އެމްޑަބްލިޔުއެސްސީގެ މުހިންމު 8 މުވައްޒަފުން ކަރަންޓީންގައި އެބަތިބި
1 މެއި 2020 | ހުކުރު 03:59މިވަގުތު އޮޕަރޭޝަންތައް ކުރިއަށް ގެންދަނީ ގޮންޖެހުންތަކާއެކު
އެމްޑަބްލިޔުއެސްސީގެ އިމާރާތް
މާލެ ވޯޓަރ އެންޑް ސުވަރޭޖް ކޮމްޕެނީ (އެމްޑަބްލިޔުއެސްސީ) ގެ މުހިންމު 8 މުވައްޒަފަކު ކަރަންޓީންގައި ތިބި ކަމަށް އެ ކުންފުނީގެ މެނޭޖިންގ ޑިރެކްޓަރ ހަސަން ޝާހު ވިދާޅުވެއްޖެއެވެ.
ރާއްޖެޓީވީން ކުރިއަށްގެންދާ ކޮވިޑް-19 ގެ ހާއްސަ ކަވަރޭޖަށް ދެއްވި އިންޓަވިއުއެއްގައި ޝާހު ވިދާޅުވީ އެ ކުންފުނިން މިވަގުތު އޮޕަރޭޝަންތައް ކުރިއަށް ގެންދަނީ ގޮންޖެހުންތަކާއެކު ކަމަށެވެ. އަދި އެމްޑަބްލިޔުއެސްސީގެ އިމަރޖެންސީ އޮޕްރޭޝަނުގެ މަސައްކަތް ހިނގާނެ ކަމަށެވެ.
ޝާހު އިތުރަށް ވިދާޅުވި އިމަރޖެންސީ ކޮވިޑް ވިލެޖާއި ހުޅުމާލޭގައި މީހުން ކަރަންޓީ ނޫނީ އައިސޮލޭޓް ކުރުމަށް ބަހައްޓާ ތަންތަނުގައި ފެނާއި ނަރުދަމާގެ ހިދުމަތް ފޯރުކޮށްދެމުންދަނީ އެމްޑަބްލިޔުއެސްސީގެ ފަރާތުން ކަމަށެވެ.
އަދި، ހުޅުމާލޭ ފޭސް 2 ގައި އެމްޑަބްލިޔުއެސްސީގެ ފެނާއި ނަރުދަމާގެ ނެޓްވޯކް އެއްކޮށް އެޅިފައެއް ނެތް އެހެންނަމަވެސް ވަގުތީ ސެޕްޓިކް ޓޭންކެއް ބެހެއްޓުމަށްފަހު ހިދުމަތް ފޯރުކޮށްދެމުން އަންނަ ކަމަށެވެ.
ގޮންޖެހުންތައް ދިމާވި ނަމަވެސް އެމްޑަބްލިޔުއެސްސީން ފޯރުކޮށްދޭ ހިދުމަތްތައް އެންމެ ރަނގަޅަށް ފޯރުކޮށްދިނުމުގެ މަސައްކަތް ކުރަމުންދާނެ ކަމަށް ޝާހު ވިދާޅުވިއެވެ.
މިހާތަނަށް ކޮވިޑް-19 އަށް ޕޮޒިޓިވްވެފައިވާ މީހުންގެ ތެރޭގައި ސިފައިންގެ 20 މީހަކު ހިމެނޭއިރު 130 ފުލުހަކު ވެސް ވަނީ އައިސޮލޭޝަންގައެވެ.
