ކަރަންޓީނަށް ދޫކޮށްފައިވާ ރިސޯޓުތަކައް އެކަނިވެސް 27 މިލިއަން ރުފިޔާ ޚަރަދުކޮށްފި

ރާއްޖެއިން ކޮވިޑް-19 ފެތުރެމުންދާއިރު، މިހާތަނަށް ކަރަންޓީން ފެސިލިޓީތަކަށް 2615 މީހަކު ގެންގޮސްފައިވާ ކަމަށް ނޭޝަނަލް އިމަރޖެންސީ އޮޕަރޭޝަން ސެންޓަރު (އެންއީއޯސީ)ގެ ތަރުޖަމާނު މަބްރޫކް އަޒީޒު ވިދާޅުވެއްޖެއެވެ.

އާދިއްތަ ދުވަހުގެ ރޭ ދަރުބާރުގޭގައި ބޭއްވި ނޫސްވެރިންގެ ބައްދަލުވުުގައި މަބްރޫކް ވަނީ ކޮވިޑް-19 ރޯގާއާ ގުޅިގެން މިހާތަނަށް ކުރެވިފައިވާ ޚަރަދުތަކުގެ ބައެއް ތަފުޞީލުތައް ހާމަކުރައްވާފައެވެ.

އެގޮތުން މަބްރޫކް ވިދާޅުވީ ކޮވިޑް-19އާއި ގުޅިގެން ކަރަންޓީން ފެސިލިޓީތައް ޤާއިމުކުރުމުގެ މަސައްކަތުގެތެރެއިން، ވެލިދުއާއި، ވެލިވަރަށް ޚަރަދުކޮށްފައިވަނީ ޓޫރިޒަމް ޓްރަސްޓް ފަންޑުންކަމަށެވެ.

އެގޮތުން، ވެލިދުއަށް 469،000 ޚަރަދުވިއެވެ. އެރަށަކީ ކުރިން ފަތުރުވެރިކަމަށް ބޭނުންކޮށްފައިވާ ރިސޯޓެކެވެ. ނަމަވެސް ރޫމްތަކާއި ބައެއްތަންތަން މަރާމާތު ކުރުމަށް އެވަރު ޚަރަދު ވެފައިވާ ކަމަށް މަބްރޫކް ވިދާޅުވިއެވެ.

ވިލިވަރު ފެސިލިޓީގެ ކޮޓަރިތައް ހެދުމަށާއި ސަރވިސް އޭރިޔާ ހެދުމަށް 6.6 މިލިއަން ރުފިޔާ ހޭދަވެފައިވާ ކަމަށް ވެސް މަބްރޫކް ވިދާޅުވިއެވެ. މަބްރޫކް ވިދާޅުވީ އެރަށަކީ ރިސޯޓެއް ހެދުމަށް ނަގާފައިވާ ރަށެއް ކަމަށާއި، އެރަށް އޮތީ ކޮންސްޓަރަކްޝަން ސައިޓެއްގޮތަށް ކަމަށެވެ. އެގޮތުން މަބްރޫކް ވިދާޅުވީ ވެލިވަރުގައި 30 ކޮޓަރި އާއި ސަރވިސް އޭރިއާ ހަދާފައިވާ ކަމަށެވެ.

