މެއި މަހުގެ ތެރޭގައި ރާއްޖެއަށް އިތުރު ވެންޓިލޭޓަރުތަކެއް ގެނެވޭނެ ކަމަށް ހެލްތު މިނިސްޓަރ ޢަބްދުﷲ އަމީން ވިދާޅުވެއްޖެއެވެ.

މިނިސްޓަރ މިހެން ވިދާޅުވެފައިވަނީ މައްޗަންގޮޅި ދެކުނު ދާއިރާގެ މެންބަރު އަޙްމަދު ޚައިތަމް ކުރެއްވި ސުވާލަށް ލިޔުމުން ޖަވާބު ދެއްވަމުންނެވެ. މެންބަރު ކުރެއްވި ސުވާލަކީ ދުނިޔޭގައި މިހާރު ހަލުވިކަމާއެކު ފެތުރެމުން އަންނަ ކޮވިޑް-19 ރޯގާއާއި ގުޅިގެން ދިވެހިރާއްޖެއިން އަޅަމުންދާ ރައްކާތެރިކަމުގެ ފިޔަވަޅުތަކުގެ ތެރެއިން ދިވެހިރާއްޖެއަށް ވެންޓިލޭޓަރުތަކެއް އެތެރެކުރުމަށްޓަކައި އެއްވެސް ފަރާތަކަށް ބިޑްކުރެވިފައިވާނަމަ އެކަމުގެ ތަފުޞލު ދެއްވަފާނަންތޯއެވެ. އަދި ވެންޓިލޭޓަރުތައް ދިވެހިރާއްޖެއަށް ގެނައުމަށް ހޭދަވާ މުއްދަތާއި ގުޅޭ ގޮތުން ވެސް ސުވާލުކުރައްވާފައިވެއެވެ.

ވަޒީރުގެ ޖަވާބުގައި ވަނީ ކޮވިޑް-19 ނުރައްކާތެރި ޙާލަތައް ގޮސްދާނެ ވަގުތަކަށް ތައްޔާރުވުމުގެ ގޮތުން ދިވެހިރާއްޖެއަށް 200 ވެންޓިލޭޓަރު ހޯދުމުގެ މަސައްކަތް ޚާއްޞަ ކަމެއްގެއްގެ ގޮތުގައި ކުރުމަށް ޕޮލިސީ ކޮމިޓީން ނިންމީ 15 މާރިޗް 2020 ވަނަ ދުވަހު ކަމަށެވެ. އަދި 18 މާރޗް 2020 ވަނަ ދުވަހު ވެންޓިލޭޓަރު ހޯދުމަށް ދިވެހި ތިން ކުންފުންނަކުން، މިނިސްޓްރީން އީމެއިލް މެދުވެރިކޮށް ކޯޓޭޝަން ހޯދާފައިވާކަމަށްވެސް ވިދާޅުވިއެވެ.

މިނިސްޓަރ ވިދާޅުވީ މިކުންފުނިތަކަކީ ވޭތުވެ ދިޔަތަނުގައި މިނިސްޓްރީއަށް މެޑިކަލް އިންސްޓްރޫމަންޓް އަދި މެޝިނަރީސް ސަޕްލައި ކޮށްދެމުންދާ، އިތުބާރު ހިފޭ ކުންފުނިތަކުގެ ތެރެއިން ވެންޓިލޭޓަރ ގެނެވިދާނެކަމަށް މިނިސްޓްރީއަށް ފެންނަ ތިން ކުންފުނިތަކެއް ކަމަށެވެ. އެ ކުންފުނިތަކަކީ އެސް.ޓީ.އޯ، މެޑްޓެކް މޯލްޑިވްސް ޕްރައިވެޓް ލިމިޓެޑް އަދި ނާޑް ޕްރައިވެޓް ލިމިޓެޑެވެ.

