ފްރެންޗު ލީގުގެ ޗެމްޕިއަންކަން ޕީއެސްޖީ އަށް

ކޮރޯނާވައިރަސް (ކޮވިޑް-19) އާ ގުޅިގެން ކެންސަލް ކުރަން ޖެހުނު ފްރެންޗު ލީގުގެ ޗެމްޕިއަންކަން ޕީއެސްޖީ އަށް ދިނުމަށް ނިންމައިފި އެވެ.

ދި ފްރެންޗު ލީގު (އެލްއެފްޕީ) އިން ފްރާންސްގެ ކްލަބްތަކާ އެކު ކުރެވުނު މަޝްވަރާތަކަށް ފަހު ޖޫން 17 ވަނަ ދުވަހު ލީގު ފަށައި ޖުލައި 25 އަށް ސީޒަން ނިންމާލުމަށް ކުރިން ރޭވި ނަމަވެސް، ލީގު ކެންސަލް ކުރަން ޖެހުނީ މީހުން އެއްވެ އުޅޭގޮތަށް ކުރިއަށްގެންދާ ހުރިހާ ހަރަކާތްތައް ސެޕްޓެމްބަރު މަހުގެ ކުރިން ނުބޭއްވޭ ގޮތަށް ފްރާންސްގެ ބޮޑު ވަޒީރު އެޑޮއާޑް ފިލިޕޭގެ ސަރުކާރުން ކަނޑައެޅުމުންނެވެ. އަދި ވަނީ ސަޕޯޓަރުން ނުވައްދައިވެސް ފުޓްބޯޅަ ހަރަކާތްތައް ކުރިއަށް ނުގެންދަން އަންގާފައެވެ.

އެހެންކަމުން ލީގު ކެންސަލް ކޮށް އެލްއެފްޕީ އިން ވަނީ ޕީއެސްޖީ އަށް ޗެމްޕިއަންކަން ދީފައެވެ. މިއީ ފްރެންޗު ލީގުގެ ޗެމްޕިއަންކަން ޕީއެސްޖީ އިން ޖެހިޖެހިގެން ހޯދި ތިންވަނަ ފަހަރެވެ.

ފްރެންޗު ލީގު ކެންސަލް ކޮށް ލީގުގެ ޗެމްޕިއަންކަން ޕީއެސްޖީ އަށް ދިންއިރު، ޕީއެސްޖީ އެއްވަނައިގައި އޮތީ 12 ޕޮއިންޓުގެ ލީޑަކާ އެކު އެވެ. ޕީއެސްޖީ އަށް 68 ޕޮއިންޓު ލިބިފައިވާއިރު، ދެވަނައިގައި އޮތް މާސޭ އަށް ލިބިފައިވަނީ 56 ޕޮއިންޓެވެ.

ފްރެންޗު ލީގު ކެންސަލް ކުރިއިރު، ޔުއެފާ އިން ލީގުތައް ކެންސަލް ކުރަން ހުއްދަ ދިނީ ޔޫރަޕްގެ މަގާމުތަކަށް ޓީމުތައް ކަނޑައެޅުމަށް ޝަރުތުކޮށްފައެވެ. އެހެންކަމުން ފްރެންޗު ލީގުން ޔުއެފާ ޗެމްޕިއަންސް ލީގަށް ކޮލިފައިވާނީ އެއްވަނައިގައި އޮތް ޕީއެސްޖީ، ދެވަނައިގައި އޮތް މާސޭ އަދި ތިންވަނައިގައި ރެނެސް އެވެ. އަދި ޔުއެފާ ޔޫރޮޕާ ލީގަށް ކޮލިފައިވާނީ ހަތަރުވަނައިގައި އޮތް ލިލް، ފަސްވަނައިގައި އޮތް ރެއިމްސް އަދި ހަވަނައިގައި އޮތް ނީސް އެވެ. އެހެންކަމުން މިއީ 1997 ވަނަ އަހަރަށްފަހު ޔޫރަޕްގެ މުބާރާތަކުން ތާވަލުގެ ހަތްވަނައިގައި އޮތް ލިޔޯން އަށް ފުރުސަތު ގެއްލުނު ފުރަތަމަ ފަހަރެވެ.

ޔޫރަޕްގެ ގަދަ ފަސް ލީގުގެ ތެރޭގައި ހިމެނޭ ފްރެންޗު ލީގު ކެންސަލް ކުރިއިރު، މީގެ ކުރިން ޗެމްޕިއަނެއް ކަނޑަނާޅައި ނެދަލެންޑްސް ފުޓްބޯޅަ ލީގު ވަނީ ކެންސަލް ކޮށްފައެވެ. ދެން ލީގުތައް ކެންސަލް ކުރަން މަސައްކަތް ކުރަމުން އަންނަނީ ބެލްޖިއަމް އާއި ސްކޮޓްލެންޑުންނެވެ.