މަބްރޫކް ވިދާޅުވީ ކަރަންޓީން ފެސިލިޓީގެ ގޮތުގައި ބޭނުން ކުރަމުންދާ ރިސޯޓްތަކަކީ އެގްރިމޭންޓް ކުރެވިގެން ބޭނުންކުރަމުންދާ ކަރަންޓީން ފެސިލިޓީތަކެއް ކަމަށެވެ. އެގޮތުން، އެ ރިސޯޓްތަކަށް ސަރުކާރުން ފައިސާ ދައްކާނީ ކަރަންޓީނަށް އެ ރިސޯޓަކުން، އެއިރެއްގައި ބޭނުންކުރަމުންދާ ކޮޓަރިތަކަށް އެކަނި ކަމަށެވެ. އަދި ބޭނުން ކުރަމުންދާ ކޮންމެ ކޮޓަރިއަކަށް، ކޮންމެ ދުވަހަކަށް 750ރ ގެ ރޭޓުން އެގްރިމެންޓް ކުރެވިފައިވާ ކަމަށްވެސް މަބްރޫކް ވިދާޅުވި އެވެ. އަދި އެއީ ފުލް ބޯޑު (ހުރިހާއިރެއްގެ ކެއުމާއެެކު) ކަރަންޓާއި ފެނާއި އަދި އެހެނިހެން އޮޕަރޭޝަނަލް ޚަރަދުތައް ހިމަނައިގެން ކަމަށް ވެސް މަބްރޫކް ވިދާޅުވި އެވެ.

މަބްރޫކް އެވިދާޅުވި ގޮތުން، ރާއްޖޭގައި ކަރަންޓީން ފެސިލިޓީގެ ގޮތުގައި ބޭނުންކުރަމުންދާ ރިސޯޓްތަކަށް ސަރުކާރުން މިވަނީ މަދުވެގެން 27،457،500ރ (ހަތާވީސް މިލިއަން ހަތަރުލައްކަ ފަންސާސްހަތްހާސް ފައްސަތޭކަ ރުފިޔާ) ދައްކާފަ އެވެ. އެއީ ހަމައެކަނި ކޮވިޑް-19 ރޯގާއާ ގުޅިގެން ކަރަންޓީން ކުރެވުނު މީހުން ބޭތިއްބުމަށް ރިސޯޓްތަކާއެކު ކުރެވުނު އެގްރީމެންޓްގެ ދަށުން ހަމަ އެކަނި ރިސޯޓްތަކަށް ސަރުކާރުން މިހާތަނަށް ދޫކޮށްފައިވާ ފައިސާ އެވެ.

ކޮވިޑް-19 އާ ގުޅިގެން، ރާއްޖޭގެ ފަތުރުވެރިކަން އެއްކޮށް ހުއްޓިފައިވާތީ، ބައެއް ރިސޯޓް އޯނަރުން ވަނީ އެމީހުންނަން ވާ ގެއްލުންތައް ކުޑަކުރުމުގެ ގޮތުން ކަރަންޓީން ފެސިލިޓީތަކުގެ ގޮތުގައި ސަރުކާރާއެކު އެގްރީމެންޓް ކޮށްފައެވެ.

ކޮވިޑް-19އާ ގުޅިގެން ދައުލަތުން ބޮޑެތި ޚަރަދުތަކެއް ކުރަމުންދާއިރު، ބައެއް ރިސޯޓްތަކުން މުވައްޒަފުން ކަނޑާ، މުސާރަ ކުޑަކުރުމާއި، މުސާރަ ނުލިބޭގޮތައް ޗުއްޓީއަށް ފޮނުވާލުންފަދަ ކަންކަން ހިންގަމުންދާ ރިސޯޓް އޯނަރުންގެ ރިސޯޓްތައް ކަރަންޓީން ފެސިލިޓީގެ ގޮތުގައި ނަގައިގެން ސަރުކާރުން ދަނީ އެ ރިސޯޓް އޯނަރުންނަށް ފައިސާ ވެސް ދައްކަމުންނެވެ.

ރާއްޖޭގައި ހާލުގައި ދިރިއުޅޭ ނިކަމެތި ރައްޔިތުން ގިނައިރު، މާލޭގައި ދިރިއުޅޭ %60 މީހުން ދިރިއުޅެނީ ކުއްޔަށް ތަންތަން ހިފައިގެންނެވެ. ބައެއް ގޭގެއިން ކުލި ނުދައްކާކަމަށް ބުނެ ގެއިން މީހުން ނެރެލާއިރު، ގިނަ ބައެއްގެ ވަޒީފާގެ ހާލަތަށް ނޭދެވޭ ބޮޑެތި ބަދަލުތަކެއް މިވަނީ އައިސްފަ އެވެ.