ވެންޓިލޭޓަރު ސަޕްލައި ކޮށްދެވޭނެކަމަށް ކުންފުނިތަކުން ދީފައިވާ އެންމެފަހުގެ މަޢުލޫމާތުގައި ވާ ގޮތުން މެޑްޓްކް މޯލްޑިވްސްއާއި ޙަވާލުކޮށްފައިވާ ވެންޓިލޭޓަރތަކުގެ ތެރެއިން 18 ވެންޓިލޭޓަރ 1 މެއި 2020ގައި ރާއްޖެ ގެނެވޭނެކަމަށް އަންގާފައިވާކަމަށް މިނިސްޓަރުގެ ޖަވާބުގައިވެއެވެ. އަދި އެ ކުންފުންޏާ ޙަވާލުކޮށްފައިވާ ވެންޓިލޭޓަރުތަކުގެ ތެރެއިން 10 ވެންޓިލޭޓަރ 15 މެއި 2020ގައި ރާއްޖެ ގެނެވޭނެކަމަށް އަންގާފައިވާކަމަށް މިނިސްޓަރުގެ ޖަވާބުގަވެއެވެ. އެކުންފުންނާއި ޙަވާލުކުރެވިފައިވާ ބާކީހުރި ވެންޓިލޭޓަރތައް ގެނެވޭނެ ދުވަސް ކަށަވަރުވުމުން މިނިސްޓްރީއާއި ހިއްސާކުރާނެކަމަށް އެކުންފުނިން އަންގާފައިވާކަމަށެވެ.

މީގެ އިތުރުން ނާޑް ޕްރައިވެޓް ލިމިޓެޑް އާއި ޙަވާލުކޮށްފައިވާ 20 ވެންޓިލޭޓަރ އެއުފައްދާ ކުންފުނީގެ ފަރާތުން އުފެއްދުން ލަސްވެފައިވުމުގެ ސަބަބުން އިތުރު ގޮތްތަކެއް ހޯދަމުން ދާކަމަށް 22 އެޕްރީލް 2020 ގައި މިނިސްޓްރީ އަށް އަންގާފައިވާކަމަށް މިނިސްޓްރީން ބުންޏެވެ. އަދި އެގްޒެކިއުޓަރ ޖެނެރަލް ޓްރޭޑިންގ އާއި ޙަވާލުކޮށްގެން ގެނައުމަށް ހަމަޖައްސާފައިވާ 75 ވެންޓިލޭޓަރތަކުގެ ތެރެއިން 10 ވެންޓިލޭޓަރ 1 މެއި 2020ގައި ރާއްޖެ ގެނެވޭނެކަމަށް އަންގާފައިވާކަމަށް މިނިސްޓަރ ވިދާޅުވިއެވެ.

މިނިސްޓަރގެ ޖަވާބުގައި ވަނީ ވެންޓިލޭޓަރު އުފައްދާ ޤައުމުތައް ލޮކްޑައުން ކުރެވިފައިވުމާއެކު، ދަތުރުފަތުރުގެ ދަތިތަކެއް ހުރުމުން ވެންޓިލޭޓަރުތައް ސަޕްލައިކުރުމަށް ކުންފުނިތަކުން ކަނޑައަޅާފައިވާ މުހުލަތުގައި ގެނެއުމަށް ބޮޑެތި ދަތިތަކެއް ހުރިކަމަށެވެ.

މިނިސްޓަރ ވިދާޅުވީ ދެކުންފުންޏަކާއި ޙަވާލުކޮށްފައިވާ ވެންޓިލޭޓަރުތައް ސަޕްލައި ކުރުމުގައި ލަސްވެދާނެކަމަށް ޤަބޫލުކުރެވޭތީ، އިތުރަށް ހޯދަންޖެހޭ ވެންޓިލޭޓަރު ތަކުގެތެރެއިން 75 ވެންޓިލޭޓަރ ހޯދުމަށް ޑުބާއީ ކުންފުންޏެއް ކަމަށްވާ އެކްސެކިއުޓާ ޖެނެރަލް ޓްރޭޑިންގ އާއި 02 އޭޕްރިލް 2020ގައި މި މަސައްކަތް ޙަވާލުކުރެވުނު ކަމަށެވެ.