އެހީއަށް އެދުމަކީ ލަދުގަންނަންޖެހޭ ކަމެއްނޫން: ޑރ. އާރިފް
ސައިކޯސޯސަލް ސަޕޯޓް ހޯދުމަކީ ލަދުގަންނަންޖެހޭ ކަމެއް ނޫން
ނަފްސާނީ ބަލިތަކުގެ ޑޮކްޓަރު އާރިފް މުހައްމަދު
ކޮވިޑް-19 އާ ގުޅިގެން، ހާލުގައި ޖެހުމަކީ ހަމަ ވެދާނެ ކަމެއް ކަމަށާއި އެފަދަ ކަމެއް ދިމާވެއްޖެނަމަ އެހީތެކަމަށް އެދުމަކީ ލަދުގަންނަންޖެހޭ ކަމެއް ނޫންކަމަށް ނަފްސާނީ ޑޮކްޓަރ އާރިފް މުހައްމަދު ވިދާޅުވެއްޖެ އެވެ.
ނޭޝަނަލް އިމަރޖެންސީ އޮޕަރޭޝަން ސެންޓަރުގައި އަންގާރަ ދުވަހު ބޭއްވި ނޫސްވެރިންގެ ބައްދަލުވުުގައި ޑރ. އާރިފް ވިދާޅުވީ، ކޮވިޑް-19 ރޯގާއާ ގުޅިގެން، ވަޒީފާ އާއި އަދި އެހެނިހެން ކަމަކާ ގުޅިގެންވިޔަސް، އެކި މީހުންނަށް އެކަމަކުން އަސަރުކުރާލެއް ތަފާތުވާނެ ކަމަށެވެ. އަދި ނިކަމެތި އާއިލާތަކާއި، ފަރާތްތައް، އަދި ހާއްސަ އެހީއަށް ބޭނުންވާ ފަރާތްތަކާއި ފްރަންޓްލައިންގައި މަސައްކަތްކުރާ ފަރާތްތަކަށް މިކަމުގެ އަސަރުކުރާ މިންވަރު ތަފާތުވާނެ ކަމަށެެވެ.
އެހެންކަމުން، މިފަދަ ދަނޑިވަޅެއްގައި، އެހީތެރިކަމެއް ބޭނުންވާނަމަ، ކަމާބެހޭ ފަރާތްތަކަށް ގުޅައިގެން ދިމާވެގެން އުޅޭ ކަންކަން ހައްލު ކުރުމަކީ މުހިއްމު ކަމެއް ކަމަށާއި، އެކަމާ ދެރަވެ، ހިތާމަކޮށް، އަމިއްލަ ނަފްސު ކޮންޓްރޯލް ނުވާހިސާބަށް ދިއުމުގެ ކުރިން، ކައުންސިލިންގ ދިނުންފަދަ މަސައްކަތްކުރާ ފަރާތެއްގެ އެހީތެރިކަން ހޯދުން މުހިއްމު ކަމަށް ވެސް ޑޮކްޓަރު ވިދާޅުވި އެވެ.
މީގެއިތުރުން، ޑޮކްޓަރު ވިދާޅުވީ، އަބަދާއަބަދު، ކޮވިޑް-19 އާގުޅޭ ވާހަކަތައް އަޑުއަހާ ބަލާނަމަވެސް، ނަފްސާނީގޮތުން ގެއްލުންތަކެއްވުން އެކަށީގެންވާ ކަމަށެވެ.
ޑޮކްޓަރު ވިދާޅުވީ ސައިކޯސޯޝަލް ސަޕޯޓް ހޯދުމަކީ މިފަދަ ހާލަތްތަކުގައި ވަރަށް މުހިއްމުކަމެއް ކަމަށާއި، ނަފްސާނީ އެއްވެސް އުނދުގުލެއް ހުރިނަމަވެސް ގުޅާލައިގެން ވާހަކަ ދައްކާލުމަކީ މުހިއްމު ކަމެއް ކަމަށް ގަބޫލު ކުރަންޖެހޭ ކަމަށެވެ. މޯލްޑިވިއަން ރެޑް ކްރެސެންޓުން ސައިކޯ ސޯސަލް ސަޕޯޓް ފޯރުކޮށްދެމުންދަނީ 1425 މިނަމްބަރު މެދުވެރިކޮށެވެ.
