ކުރެއްދޫ ރިސޯޓަށް އަރާ ފޭބުމުގެ ހުއްދަ ދީފި
ކުރެއްދޫން 5 މީހަކު ޕޮޒިޓިވްވި
ރާއްޖެއިން ފުރަތަމަ ޕޮޒިޓިވް ކޭސް ފެނުނު ކުރެއްދޫ ރިސޯޓް - އެ ރަށަށް އަރާ ފޭބުމުގެ ހުއްދަ ދީފައިވަނީ 60 ދުވަސް ފަހުން
ކޮވިޑް-19 އާއި ގުޅިގެން އެންމެ ފުރަތަމަ ކޭސް ފެނުނު ކުރެއްދޫ އައިލެންޑް ރިސޯޓަށް އަރާ ފޭބުމުގެ ހުއްދަ ދީފިއެވެ.
ޑިރެކްޓަރ ޖެނެރަލް އޮފް ޕަބްލިކް ހެލްތް މައިމޫނާ އަބޫބަކުރު ސޮއި ކުރައްވާ ކުރެއްދޫ އައިލެންޑް ރިޒޯޓުގެ ޖެނެރަލް މެނޭޖަރަށް ފޮނުއްވި ސިޓީގައި ވަނީ އެ ރިސޯޓަކީ އެޗްޕީއޭގެ ނަންބަރު 2020/33 (ރިޒޯޓުތަކާއި ސަފާރީތަކުން އެހެން ރަށްރަށާއި ދެމެދު ދަތުރުކުރުން ހުއްޓައިލުމަށް އެންގި އެންގުމަށް ބަދަލުގެނައުން) އެންގުމުގެ 5 ވަނަ ނަންބަރުގައި ބަޔާންކޮށްފައިވާ ކަންކަން ފުރިހަމަވެފައިވާތީ، ބުރާސްފަތި ދުވަހުން ފެށިގެން ރިސޯޓަށް މީހުން އަރާފޭބޭނެ ކަމަށެވެ.
ރިޒޯޓުތަކާއި ސަފާރީތަކުން އެހެން ރަށްރަށާއި ދެމެދު ދަތުރުކުރުން ހުއްޓައިލުމަށް އެންގި އެންގުމަށް ބަދަލުގެނައުން އެންގުމުގެ 5 ވަނަ ނަންބަރުގައި ވަނީ ޕޮޒިޓިވްވި މީހަކު ފެނުމާއެކު، އެ މީހެއްގެ ފަރާތުން އެ ރިޒޯޓުގައި ނުވަތަ ސަފާރީގައި ހުރި އެހެން މީހަކަށް ބަލި ޖެހިފައި ވުމެވެ. އަދި މި ހާލަތުގައި އެންމެފަހުން ޕޮޒިޓިވްވި މީހާ ފެނުނުތާ 28 ދުވަސް ވެފައި ވުމާއި، މި 28 ދުވަހުގެ ތެރޭގައި ބަލީގެ އަލާމާތެއް ހުރި މީހަކު ފެނިފައިވާނަމަ، އެ މީހަކު ފެނުނުތާ 14 ދުވަސް ފުރިހަމަ ވާންޖެހެއެވެ.
މި 28 ދުވަހުގެ ކުރިން 14 ދުވަހުގެ މުއްދަތު ހަމަވާނަމަ، 28 ދުވަސް ފުރިހަމަކުރުމާއެކު ރިޒޯޓުން ނުވަތަ ސަފާރީން މީހުން ފައިބާއިރު ފުރިހަމަ ކުރަންޖެހޭ އެގްޒިޓް ފޯމު ފުރިހަމަކުރަން ޖެހެއެވެ. އަދި އެ ރިސޯޓުގައި ނުވަތަ ސަފާރީގައި ތިބި މީހުން ކޮވިޑް-19 އަށް ޓެސްޓްކުރުމާއި، ރިޒޯޓުގައި ނުވަތަ ސަފާރީގައި ބަލީގެ އަލާމާތް ހުރި މީހަކު ނުވަތަ ބައްޔަށް ޕޮޒިޓިވް ވެފައިވާ މީހަކު ނެތްކަން ކަށަވަރު ކުރަން ޖެހެއެވެ.
ކުރެއްދޫ ރިސޯޓުން ފުރަތަމަ ޕޮޒިޓިވް ކޭސްއެއް ފެނުނީ މާރޗް 7 ވަނަ ދުވަހުއެވެ. އަދި އެފަހުން އެ ރިސޯޓުގެ މުވައްޒަފުން ރަށުން އަރާ ފޭބުން މަނާކުރިއެވެ. ކުރެއްދޫގެ ލޮކްޑައުން އުވާލާފައި މިވަނީ ފުރަތަމަ ކޭސް ފެނުނުތާ 60 ދުވަސް ފަހުންނެވެ. ކުރެއްދޫ އިން ކޮވިޑް-19 އަށް 5 މީހަކު ޕޮޒިޓިވްވިއެވެ.
ކުރެއްދޫ އައިލެންޑް ރިސޯޓުގައި ޗުއްޓީ ހޭދަކުރި އިޓަލީ ޓޫރިސްޓެއްގެ ކިބައިން ކޮވިޑް-19 އަށް ޝައްކުކުރެވޭ އަލާމާތްތަކެއް ހުއްޓައި ކަމާބެހޭ އިދާރާތަކަށް ނާންގައި، ގައުމަށް ފުރުވާލި މައްސަލައިގެ ތަހުގީގު ވަނީ ފަށާފައެވެ. އަދި މި މައްސަލައިގައި އެ ރިިސޯޓު ޑޮކްޓަރުގެ ޕާސްޕޯޓް ވަނީ ހިފަހައްޓާފައެވެ.
