ރެންޑަމް ސާމްޕަލެއް ޕޮޒިޓިވްވެއްޖެ
ކުރިއަށް އޮތް ތަނުގައި އެ ނަމްބަރު އިތުރުވުމުގެ ފުރުސަތު އެބައޮތް
މާލޭގައި ރޭންޑަމް ސާމްޕަލް ނެގުމުގެ މަސައްކަތްކުރަނީ
މާލެ ސަރަހައްދުގައި ކޮވިޑް-19 ފެތުރިފައިވާ މިންވަރު ދެނެގަތުމަށްޓަކައި ކުރިއަށް ގެންދާ ރެންޑަމް ސާމްޕްލިންގ ގެ ތެރެއިން މިހާތަނަށް އެކަކު ޕޮޒިޓިވްވެފައިވާ ކަމަށް ޑރ. އިބްރާހިމް އަފްޒަލް ވިދާޅުވެއްޖެ އެވެ.
ކޮވިޑް-19 އާ ގުޅިގެން އެންމެ ފަހުގެ މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ އަފްޒަލް ވިދާޅުވީ ކުރިއަށް އޮތް ތަނުގައި އެ ނަމްބަރު އިތުރުވުމުގެ ފުރުސަތު އޮތްކަމަށެވެ.
ރެންޑަމް ސާމްޕަލްތަކެއް ނެގުމުގެ ބޭނުމަކީ ބަލި ފެތުރިފައިވާ މިންވަރު ބެލުމުގެ އިތުރުން ނުހޯދި ހުރި ކްލަސްޓާތަކާއި ސަރަހައްދުތައް ދެނެގަތުން ކަމަށް ޑޮކްޓަރު ވަނީ މީގެކުރިން ވިދާޅުވެފަ އެވެ. މާލެއާއި ވިލިމާލޭގެ އިތުރުން ހުޅުމާލެއިން ރެންޑަމް ސާމްޕަލްތަކެއް ނެގުމުގެ މަސައްކަތް ފަށާފައިވާކަން ނޭޝަނަލް އެމަޖެންސީ އޮޕަރޭޝަން ސެންޓަރުން ހާމަކުރީ މި ހަފްތާ ތެރޭގަ އެވެ.
މި ސާމްޕަލްތައް ނެގުމުގައި، ބާޒާރު މައްޗާއި ކަންމަތީ ފިހާރަތަކުގެ އިތުރުން ފެރީތަކުގައި ދަތުރުކުރާ ފަރާތްތަކަށް ހާއްސަ ސަމާލުކަމެއް ދީގެން މަސައްކަތް ކުރުމަށް ވަނީ ނިންމާފަ އެވެ. މިއީ އެހެން ގައުމުތަކުގައި ވެސް މިކަން ކުރަމުން އަންނަ އުސޫލެވެ. އެގޮތުން، ބަލި ފެތުރިދާނެ ކަމަށް ބެލެވޭ ހޮޓް ސްޕޮޓްސް (ބަލި ފެތުރުމުގެ ފުރުސަތު ބޮޑު ސަރަހައްދުތައް) ތަކުން ގިނަ ގައުމުތަކަކުން އަންނަނީ ސާމްޕަލްތައް ނަގަމުންނެވެ.
އޭގެ އިތުރުން، މަގުމަތިން ފެންނަ އެހެން ފަރާތްތަކާއި ތޮއްޖެހިގެން ބިދޭސީން ދިރިއުޅޭ ތަންތަނުން ވެސް ރެންޑަމްކޮށް ސާމްޕަލް ނެގުމަށް ވަނީ ނިންމާފަ އެވެ. މި ފީލްޑް ސަރވޭ ނިމުމުން، މާލޭގައި ބަލި ފެތުރިފައިވާ މިންވަރު ދެނެގަތުމަށް ފަސޭހަވާނެ ކަމަށް ޑޮކްޓަރުންގެ ޓީމް (ޓެގް) އިން ވަނީ ހާމަކޮށްފަ އެވެ.
މިހާތަަނަށް އައިއިރު ރާއްޖެއިން 278 މީހަކު ވަނީ ޕޮޒިޓިވްވެފައެވެ. މީގެތެރެއިން 152 މީހުންނަކީ ބިދޭސީންނެވެ. މާލެ ތެރެއިން ބަލި ފެނުނު ފަހުން މިހާތަނަށް އައިއިރު، ދުވާލެއްގެ މައްޗަށް އެވަރެޖްކޮށް 16 މީހަކަށް ކޮވިޑް-19 ޖެހިފައިވާ ކަމަށް ވަނީ ރިޕޯޓްކުރެވިފަ އެވެ.
