ކާގޯ ހިފައިގެން އިންޑިއާގެ ޗެެންނާއީން މޯލްޑިވިއަންގެ ފުލައިޓެއް ރާއްޖެ އަތުވެއްޖެ އެވެ.

18801 ކިލޯގެ ތަކެތި ހިފައިގެން މޯލްޑިވިއަންގެ ފްލައިޓް އައިސްފައިވަނީ، ބުދަ ދުވަހުގެ މެންދުރުގެ ވަގުތެއްގައެވެ. މޯލްޑިވިއަނުން ބުނީ، ކާގޯގެ ގޮތުގައި ގެނެސްފައިވަނީ ފުރުޓްގެ އިތުރުން ތަރުކާރީގެ ބާވަތްތައް ކަމަށެވެ.

ކޮވިޑް-19 އާއި ގުޅިގެން ގިނަ ގައުމުތަކެއްގެ ބޯޑަރުތައް ބަންދުކޮށް، އުދުހުންތައް ހުއްޓާލާފައިވާ ދަނޑިވަޅެއްގައި މޯލްޑިވިއަނުން އަންނަނީ ކާގޯ ގެނައުމުގެ މަސައްކަތް ކުރަމުންނެވެ.

އެގޮތުން މީގެ ކުރިން އެ އެއާލައިނުން ވަނީ ޔޫއޭއީ، ސިންގަޕޫރް، ސްރީލަންކާގެ އަދި ތައިލެންޑްގެ އިތުުރުން އެހެނިހެން ގައުމުތަކުން ކާގޯ ދަތުރުތަކެއް ކޮށްފައެވެ. މޯލްޑިވިއަނުން ދަނީ ރާއްޖެއިން ބޭރުގައިި ތިބި ދިވެހިން ގެނައުމަށްވެސް ހާއްސަ ދަތުރުތަކެއް ކުރަމުންނެވެ.

ކޮވިޑް-19 އާ ގުޅިގެން އަވަށްޓެރި ގިނަ ގައުމުތަކެއް ލޮކްޑައުންގެ ހާލަތުގައި އޮތްއިރު އެ ގައުމުތަކުގައި ދިރިއުޅޭ ދިވެހިން ދަނީ ރާއްޖެ އަންނަމުންނެވެ.