ޔޫރޯ ފުޓްބޯޅަ މުބާރާތް އަންނަ އަހަރަށް ފަސްކުރި ނަމަވެސް، މުބާރާތުގެ ނަން ބަދަލު ނުވާނެ ކަމަށް ޔުއެފާ އިން ބުނެފިއެވެ.

މިހާރު ހަލުވިކަމާއިއެކު ފެތުރެމުންދާ ކޮރޯނާވައިރަސް (ކޮވިޑް-19) ގެ ސަބަބުން ޔޫރޯ ފުޓްބޯޅަ މުބާރާތް އަންނަ އަހަރަށް ފަސްކުރިއިރު، ކުރިން މި މުބާރާތް ބޭއްވުމަށް ތާވަލުކޮށްފައި އޮތީ މިއަހަރުގެ ޖޫން މަހުގެ 12 ވަނަ ދުވަހުން ފެށިގެން ޖުލައިމަހުގެ 12 ވަނަ ދުވަހުގެ ނިޔަލަށެވެ. އެކަމަކު ޔުއެފާއިން މިހާރު ވަނީ މިމުބާރާތް އަންނަ އަހަރުގެ ޖޫންމަހުގެ 11 ވަނަ ދުވަހުން ފެށިގެން ޖުލައިމަހުގެ 11 ވަނަ ދުވަހުގެ ނިޔަލަށް ބޭއްވުމަށް ތާވަލުކޮށްފައެވެ.

މިދިޔަ ހަފުތާގައި ޔުއެފާއިން ބޭއްވި ވީޑިއޯ ކޮންފަރެންސް ބައްދަލުވުންތަކަށްފަހު ވަނީ އަންނަ އަހަރުގެ މުބާރާތުގެ ނަން ބަދަލުނުކުރަން ނިންމާފައެވެ. އެހެންކަމުން އަންނަ އަހަރުގެ މުބާރާތްވެސް ބާއްވާނީ "ޔޫރޯ 2020" ގެ ނަމުގައެވެ.

މުބާރާތުގެ ނަމަށް ބަދަލުނުގެންނަށް ޔުއެފާ އިން ނިންމިއިރު، އަންނަ އަހަރުގެ މުބާރާތުގެ ޝެޑިއުލަށް ބަދަލު ނުގެނެސް، މިހާރުވެސް ރާވާފައި އޮތްގޮތައް ޔޫރަޕުގެ ތަފާތު 12 ގައުމެއްގެ 12 ސިޓީއެއްގައި މުބާރާތް ކުރިއަށް ގެންދިޔުމަށް ޔުއެފާއިން ނިންމާފައިވާ ކަމަށް ރިޕޯޓުތައް ބުނެއެވެ.

މީގެ ކުރިން ޔުއެފާއިން ރާވާފައި އޮތީ މުބާރާތް ހުޅުވާ މެޗު އިޓަލީގެ ރޯމްގެ ސްޓާޑިއޯ އޮލިމްޕިކޯ ސްޓޭޑިއަމްގައި ކުޅުމަށެވެ. އަދި ސެމީ ފައިނަލް މެޗުތަކާއި، މުބާރާތުގެ ފައިނަލް މެޗު ކުޅުމަށް ނިންމާފައިވަނީ ލަންޑަނުގެ ވެމްބްލީ ސްޓޭޑިއަމްގައެވެ.

މި މުބާރާތް ތަފާތު 12 ސިޓީއެއްގައި ކުރިއަށްގެންދަން ޔުއެފާއިން ނިންމީ، ޔޫރޯ މުބާރާތް ބާއްވާތާ 60 އަހަރު އަހަރު ފުރޭ މުނާސަބަތު ކުލަގަދަކޮށް ފާހަގަކުރުމުގެ ގޮތުންނެވެ.

ކޮވިޑް-19 އާ ގުޅިގެން ދުނިޔޭގެ ފުޓްބޯޅަ ހުއްޓުމަކަށް އައިސްފައިވާއިރު، ޔޫރޯ އަންނަ އަހަރަށް ފަސްކުރީ މިހާރު މެދު ކަނޑާލާފައިވާ ލީގުތަކުގެ ކުޅުން، ހޫނު މޫސުމުގައި ކުރިއަށް ގެންދިޔުމަށް ފުރުސަތު ދިނުމުގެ ގޮތުންނެވެ. ޔުއެފާއިން މީގެ ކުރިންވަނީ ޔުއެފާ ޗެމްޕިއަންސް ލީގާއި ޔުއެފާ ޔޫރޮޕާ ލީގުގެ ކުޅުން މުއްދަތެއް ނެތްގޮތައް ފަސްކޮށްފައެވެ.