ރާއްޖެ ގެންނަ ވެންޓިލޭޓަރުތަކާއި ގުޅޭގޮތުން ބުދަ ދުވަހުގެ ޖަލްސާގައި ހެލްތު މިނިސްޓަރާއި ސުވާލުކުރަނީ
ހެލްތު މިނިސްޓަރާއި ސުވާލު ކުރައްވަނީ މައްޗަންގޮޅި ދެކުނު ދާއިރާގެ މެމްބަރ އަހުމަދު ހައިތަމް
ހެލްތު މިނިސްޓަރ އަބްދުﷲ އަމީން
ކޮވިޑް-19 އާ ގުޅިގެން ރާއްޖެއިން އަޅަމުންދާ ރައްކާތެރިކަމުގެ ފިޔަވަޅެއްގެ ގޮތުން ދިވެހިރާއްޖެއަށް ވެންޓިލޭޓަރުތަކެއް އެތެރެ ކުރުމަށްޓަކައި އެއްވެސް ފަރާތަކާ ބިޑްކޮށްފައިވާނަމަ އެކަން ސާފުކުރުމަށް ބުދަ ދުވަހުގެ ޖަލްސާގައި ހެލްތު މިނިސްޓަރ އަބްދުﷲ އަމީނާ ސުވާލުކުރުމަށް އެޖެންޑާކޮށްފި އެވެ.
ހެލްތު މިނިސްޓަރާއި ސުވާލު ކުރައްވަނީ މައްޗަންގޮޅި ދެކުނު ދާއިރާގެ މެމްބަރ އަހުމަދު ހައިތަމް އެވެ. ހައިތަމް މިނިސްޓަރާއި ދެން ސުވާލު ކުރައްވަނީ ވެންޓިލޭޓަރުތައް ރާއްޖެ ގެނައުމަށް ހޭދަވާނެ މުއްދަތާއި އެކަމާއި ގުޅޭ އެންމެ ފަހުގެ މައުލޫމާތުތަކާއި ގުޅޭގޮތުންނެވެ.
ވަޒީރުންނާއި ސުވާލުކުރުމުގެ މިމައްސަލަ އެޖެންޑާ ކޮށްފައިމިވަނީ ހެލްތު މިނިސްޓަރ އަރިހުން ލިޔުމުން ޖަވާބު ހޯދުމަށް ފޮނުވާފައިވާ ސުވާލު ނޯޓިހުގެ މުއްދަތު 27 އޭޕްރީލްގައި ހަމަވުމަށްފަހު ޖަވާބު ފޮނުއްވާފައިނުވާތީ އެކަމާއި ގުޅިގެން ރައްޔިތުންގެ މަޖިލީހުގެ އިދާރާއިން ބަޔާނެއްވެސް ނެރުމަށްފަހު އެވެ. އެބަޔާން ރައްޔިތުންގެ މަޖިލީހުގެ އިދާރާއިން ނެރުނުތާ 21 މިނެޓް ތެރޭގައި މިނިސްޓަރ އަމީން ވަނީ މަޖިލީހަށް ޖަވާބު އީމެއިލް ކުރައްވާފައި ކަމަށް މަޖިލީހުގެ އިދާރާއިން ފަހުން ވަނީ ބުނެފަ އެވެ.
ވެންޓިލޭޓަރުތަކާއި ގުޅޭގޮތުން މީގެކުރިން ކޮވިޑް-19 ގެ ޓާސްކް ފޯހުގެ ތަރުޖަމާން މަބްރޫކް އަޒީޒު ހާމަކުރައްވާފައިވާ މައުލޫމާތުތަކަށް ބަލާލާއިރު ސަރުކާރުން 26 ވެންޓިލޭޓަރު ގެނައުމަށް 8.3 މިލިއަން ރުފިޔާ ދައްކާގޮތަށް ނާޑް ނަމަކަށް ކިޔާ ކުންފުންޏަކާއި އެކު އެގްރީމެންޓް ހަދާފައިވާކަމަށް ވަނީ ވިދާޅުވެފަ އެވެ. އަދި 50 ވެންޓިލޭޓަރު ގެނައުމަށް 14.4 މިލިއަން ރުފިޔާ ހޭދަކުރުމަށް މެޑްޓެކް ކުންފުންޏާއެކު އެގްރީމެންޓް ކުރެވިފައިވާކަމަށް މަބްރޫކް ވަނީ ވިދާޅުވެފަ އެވެ.
34 މިލިއަން ރުފިޔާ ހޭދަކޮށްގެން ދުނިޔޭގެ ސިއްހަތު ޖަމިއްޔާ މެދުވެރިކޮށް ވެންޓިލޭޓަރުތަކެއް ގެނައުމަށް ހަމަޖެހިފައިވާ ކަމަށްވެސް މަބްރޫކް މީގެކުރިން ވަނީ ވިދާޅުވެފަ އެވެ. އެގޭ ތެރޭގައި ހިމެނެނީ އައިސީޔޫގައި ބަހައްޓާ 65 ސްޓޭޝަނަރީ ވެންޓިލޭޓަރާއި ދަތުރުމަތީގައި ބޭނުންކުރާ 10 ވެންޓިލޭޓަރެވެ. އެ ވެންޓިލޭޓަރުތައް ގެނައުމަށް އެގްރީމެންޓް ކުރެވިފައިވަނީ ދުބާއީގެ އެކްޒިކިއުޓާސް ޖެނެރަލް ޓްރޭޑިން ކުންފުންޏަކާ ކަމަށް މަބްރޫކް ވިދާޅުވި އެވެ.
މޭމަހުގެ ފުރަތަމަ ހަފްތާގައި މެޑް ޓެކް ކުންފުންޏާ ވެފައިވާ އެއްބަސްވުމުގެ ދަށުން 18 ވެންޓިލޭޓަރު ރާއްޖެ ގެނައުމުގެ މަސައްކަތް ކުރަމުންދާކަމަށް މަބްރޫކް ވަނީ ވިދާޅުވެފަ އެވެ. އަދި ވެންޓިލޭޓަރުތައް ގެނައުމަށް ކުރަމުންދާ މަސައްކަތުގެ ދަށުން މި މަހުގެ 19 ވަނަ ދުވަހު 6 ވެންޓިލޭޓަރެއް ވަނީ ރާއްޖެ ގެނެސްފައެވެ.
މިނިސްޓަރ އަމީނާ ސުވާލުކުރުމަށް ހަމަޖެހިފައިވާ ޖަލްސާ އޮންނާނީ ބުދަ ދުވަހުގެ 11:00 ގަ އެވެ.
