ކޮވިޑް-19އަށް 6300 އަށްވުރެ ގިނަ ސާމްޕަލް ނަގާފައި ވާކަމަށް ނޭޝަނަލް އިމަރޖެންސީ އޮޕްރޭޝަން ސެންޓަރ (އެންއީއޯސީ) އިން ބުނެފި އެވެ.

ހޯމަ ދުވަހުގެ ރޭ ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި ކޮވިޑް-19 ޓާސްކްފޯސްގެ ތަރުޖަމާނު މަބްރޫކް އަޒީޒު ވިދާޅުވީ، 6343 ސާމްޕަލް ނަގާފައިވާއިރު، 5990 ސާމްޕަލް ކޮވިޑް-19 އަށް ނެގަޓިވް ވެފައިވާކަމަށެވެ. އަދި 226 މީހެއްގެ ސާމްޕަލް ކޮވިޑް-19 އަށް ޕޮޒިޓިވް ވެފައިވާ ކަމަށާއި ނަތީޖާ ނުލިބި، ލެބޯޓަރީގައި 129 ސާމްޕަލެއް އެބަހުރިކަމަށް ވެސް މަބްރޫކް ވިދާޅުވި އެވެ.

މަބްރޫކް ވިދާޅުވީ، އައިސޮލޭޝަންގައި ތިބީ 214 ފަރާތެއް ކަމަށާއި ކަރަންޓީނުގައި 1217 ފަރާތެއް އެބަތިބި ކަމަށެވެ. އަދި ކަރަންޓީންގެ 14 ދުވަހުގެ މުއްދަތު ނިމި، އަދި ކޮވިޑް-19 އަށް ދެ ފަހަރު ޓެސްޓް ކުރުމުން ނަތީޖާ ނެގެޓިވް ވި، 40 މީހަކު ކަރަންޓީނުން ދޫކޮށްލާފައިވާ ކަމަށެވެ. އަދި މިވަގުތު ކޮވިޑް-19 އަށް ފަރުވާ ދެވެމުންދަނީ 207 ފަރާތަކަށް ކަމަށް ވެސް މަބްރޫކް ވިދާޅުވި އެވެ.

މިހާތަނަށް މޮނިޓަރިންގެ ޙާލަތަށް 294 ތަނެއް ގެނެވިފައިވާ ކަމަށެވެ.

މީގެއިތުރުން މަބްރޫކް ވިދާޅުވީ، މުޖުތަމައު ތެރެއިން މިބަލި ފެނި ބަލިޖެހުނު މީހުންނާ ސީދާ ދިމާވި މީހުން ހޯދުމުގެ މަސައްކަތުގެ ތެރެއިން މިހާތަނަށް 3044 މީހަކު ދެނެގަނެވި ސާމްޕަލް ނަގަމުންދާ ކަމަށެވެ.

ކޮވިޑް-19 މިހާރު ރާއްޖޭގެ އެކި ސަރަހައްދުތަކުގައި ފެތުރެން ފެށުމާއި ގުޅިގެން، އެންއީއޯސީން ދަނީ ކޮންޓެކްޓް ޓްރޭސިންގގެ ދަށުން ބައެއް ތަންތަން މޮނީޓަރިންގ ހާލަތަށް ގެނެސް ކޮންޓެކްޓްވި މީހުންގެ ސާމްޕަލްތައް ނަގަމުންނެވެ. ރާއްޖޭގެ ބައެއް ރަށްތައް ވެސް މޮނީޓަރިންގ ހާލަތަށް ގެނެސްފައިވާއިރު، ކޮވިޑް-19 އަށް ގިނަ އަދަދެއްގެ ބިދޭސީން ޕޮޒިޓިވްވެ، ކޮންޓެކްޓް ޓްރޭސިންގ ގެ ދަށުން ގިނަ އަދަދެއްގެ ބިދޭސީންގެ ޓެސްޓްތައް ކުރެވެމުންވެސް އެބަދެއެވެ.