ރާއްޖެއިން ބޭރުގައި ކިޔަވަމުންދިޔަ ދިވެހި މެޑިކަލް ދަރިވަރުންގެ ތެރެއިން ގިނަ އަދަދެއްގެ ދަރިވަރުން ގެނައުމަށް 4 މިލިއަން ރުފިޔާ ހަރަދުކޮށްފައިވާކަމަށް ސަރުކާރުން ހާމަކޮށްފިއެވެ.

ހޮނިހިރު ދުވަހުގެރޭ ނެޝަނަލް އިމަރޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި އެންއީއޯސީގެ ތަރުޖަމާނު މަބްރޫކް އަޒީޒް ވިދާޅުވީ، ޕިލިޕީންސްގައި ކިޔަވަމުން ދިޔަ 63 ދަރިވަރަކާއި، ނޭޕާލްގައި ކިޔވަމުންދިޔަ 99 ދަރިވަރަކާއި ޕާކިސްތާނުގައި ކިޔަވަމުންދިޔަ 6 ދަރިވަރަކު ގެނައުމަށް ޖުމްލަ 4 މިލިއަން ރުފިޔާ ހަރަދުކޮށްފައިވާކަމަށެވެ. މި މެޑިކަލް ދަރިވަރުންގެ ތެރެއިން ގިނަ އަދަދެއްގެ ދަރިވަރުން ވަނީ އަމަލީ މައިދާނުގައި މަސައްކަތް ކުރަން ފަށައިފައެވެ.

ރާއްޖެއިން ބޭރުން އައި މެޑިކަލް ދަރިވަރުންގެ ތެރެއިން ގިނަ އަދަދެއްގެ ދަރިވަރުން އަމަލީ މައިދާނުގައި މަސައްކަތް ކުރަން ފަށާފައިވާއިރު ކަރަންޓީން ފެސިލިޓީތަކުން އެ މުއްދަތު ނިންމުމަށްފަހު 78 މެޑިކަލް ސްޓޫޑެންޓުން ދޫކޮށްލާފައިވާ ކަމަށް މީގެކުރިން އެންއީއޯސީން ވަނީ ހާމަކޮށްފައެވެ. މީގެތެރެއިން ގިނަ އަދަދެއްގެ ދަރިވަރުން އައިޖީއެމްއެޗްގައި އަދި މެޑިކަލް ކްލަސްޓާގެ އެންއީއޯސީގައި މަސައްކަތް ކުރަމުންދާ ކަމަށާއި ދަރިވަރުންނަށް ބޭނުންވާ ތަމްރީނުތައް ދެމުންދާ ކަމަށް ވެސް މީގެކުރިން ވަނީ ބުނެފައެވެ.

ރާއްޖޭގެ މިހާރުގެ ހާލަތަށް ރިއާޔަތްކޮށް އެންއީއޯސީން ބުނެފައިވަނީ ރާއްޖޭގައި މިވަގުތު ތިބީ ކޮންމެ 1000 މީހަކަށް 2 ޑޮކްޓަރުންނާއި 7 ނަރުހުން ކަމަށެވެ. މީގެ އިތުރުން ބަންގުލަދޭޝުން ވަނީ އެ ގައުމުގެ 10 މީހުން ހިމެނޭ މެޑިކަލް ޓީމެއް ރާއްޖެ ފޮނުވާފަ އެވެ.