އޮޅުވާލައިގެންނާއި ޑެލިވަރީގެ ނަމުގައި މަކަރާއި ހީލަތް ހަދާނަމަ މައްސަލަ ހުށަހެޅުމަށް އެދިއްޖެ
އޮންލައިން ޕްލެޓްފޯމް އަދި ފުލުހުންގެ 3322111 ނަންބަރަށް ފޯނަށް ގުޅުއްވާ އެ މައްސަލަ ހުށަހެޅުމަށް އެދިފައިވޭ
އެސިސްޓެންޓް ކޮމިޝަނަރ އޮފް ޕޮލިސް އިސްމާއިލް ނަވީން
ކޮވިޑް-19 އާއި ގުޅިގެން ގޭގައި މަޑުކޮށްގެން ތިބޭ އިރު އޮންލައިންކޮށް ގަންނަ ތަކެތި ނުލިބުމާއި ޑެލިވަރީގެ ނަމުގައި މަކަރާއި ހީލަތް ހަދާނަމަ އެ މައްސަލަތައް ލަސްނުކޮށް ފުލުހުންނަށް ހުށަހެޅުމަށް އެދިއްޖެއެވެ.
އާދީއްތަ ދުވަހު ނެޝަނަލް އެމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެސިސްޓެންޓް ކޮމިޝަނަރ އޮފް ޕޮލިސް އިސްމާއިލް ނަވީން ވިދާޅުވީ މި ދުވަސްވަރު ހުށަހެޅޭ މަކަރާއި ހީލަތުގެ މައްސަލަތައް އިތުރުކަމަށެވެ. އަދި އޮންލައިން މެދުވެރިކޮށް ފައިސާ ޖަމާކުރުމުން ތަކެތި ޑެލިވަރީ ނުކޮށްދޭ މައްސަލައާއި، މަކަރާއި ހީލަތް ހަދާ މައްސަލަތައް ފުލުހުންގެ އޮންލައިން ޕްލެޓްފޯމް ބޭނުން ކޮށްގެން ރިޕޯޓުކުރުމުގެ އިތުރުން، ފުލުހުންގެ 3322111 ނަންބަރަށް ފޯނަށް ގުޅައިގެން އެ މައްސަލަ ހުށަހެޅުމަށް ނަވީން ވަނީ އެދިވަޑައިގެންފައެވެ.
ނަވީން ވިދާޅުވީ ތަކެތި ގަތުމަށް ފައިސާ ޖަމާކުރުމުގެ ކުރިން، އެ ޖަމާކުރާ ފަރާތަކީ ޞައްޙަ ފަރާތެއްތޯ ބެލުން މުހިންމުކަމަށެވެ. އަދި ކުރެވޭ މުޢާމަލާތުގެ ޞައްހަކަން ޔަގީން ކުރުމަށްފަހު ނޫނީ އެ މުޢާމަލާތް ނުކުރުމަށް ނަވީން ވަނީ އެދިވަޑައިގެންފައެވެ. އަދި މަކަރާއި ހީލަތުގެ ޝިކާރައަކަށް ވެއްޖެނަމަ ނުވަތަ އެފަދައިން ހީވާ ނަމަ، އެކަން ލަސްނުކޮށް ފުލުހުންގެ ހޮޓްލައިނަށް ނުވަތަ ޕޯޓަލް މެދުރިކޮށް މައްސަލަ ހުށަހެޅުމަށް ނަވީން ވަނީ އިލްތިމާސްކުރައްވާފައެވެ.
