މެއި މަހުގެ ކުރީކޮޅު، އިޓަލީވިލާތުގެ 'ލޮކްޑައުން' އުވާލުމުގެ މަސައްކަތް ފަށަނީ
27 އެޕްރީލު 2020 | ހޯމަ 02:41ލޮކްޑައުން އުވާލުމުގެ މަސައްކަތް ފަށާނީ މެއި 4 ގައި
އިޓަލީވިލާތުގެ ލޮކްޑައުން: މުޅި ގައުމު ލޮކްޑައުން ކުރީ މާޗް 9 ގައި
މެއި މަހުގެ 4 ވަނަ ދުވަހުން ފެށިގެން، ކޮރޯނާވައިރަސް ފެތުރުން ހުއްޓުވުމަށް އިޓަލީވިލާތުގައި އިޢުލާނުކުރި ލޮކްޑައުން އުވާލުމުގެ މަސައްކަތް ފައްޓަވާނެ ކަމަށް ބޮޑުވަޒީރު ޖުޒެޕޭ ކޮންޓޭ ވިދާޅުވެއްޖެއެވެ.
ލޮކްޑައުން އުވާލުމުގެ މަސައްކަތް ފެށުމުގެ ގޮތުން ކާރުޚާނާތަކާއި، ޢިމާރާތްކުރާ ތަންތަން ހުޅުވުމުގެ ހުއްދަ ދިނުމަށް އިޓަލީ ސަރުކާރުން ވަނީ ނިންމާފައެވެ. އަދި ކުރިއަށް އޮތް ހަފުތާތަކުގެ ތެރޭގައި އިތުރު ވިޔަފާރިތައް ހުޅުވުމުގެ ފުރުޞަތު ދިނުމަށް ވެސް ވަނީ ނިންމާފައެވެ.
ޢާންމު ދިރިއުޅުމަށް ރުޖޫޢަވުމަށް ސަރުކާރުން ކަނޑައަޅާފައިވާ ރޯޑްމެޕުގެ މަޢުލޫމާތު ހިއްސާކުރައްވަމުން ކޮންޓޭ ވިދާޅުވީ، މިއީ އުނދަގޫ މަސައްކަތެއްކަން ޤަބޫލުފުޅުކުރައްވާ ކަމަށެވެ. އަދި ވައިރަހާއެކު ދިރިއުޅެން ފަށާއިރު، ރައްކާތެރިވެވެން އެޅެން އޮތް ފިޔަވަޅެއް އަޅަން ޖެހޭނެ ކަމަށް ވިދާޅުވިއެވެ.
މެއި މަހުގެ ތިންވަނަ ހަފުތާގެ ތެރޭގައި ރީޓެއިލް ވިޔަފާރިކުރާ ތަންތަން ހުޅުވުމުގެ ހުއްދަ ދެވޭނެއެވެ. ރެސްޓޯރަންޓްތަކާއި ކެފޭތައް ހުޅުވުމުގެ ހުއްދަ ދިނުމަށް ނިންމާފައިވަނީ ޖޫން މަހުގެތެރޭގައެވެ.
އިޓަލީގެ ލޮކްޑައުން އިޢުލާނުކޮށްފައިވަނީ، މާޗް މަހުގެ 9 ވަނަ ދުވަހުއެވެ. ލޮކްޑައުން ކުރި ނަމަވެސް، ގިނަ ދުވަސްތަކެއް ވަންދެން ވައިރަސް ކޮންޓްރޯލް ނުވެ ކޭސްތަކުގެ ޢަދަދުތައް ދިޔައީ އިތުރުވަމުންނެވެ. އިތުރު ކޭސްތައް ފެންނަ ޢަދަދު މަޑުޖެހިލާފައި ވަނީ ނިމިދިޔަ ހަފުތާގެ ތެރޭގައެވެ.
