ރ. ހުޅުދުއްފާރުގައި ރޭގަނޑު 10:00 ގެ ފަހުން ބޭރަށް ނުކުންނަ މީހުން ކަރަންޓީން ކުރާނެ ކަމަށް އެރަށު ކައުންސިލުން ބުނެފިއެވެ.

ހުޅުއްފާރު ކައުންސިލުން ބުނީ ހެލްތް ޕްރޮޓެކްޝަން އެޖެންސީގެ އެންގުމުގައި ވާގޮތުގެމަތީން، ހުޅުދުއްފާރުގައި ކޮވިޑް-19 ފެތުރުން ކޮންޓްރޯލްކޮށް، އާންމު ރައްޔިތުންގެ ޞިއްޙަތު ރައްކައުތެރިކުރުމުގެ ގޮތުން ހުޅުދުއްފާރު ޓާސްކް ފޯސްއިން ބައެއް ކަންކަން ނިންމާފައިވާ ކަމަށެވެ.

އެގޮތުން ކައުންސިލް އިދާރާ، ޓާސްކްފޯސް، ސޯޝަލް ސަޕޯޓް ޑެސްކް، ފެނަކަ ބްރާންޗް އަދި ޞިއްޙީ މަރުކަޒުގެ ޑިއުޓީ ތަކަށް ނުވަތަ މަސައްކަތްތަކަށް އެކަމަށް ކަނޑައަޅާ މުވައްޒަފުންނަށް އެމަސައްކަތްތަކުގައި އުޅެވޭނެ ކަމަށާއި، ބަލިވެގެން ޑޮކްޓަރަށް ދައްކަން ބޭނުންފުޅުނަމަ ނުވަތަ ބޭހެއް ބޭނުންފުޅުނަމަ ޞިއްޙީ މަރުކަޒުގެ ނަންބަރަށް ގުޅުމަށް ވަނީ އެދިފައެވެ.

އަދި ޒަރޫރީ ބޭނުމެއްނެތި ރޭގަނޑު 10 ގެ ފަހުން މަގުމަތީގައި އުޅޭ ފަރާތްތަކާއިމެދު ފިޔަވަޅު އަޅާނެ ކަމަށާއި، އެފަދަ ފަރާތްތަކަށް ފުރަތަމަ ނަސޭހަތްތެރިވެވޭނެ ކަމަށާއި، ދެވަނަ ފަހަރު އެޢަމަލު ތަކުރާރު ކޮށްފިނަމަ ގޭގައި ކަރަންޓީނު ވުމަށް އެންގޭނެ ކަމަށެވެ. އަދި މިގޮތަށް އަމަލުނުކޮށްފިނަމަ ޕޮލިހަށް އެފަރާތެއްގެ މައްސަލަ ހުށަހެޅޭނެ ކަމަށް ބުނެފައިވެއެވެ.

މީގެ އިތުރުން ހުއްދަ ހޯދުމަށްފަހުގައި އުމްރާނީ މަސައްކަތްތައް ކުރުމަށް ހަމަޖެހިފައިވާ ގަޑިއަކީ ހެނދުނު 08:00ން ހަވީރު 16:00ށް އަދި ފިހާރަ ތަކުން ޚިދުމަތްދޭ ގަޑިތަކަކީ ހެނދުނު 09:00ން 11:00ށް އަދި މެންދުރުފަހު 2:00ން 5:00ށް އަށް ކަމަށެވެ. އަދި ފިހާރަ ތަކުން ޑެލިވަރީގެ ޚިދުމަތްދޭނީ ރޭގަނޑު 08:00ން 10:00ށް ކަމަށް ބުނެފައިވެއެވެ.

ހޮޓާތަކުން ޑެލިވަރީގެ ޚިދުމަތްދިނުމަށް ހަމަޖެހިފައިވަނީ ހަވީރު 5:00ން ރޭގަނޑު 12:00ށެވެ. ހުޅުދުއްފާރު ކައުންސިލުން ވަނީ މި ކަންތައްތަކަކީ އެންމެހާ ރައްޔިތުންގެ ސަލާމަތާއި ރައްކާތެރިކަމަށްޓަކައި މިދަނޑިވަޅުގައި ކޮންމެހެންއަޅަންޖެހޭ ފިޔަވަޅުތަކެއް ކަމަށްވާތީ އެންމެހާ ފަރާތްތަކުގެ އެއްބާރުލުން ދިނުމަށް އެދިފައެވެ. އަދި އެންމެންގެ ރައްކާތެރިކަމަށް ޞިއްޙީ މާހިރުންނާއި ކަމާއިގުޅޭ ފަރާތްތަކުން ދޭ ލަފަޔާއި އިރުޝާދާޢި އެއްގޮތަށް އަމަލުކުރުމަށް ވަނީ ހުޅުދުއްފާރު ކައުންސިލުން ވަނީ އަންގާފައެވެ.