އިންޑޮނޭޝިއާއިން 11 ދިވެހިން މާދަމާ ރާއްޖެ ގެންނަނީ
30 އެޕްރީލު 2020 | ބުރާސްފަތި 17:30ރާއްޖެއިން ވަނީ ކޮމިއުނިޓީ ސްޕްރެޑެއް ފެނިފައި
ކޮވިޑް-19 ޓާސްކްފޯހުގެ ތަރުޖަމާނު މަބްރޫކު އަޒީޒް
ރާއްޖެއިން ބޭރުގައި ދިރިއުޅެމުންދާ ދިވެހިން ރާއްޖެ ގެނައުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން އިންޑޮނޭޝިއާގައި ތިބި 11 ދިވެހިން ރާއްޖެ ގެނައުމަށް ނިންމާފައިވާކަމަށް ސަރުކާރުން ހާމަކޮށްފިއެވެ.
ބުރާސްފަތި ދުވަހުގެރޭ ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ކޮވިޑް-19 ޓާސްކްފޯހުގެ ތަރުޖަމާނު މަބްރޫކު އަޒީޒް ވިދާޅުވީ، ފޮރިން މިނިސްޓްރީން ކުރަމުންދާ މަސައްކަތުގެ ދަށުން އިންޑޮނޭޝިއާގައި ތިބި 11 ދިވެހިން ހުކުރު ދުވަހު ރާއްޖެ އަންނާނެ ކަމަށެވެ.
މަބްރޫކު އިތުރަށް ވިދާޅުވީ، ރާއްޖެއަށް ކުރިމަތިވެފައިވަނީ ބިރުވެރި އަދި ބުރަ ދުވަސްތަކެއް ކަމަށެވެ. އަދި ދިވެހި ޤައުމު ސަލާމަތުގެ އައްސޭރިއަކަށް ގެންދިއުމަށް އެންއީއޯސީން ކެނޑިނޭޅި މަސައްކަތް ކުރަމުންދާކަންވެސް މަބްރޫކު ފާހަގަކުރެއްވިއެވެ.
އޭގެ އިތުރުން، މިހާތަނަށް 8000 ސާމްޕަލް ނެގިފައިވާ ކަމަށާއި، އޭގެ ތެރެއިން 6915 މީހުންގެ ނަތިޖާ ނެގެޓިވްވެފައިވާ ކަންވެސް މަބްރޫކު ފާހަގަކުރެއްވިއެވެ. އެގޮތުން ރާއްޖެއިން މިހާތަނަށް ޕޮޒިޓިވްވެފައިވަނީ 369 މީހުންކަމަށް މަބްރޫކު ވިދާޅުވިއެވެ.
ކޮވިޑް-19 ދުނިޔޭގެ އެކި ޤައުމުތަކުގައި ފެތުރެމުންދިއުމާއެކު، ރާއްޖެއިން ބޭރުގައި ދިރިއުޅެމުންދާ ދިވެހިން ރާއްޖެ ގެނައުމުގެ މަސައްކަތް ސަރުކާރުން ދަނީ ކުރަމުންނެވެ. އެގޮތުން މީގެ ކުރިންވެސް ބައެއް ޤައުމުތަކުން ދިވެހިން ރާއްޖެ ގެނެސްފައިވެއެވެ.
