރިތޯޑރ އިބްރާހީމް އަފްޒަލް
ޑޮކްޓަރ ވިދާޅުވީ ބިދޭސީން ދިރިއުޅުމަށް ހަމަޖައްސާފައި ހުންނަ ތޮއްޖެހިފައިވާ މާހައުލާއި، ފާޚާނަކުރަން ހަމަޖެހިފައި ހުންނަ ގޮތްތަކުގެ ސަބަބުން ކުރު މުއްދަތެއްގެ ތެރޭގައި ގިނަ ބަޔަކަށް ބަލިޖެހުމަށް މެދުވެރިވާކަމަށް ގަބޫލުކުރެއްވޭ ކަމަށެވެ.
މިހާތަނަށް ރާއްޖޭގައި ގިނަ އަދަދެއްގެ ބިދޭސީ މަސައްކަތްކުރާ މީހުން ވަނީ މިވައިރަސް އަށް ޕޮޒިޓިވްވެފައެވެ. މިހާތަނަށް އައިއިރު ރާއްޖޭގައި 491 މީހަކު ކޮވިޑް-19 އަށް ޕޮޒިޓިވް ވެފައިވާއިރު މީގެތެރޭގައި ބަންގްލަދޭޝަށް ނިސްބަތްވާ 261 މީހަކު ހިމެނެ އެވެ. މީގެއިތުރުން މިވަގުތު ފެންނަ ހުރި ބޮޑެތި ކްލަސްޓަރ ތައްވެސް ނިސްބަތްވަނީ ބިދޭސީންނަށެވެ. އެގޮތުން ކޮވިޑް ވިލެޖް ކްލަސްޓަރ އާއި ބާޒާރުމަތި ކްލަސްޓަރ ފާހަގަކޮށްލެވެ އެވެ.
މާލެ ތެރޭގައި ތޮއްޖެހެމުން ދިރިއުޅެމުން އަންނަ ބިދޭސީން އެއަށްވުރެ ރަނގަޅު މާހައުލަކަށް ބަދަލުކޮށް ތޮއްޖެހުން ކުޑަކުރުމަކީ މާލެ ސިޓީގެ ލޮކްޑައުން އިތުރުކުރި އެއް ސަބަބު ކަމަށް ކޮވިޑް-19 ގެ ޓާސްކް ފޯހުގެ ތަރުޖަމާން މަބްރޫކް ވެސް ވަނީ ވިދާޅުވެފަ އެވެ. އެގޮތުން ޓެގް ޓީމުން ލަފާދީފައިވަނީ އެމީހުންގެ ތޮއްޖެހުން ކުޑަކުރުމަށް މަސައްކަތްކުރުމަށް ލޮކްޑައުންގައި ތިބެގެން އެމަސައްކަތް ކުރުމަށް ކަމަށް މަބްރޫކް ވިދާޅުވި އެވެ.
މިވަގުތުވެސް ބިދޭސީންނަށް ޚާއްސަ ކުރެވިގެން ހުޅުމާލެ، ގުޅިފަޅު އަދި ވިލިވަރުގައި އަންނަނީ ކަރަންޓީނު ފެސިލިޓީތަކެއް ގާއިމުކުރަމުންނެވެ.
